Friday, July 14, 2017

சினிமாவுல என்ன புதுசு?


ராஜேஸ்வரி, நீர்கொழும்பு

சினிமான்னு பொதுப்படையா கேக்கிறீங்களாம்மா? இல்ல தமிழ் சினிமாவை பத்தி கேக்கிறீங்களா? தென்னிந்திய தமிழ் சினிமா இருக்குது, தெலுங்கு, ஹிந்தி, மலையாளம், அப்புறம் அமெரிக்க இங்கிலீசு, இலங்கையில் சிங்களம், தமிழ்னு சினிமா இப்போ ரொம்ப விசாலம். சினிமா உலகத்துல பொதுவா என்ன பேசிக்கிறாங்கனு தெரிஞ்சிக்க விரும்புறீங்கன்னு  நெனைக்கிறேன். சரிதான…. ஒவ்வொன்னா சொல்லுறேன் கேளுங்க.

முதல்ல தமிழ் சினிமாவில் இப்பத்திய பேசு பொருள்

ஒரு சில நடிகர்மாருக்கு கதை சொல்லி சம்மதம் கேக்குறது பெரிய அக்கப்போர் புடிச்ச வேலை. கதையை விட கதை கேக்குற நேரம், இடம் புடிச்சிருந்தாதான் பெரிய நடிகர்களுக்கு மூடு வரும். அப்புறம் கதையில தன்னோட இமேஜை கூட்டுற மாதிரி திருத்தம் சொல்லுவாங்க … அதை அப்பிடியே செய்யணு இல்லேன்னா அம்பேல்தான். இப்படித்தான் சினிமாத்துறையில் அலைஞ்சி திரிஞ்சே ஒரு உதவி இயக்குனர், நடிகர் விஜய் சேதுபதி கிட்ட கதை சொல்ல போனாரு. அவுரு சொன்ன கதை சேதுபதி சாருக்கு பிடிச்சிப்போச்சி. அப்புறம் நடந்ததுதான் கிளைமாக்ஸ்.

“உங்கட கதை பிரமாதமா இருக்கு. ஆனா எனக்கு இப்ப உங்களோட படம் செய்ய நேரமில்லை இருந்தாலும் உங்களைப்போல திறமையுள்ள இயக்குனர் வாய்ப்புக்கு காத்துக்கொண்டிருக்கக்கூடாது. அதனால் உங்களுக்கு நான் ஒரு கோடி ரூபா தர்றேன். சின்ன படஜெட்ல புதுமுகத்தை வச்சி ஒரு படத்தை இயக்குங்க. அந்த படத்தை நானே ரிலீஸ் பண்ணிக்குடுக்குறேன். அப்புறம் வாங்க நான் நேரம் ஒதுக்கி வச்சிருக்கேன். ரெண்டு பேரும் சேர்ந்து படம் பண்ணலாம்” விஜய் சேதுபதி சொல்லியிருக்காரு.
தமிழ் சினிமா வரலாற்றுலயே இப்படி ஒரு விஷயம் நடந்ததில்லன்னு பேசிக்கிறாங்க.

அடுத்தது தெலுங்கு சினிமா…

பாகுபலி 2 இந்தியாவில் 1400 கோடி, வெளிநாடுகளில் 300 கோடின்னு மொத்தம் 1700 கோடி வசூல் பண்ணியிருக்கு. ரெண்டாவதா இருந்த அமீர் கானோட ‘தங்கல்’ போன மாசம் சீனாவில வெளியிடப்பட்டதால இப்ப முதல் இடத்துக்கு  வந்திருக்கு.
ஆனா பாகுபலி 2 வெளியாகி இப்போ ஏழாவது வாரமா இன்னும் ஓடிட்டிருக்கு.அதேநேரம் எதிர்வரும் செப்டம்பர் மாதம் பாகுபலி 2 சீனாவுல 4 ஆயிரம் தியேட்டர்களில் வெளியிடப்போறாங்க. அங்க நடக்குற வெளியீட்டு விழாவில் படத்தோட நடிகர்களும் கலந்துக்க போறாங்க. அத்தோட இந்த வருட கடைசியில ஜப்பான் , கொரியா மற்றும் தாய்வான்லயும் பாகுபலி 2 ரிலீசாகப் போகுது. அதனால இந்தியாவுல அதிக கூடிய வசூலை பெற்ற படம் பாகுபலி 2 என்பது உறுதியாகிடும்கிறதுதான் தெலுங்கு சினிமாவுல இப்பத்ய பேசு பொருள்.

இப்போ மலையாளத்துக்கு வருவோம்

பாகுபலி 2 வெற்றியில் அனுகாவுக்கு பெரிய பங்கிருக்கு. இல்லைன்னு யாரும் சொல்ல முடியாது.. அது இப்ப வேலை செய்ய ஆரம்பிச்சிருக்கு. ஆயிரம் கோடி ரூபா பட்ஜெட்ல இப்போ மகாபாரதம் படம் எடுக்கப்போறாங்களே அந்தப்படத்துல திரௌபதியா நடிக்கிறத்துக்கு அனுஷ்காவத்தான் கூப்பிட்டிருக்காங்களாம்.
ஐஸ்வர்யா ராணை கூப்பிடத்தான் யோசிச்சிருக்காங்க….. ஆனா பாகுபலி 2 வசூல் சாதனை அந்த எண்ணத்தை மாத்தியிருக்கு. அதுமட்டுமல்ல அனுஷ்கா நடிக்கிற முதல் மலையாளப்படமும் இதுதானாம்.

இப்போ ஹிந்திப்படம்

வட இந்தியாவில ரம்சான் பண்டிக்கைக்கு 3 ஆயிரம் தியேட்டர்களில் தனியொரு படமாக சல்மான் கானின் ‘டியூப் லைட்’ வெளியாகி சக்கை போடு போடுகிறது.
அதேநெரம் உலகளாவியரீதியில் 110 ஆயிரம் தியேட்டர்களில் ஓடுகிறது…. உலகளாவியரீதியில் 9 ஆயிரம் தியேட்டர்களில் ஓடி முதல் நாளில் 40.75 கோடி ரூபா வசூலை பெற்ற பாகுபலி 2 சாதனையை டியூப் லைட் முறியடிக்குமா? என்பதுதான் ஹிந்திப்படவுலகில் இப்போதைய கேள்வி.
‘டியூப்லைட்’ டில் சல்மானுக்கு எதையுமே லேட்டா புரிஞ்சுக்குற லூசுப்பையன் வேடடாம்

இப்ப வாறது அமெரிக்க இங்கிலிசு சினிமா

லண்டன்ஸ் பிறந்தாலும் எமி ஜாக்ஸன் ‘மதராஸ பட்டணம்’ மூலம் தமிழில்தான் சினிமாவுக்கு அறிமுகம். பிறகு ஹிந்திப்படம். இப்போ ரஜினியோட 2.0 படத்தில நடிக்கிறா. அடிக்கடி எமி.லண்டன் பறந்துருவா. பட்டணம் படத்துல நடிக்கிறத்துக்கு முன்னால எமி லண்டன்ல நாடகத்துல நடிச்சிருக்கு.
அதனால இந்த முறையும் லண்டன்ல இங்கிலிசு நாடகம் நடிச்சிட்டிருக்கிறப்போ ஹொலிவுட் டைரக்டர் ஆன்டரு மொரஹன் தன்னோட புதுப் படத்துக்கு நாயகியைத் தேடிட்டு அங்க வந்திருக்காரு. ஏமிய கண்டதும் அவருக்கு புடிச்சுப்போச்சி. என்னோட படத்துல நடிக்கிறியான்னு கேட்டிக்காரு . எம் உடனே சரின்னு சொல்லியிருக்கு. இங்கிலிசு பொண்ணுக்கே அஞ்சாறு இந்திய படத்துக்கு பிறகுதான் இங்கிலீசு படம்கிறதுதான் இப்பத்திய பேச்சு

இனி வாறது இலங்கை சிங்கள சினிமா 

நந்தன ஹேவாபன்னன்னு எங்கவூரு டைரக்டரு கின்னஸ் சாதனை படைச்சிருக்காரு. ஒரு படத்தோட கதை எழுதுறதை கடந்த ஜுன் 16 ஆம் திகதி காலையில 6.10க்கு ஆரம்பிச்சி அதை படமாக்கி 18 ஆம் திகதி மாலை 5.50க்கு திரையிட்டுக்காட்டியிருக்காரு. இதுக்கு மொத்தமா 59 மணித்தியாலம் 20 நிமிட நேரம் ஆகியிருக்கு.

‘சலகுன’ அடையாளம் என்ற அந்தப்படம் கெமராவில் எடுக்கப்பட்டு 90 நிமிடம் ஓடுகிறது. தொலைக்காட்சி நிகழ்ச்சி ஒன்றில் 1 கோடி ரூபாவை வெல்லும் 7 வயது சிறுமியை அவளது சொந்தக்குடும்பத்தினரே கடத்துவதுதான் கதை. அந்தக் கதையை திரைக்கதையாக எழுதி இயக்கி ஒளிப்பதிவும் செய்தவர் நந்தனதான். இதற்கு முன்னால் இந்த விடயத்தில் இருந்த சாதனைக்கும் சொந்தக்காரர் இவரேதான். 2014 இல் மங்கல கமன என்ற படத்தை இவர் 71 மணித்தியாலயம் 19 நிமிடங்களில் எழுதி, இயக்கி ஒளிப்பதிவு செய்து இவர் சாதனை படைத்திருந்தார்.

இனி இலங்கை தமிழ் சினிமாவுக்கு வருவமா?

 இலங்கையில் உள்ள இளவட்டங்கள் குறும் பட தயாரிப்பில் நிறைய அக்கறை எடுத்து வாறாங்க . ஆனா அவங்க குறும் படங்களை காதல் இல்லன்னா ஏமாற்றம்தான் மையக்கருத்தா அமையுது. அதில இருந்து மாறுபட்ட கருத்துல அமைஞ்ச ஒரு நல்ல குறும் படத்தை அண்மையில் பார்க்க முடிந்தது.
குறும்படங்கள் நிறைய தயாரிக்கிற வடக்குல இருந்து இந்தப்படம் வரல. மலைநாட்டுல இருந்து வந்தது. சரியா சொல்லப்போனா அந்தப்படம் வேற எங்கையும் இருந்து வந்திருக்க முடியாது. ஏன்னா அந்தபடத்துல வீசினது மலைநாட்டு மண்வாசம். வேற எங்கையும் கிடைக்காத அந்த மண்ணுக்கு மட்டும் உரித்தான ஒரு தனித்துவம் அது.
‘மனிதி’ ங்கற அந்தப்படத்தை வெளியிட்ட  மூன்நாவது நாளே யு.டியூப்ல பதிவேத்திடாங்க. தகவல் கிடைச்சவுடனே தட்டிப்பார்த்தா அந்தப் பெயர்ல 10, 12 குறும் படங்கள். அதில 3,4 இதே கருத்துல இருந்தது ஆனா அத்தனையிலயும் இந்த மலைநாட்டு ‘மனிதி’ மனசுக்கு பிடிக்குது. கதைக்கு முக்கியத்துவம் குடுக்கனுங்கிறதுக்காக பச்சைப் பசேளையா இருக்குற தேயிலை மலையை உவர் நிறத்துக்கு (GREY TONE) மாத்தியிருக்கிறாங்கன்னா பாருங்களேன். அது பச்சை மலை தேயிலையா இருந்தாக் கூட இந்த அளவுக்கு வந்திருக்குமாங்கிறது சந்தேகந்தான். எல்லாத்தையும் விட அந்த தலைப்பு காட்சிகள் கொசுறு. ஆனா அந்த குரலை மாத்தியிருக்கலாம். இது என்னோட கதைன்னு பாதிக்கப்பட்ட பெண் பேசுற மாதிரி இருந்திருக்கலாம். மனிதி தவிர வேறு எந்த தலைப்பும் தமிழில் இல்லாதது கொஞ்சம் நெருடல்.
நடிப்புல எல்லோரும் நல்லா செஞ்சிருக்காங்க. ஆனா கங்காணி ஒரு படி மேல.  மொத்தத்துல நல்ல முயற்சி.
 

Saturday, June 24, 2017

தனுஷ் ஆங்கில படத்தில் நடிக்கிறாரா?

அரவிந்த்.  பண்டாரவளை

'THE EXTRAORDINARY JOURNEY OF THE FAKIR'என்ற அந்தப்படத்தின் படப்பிடிப்பு இப்போது ஆரம்பித்துள்ளது. கனடாவை சேர்ந்த ஜென் ஸ்காட் டைரக்ட் செல்கிறாரா பெரனீஸ் பெஜோ,எரின் மொரியார்டி ஆகிய நடிகைகள் முக்கிய பாத்திரத்தில் நடித்து வருகின்றனர். அந்தப்படத்தின் கதை இதுதான்.

அஜா இந்தியாவில் உள்ள ஏழ்மையான ஆனால் திறமையான மாயாஜால வித்தைக்காரன். அவனது தாயின் கட்டளைப்படி அவன் பாரீஸ் செல்கிறான். அங்கு ஏற்படும் தகராறு காரணமாக மரச்சாமான் கடையில் உள்ள அலுமாரிக்குள் மாட்டிக்கொள்கிறான். கொள்ளைக்காரர்கள், எல்லையோர காவலர்கள் என்று பல ஆபத்துக்களை தாண்டியவாறு அஜா உலகை வலம் வருகிறான். என்பதுதான் கதை. தனுஷ் நல்ல நடிகர் ஆங்கிலத்திலும் கொடி கட்டுவார்.

தமிழ் சினிமாவில் என்ன புதுசு?
எம்.எம்.ஆப்தீன், புத்தளம்.

புதுசு,பூகம்பம்,மையம் எல்லாமே ரஜனிதான் தமிழகத்தின் பல இடங்களில் உள்ள தனது ரசிகர்களை சென்னைக்கு வரவழைத்து அவர்களுடன் படமும் எடுத்துக்கொண்டு தனது அரசியல் நோக்கம் பற்றி பேசியிருக்கிறார் ரஜனிகாந்த்.

நான் அரசியலுக்கு வரும் சூழ்நிலை ஏற்பட்டால் பணம் சம்பாதிக்க விரும்புபவர்களை அருகில் சேர்ததுக்கொள்ள மாட்டேன். நாட்டில் ஜனநாயகம் கெட்டுப்போய் உள்ளது. எந்த நேரமும் அரசியல் போர் வரக்கூடும். எனவே ரஜனி ரசிகர்கள் எதற்கும் தயாராக இருக்க வேண்டும் என்று ரஜனி தன் ரசிகர்களிடம் கூறியுள்ளார்.
அத்துடன் தமிழகத்தில் நிலவும் வரட்சியை போக்க என்ன செய்யலாம்? ஒவ்வொரு மாவட்டத்திலும் அதிக அளவில் ஊழல் செய்யும் அதிகாரி யார்? அரசியல்வாதி யார்? ஒவ்வொரு மாவட்டத்திலும் உள்ள நீர் ஆதாரம் என்ன? எந்தெந்த பகுதிகளில் உள்ள நதிகளில் எவ்வளவு நீர் வருகிறது? உங்கள் மாவட்டங்களில் எந்த நடிகர் பிரபலமாக உள்ளார்?  இந்த கேள்விகளுக்கெல்லாம் ஊருக்கு சென்று பதில் எழுதிக்கேட்டு வாருங்கள். தமிழகத்தில் நலனுக்காக இந்த பதில்களை திரட்டிக்கொண்டு பிரதமரைப் பார்க்கபோகிறேன் என்றும் ரசிகர்களிடம் கூறியுள்ளார்.

ரஜனி விவகாரம் சர்சைக்குரியதாக மாறிவருவதாலும் ரஜனியின் வீட்டுக்கு முன் ஆர்ப்பாட்டம் நடத்தப்போவதாக சில அமைப்புகள் கூறிவருவதாகவும் ரஜனியின் வீட்டுக்கு முன் பொலிஸ் பாதுகாப்பு பலப்படுத்தப்பட்டுள்ள அ.தி.மு.க. அட்சி கலைக்கப்பட்டால் சுதந்திர தினமான ஆகஸ்ட் 16 ஆம் திகதி ரஜனி தனது புதிய கட்சியின் பெயரையும் கொடியையும் அறிவிக்கலாம்.
35 வயதில் கெமரா முன் நடித்தேன். எத்தனை பாராட்டுக்கள் 65 வயதில் அரசியல் மேடையில் நடிக்கிறேன். எத்தனை போராட்டங்கள்.

சினிமாவில் எல்லோருமே பணத்துக்குத்தானே?
ராஜேந்திரன்,கொழும்பு

நீங்கள் சொல்வது சரிதான். ஆனால் சினிமாவில் பணம் வேண்டாம் என்று சொல்பவர்களும் இருக்கிறார்கள். அந்த பூத்தாற் போல் ராஜ்கிரணைத் தெரியுமா? 100 படங்களுக்கு மேல் நடித்த அனுபவம் இருந்த போதும் அவர் உண்மையிலேயே நடித்திருப்பது சுமார் 30 படங்கள்தான். பணத்துக்காகத்தான் சினிமாவுக்கு வந்தேன் என்று பகிரங்கமாகக் கூறும் கமல் நடத்தும் (பணத்துக்காகத்தான்) பிக்பொஸ் தொலைக்காட்சி நிகழ்ச்சியில் ஒவ்வொரு வாரமும் ஒரு பிரபலத்தை அழைத்து பேட்டி காண்கிறார்கள். அந்த நிகழ்ச்சிக்கு ராஜ்கிரணை அழைத்திருக்கிறார்கள். விளம்பரங்களில் நடிப்பதில்லை என்பதை ஒரு கொள்கையாக வைத்திருப்பவர் ராஜ்கிரண். இதனையும் ஒரு விளம்பர நிகழ்ச்சி என்றே கருதினார். கமல் அழைத்தும் கூட ஐ ஆம் சரி என்று கூறியிருக்கிறார் ராஜ்கிரணை கொக்கா?
ஒரு சிலர் மட்டுமே விதி விலக்கு.

கமல் அரசியலுக்கு வருவாரா?
எம்.எஸ்.சிஹான் சிலாபம்
 5 வயதில் அம்மாவும் நீயே அப்பாவும் நீயே என்று களத்தூர் கண்ணம்மா மூலம் சினிமாவுக்கு வந்தவர் கமல். இன்று வரை தொடர்கிறார். கமலை சினிமாவுக்கு அறிமுகப்படுத்திய ஏ.வி.எம். நிறுவனம் தற்போது அந்த துறையில் இருந்து ஒதுங்கி இருக்கிறது. கட்டிடங்களை கட்டி வாடகைக்கு விடும் வியாபாரத்தை செய்து வருகிறது. கமலுக்கு இது தெரிந்தும் கொஞ்சம் கவலை. நாமிருக்கும் போது இப்படி நடக்கலாமா? என்று யோசித்திருக்கிறார். உடனே ஏ.வி.எம். உயர் மட்டத்தை அழைத்து தனது கால்ஷீட்டை கொடுத்திருக்கிறார். இப்போது கமலை வைத்து காமெடிப்படம் தயாரிக்கிறது ஏ.வி.எம். படத்தின் பெயர் ‘மெய்யப்பன்’ ‘மெய்யப்பன்’ வாயைத்திறந்தாலே சிரிப்புத்தான்.

ம்..ம் கமலுக்கு எல்லாமே சினிமா தான்.

Saturday, June 3, 2017

துயர் துடைக்கும் பணியில்

இலங்கையில் மூன்று மாகாணங்களில் ஏற்பட்ட மழை வெள்ளம் மற்றும் நிலச்சரிவுகளில் சிக்கி பாதிக்கப்பட்ட மக்களின் துயர் துடைக்கும் பணி அரச மட்டத்திலும், சில தொண்டு நிறுவனங்களின் உதவியுடனும் முன்னெடுத்து வரப்படுகிறது.

இயற்கை அனர்த்தத்தில் அதிகம் பாதிக்கப்பட்ட புளத்சிங்கள, இரத்தினபுரி ஆகிய பகுதிகளுக்கு கொழும்பு வர்த்தக சங்கத்தின் ஏற்பாட்டில் நிவாரணப் பொருட்கள் ஏற்றிய இரண்டு லொறிகள் நேற்று (03-06-2017) தமது நெடும்பயணத்தை ஆரம்பித்தது.

இரத்தினபுரி பகுதிகளுக்கான நிவாரணப் பொருட்களை கொழும்பு வர்தக சங்கத்தின் ஆதரவுடன்  அமைச்சர் மனோ கணேசன் பாதிக்கப்பட்ட மக்களுக்கு கையளித்தார்.

புளத்சிங்கள சிறுதோட்ட பகுதிகளில் இயற்கை சீற்றத்தினால் பாதிக்கப்பட்டு சொல்லனா துயரங்களை அனுபவித்து, நிவாரணம் பெற்றுக்கொள்ள முடியாது தவித்த எமது உறவுகளைத் தேடிக் கண்டுபிடித்து நாம் உணவு பொருட்களை கையளித்தது பெருமகிழ்ச்சியை தருகிறது. புளத்சிங்கள தோட்ட பகுதிகளுக்கான உலர் உணவுப் பொருட்களை கையளிக்கும் பணியை கொழும்பு வர்த்தக சங்கத்தின் துணையோடு இங்கிரிய றைகம் மேற்பிரிவு ஸ்ரீ குறிஞ்சி மகா மாரியம்மன் ஆலயத்தின் அறங்காவலர் திரு. கிருஸ்ணன் மிகவும் சிறப்பாக செய்திருந்தார். புளத்சிங்கள பிரதேசத்தில் மிகவும் பாதிக்கப்பட்ட இடங்களை இனங்கண்டு, அவற்றை நேர்த்தியான முறையில் தெரிவு செய்து புளத்சிங்கள பகுதிக்கான  துயர் துடைக்கும் பணிக்கான திட்டமிடலை வடிவமைத்து மொறட்டுவை தெ சொய்ஸ்சா மகாவித்தியாலய அதிபர் திரு ஆனந்தகுமார் எமக்கு வழங்கியிருந்தார்.
கரடு முரடான பாதைகளை ஊடறுத்து நாம் களப்பணியாற்றிய அந்த மகிழ்ச்சியான தருணங்களின் போது க்ளிக் செய்த காட்சிகள். 












Thursday, May 11, 2017

திரையரங்கில் எல்லாம் டிஜிட்டல் மயமாகி வருகிறதே!

வாசுதேவன் - கொழும்பு

 நீங்கள் சொல்வது பெரும்பாலும் உண்மைதான். சினிமா தியேட்டர்களில் புரொஜொக்டரும் ஒலியமைப்பும் டிஜிட்டல் மயமாகியுள்ள போதிலும் படங்கள் காட்டப்படும் திரை மட்டும் வெறும் திரைத்துணியாகவே இருக்கிறது
இப்போது திரையரங்கில் அதிக துல்லியத்துடன் கூடிய டிஜிட்டல் திரைகள் விரைவில் அறிமுகப்படுத்தப்பட்டவுள்ளன.

ஹோம் தியேட்டர்களில் டிஜிட்டல் திரையிலும் படம் துல்லியமான உள்ள போதிலும் திரையங்குகளில் உள்ள பிரமாண்டமான திரைகள் துல்லியமாக இல்லை. இதை மாற்றுவதற்காக 34 அடி அகலம் கொண்ட எல்.சி.டி டிஜிட்டல் திரையை சாம்சுங் உருவாக்கியுள்ளது. இந்த நிலையில் முன்பகுதி எல்.சிடி யாகவும் பின்பகுதி பிரகாசமான ஒளியினைத்தரும் எல்.சி.டியாகவும் இருக்கும்.

ஹைடைனமிக் ரேஞ்ச் என்ற இந்த வகை சாம்சுங்கின் சினிமா திரை டி.வி. போல இயங்கும்.  வண்ணங்களும் பளிச்சென தெரியும். இதை பயன்படுத்தும் திரையரங்குகளில் தனியாக டிஜிட்டல் புரொஜெக்டர் தேவையில்லை என்றும் சாம்சுங் நிறுவனம் கூறுகின்றது.

மலேசிய பிரதமர் நஜிப் ரசாக் நடிகர் ரஜனிகாந்தை அவரது வீட்டுக்கே சென்று சந்திந்திருக்கிறாரே? என்ன விசேஷம்?
ரஜனிதாசன் கொழும்பு

மலேஷிய பிரதமர் டத்தோ ஸ்ரீ முகம்மத் நஜீப் பின் அப்துல் ரசாக் கடந்த மாதம் அவரது மனைவி டதின் பதுகா செரி ரோஸ்மா மன்ரூருடன் இந்தியா வந்தார். 5 நாள் விஜயமாக இந்தியா வந்த அவர்கள் தஞ்சை தமிழ் பல்கலைக்கழகத்தின் பட்டமளிப்பு விழாவில் சிறப்பு விருந்தினராக கலந்து கொண்டனர். அதன்பின் டில்லி சென்று பிரதமர் மோடியையும் சந்தித்தனர்.

சென்னை வந்திருந்த போது ரஜனியை சந்திக்க மலேஷிய பிரதமர் நேரம் கேட்டிருந்தார். இதனையடுத்து சந்திப்புக்கு ஏற்பாடு செய்யப்பட்டிருந்தது.

ரஜனிகாந்த் நடித்த கபாலி திரைப்படத்தின் படப்பிடிப்பு மலேஷியாவில் நடைபெற்ற போது மலேஷிய பிரதமர் மலாக்கா ஆளுநர் ஆகியோர் ரஜனியை வரவேற்று விருந்தளிந்திருந்து குறிப்பிடத்தக்கது.
ஒருநாட்டின் பிரதமர் மற்றொரு நாட்டின் நடிகர் ஒருவரை அவரது வீட்டுக்கே சென்று பார்ப்பது என்பது ஒரு சாதாரண விடயமல்ல.
அதில் யார் யாருக்கு லாபம்? ரஜனியின் படங்கள் தனக்கு எந்த அளவுக்கு பிடிக்கும் என்பதை மலேஷியா பிரதமர் ரஜனியிடம் நேரிலேயே கூறிவைத்தார்.
“தலை சிறந்த நட்பார்ந்த மற்றும் மகிழ்ச்சியான நபரை சந்தித்ததில் மிகவும் மகிழ்ச்சி அடைகிறேன்” என்று ரஜனிகாந்தை பற்றி குறிப்பிட்டு நஜிப் தனது டிவிட்டர் பதிவில் குறிப்பிட்டுள்ளார்.

கபாலி திரைப்படம் தமிழில் மட்டுமில்லாமல் மலேஷியாவின் தேசிய மொழியான பாஹாசா பாசையிலும் வெளியானாதால் ரஜினி மலேஷியர்கள் அனைவருக்கும் நன்கு தெரிந்த நடிகராகி விட்டார். அதனால் இந்த சந்திப்பு மலேஷிய ஊடகங்களில் முக்கியத்துவம் பெறும். ரசாக்கின் அரசின் மேல் தற்போது அதிருப்தி நிலையிலுள்ள மலேஷியத் தமிழர்களிடம் ரசாக்கின் அரசு பற்றிய நல்லெண்ணத்தை ரஜனியுடனான சந்திப்பு ஏற்படுத்தக்கூடும். அத்துடன் இந்த சந்தர்ப்பத்தில் மலேசியர்களுக்கான இந்திய விசா கட்டணம் 145 சதவீதத்தால் அதிகரிக்கப்பட்டுள்ளது. இந்த விவகாரமும் அப்படியே அமுங்கிப் போகவும் வாய்ப்புள்ளது. அதுமட்டுமின்றி மலேஷிய இந்திய சமுதாயத்துக்கு உதவும்  வகையிலான நல்லெண்ண நடவடிக்கைகள் அறிவிக்கப்படவும் இது காரணமாகலாம். இதன் முதல் கட்டமாக மலேஷியாவும் அதிக அளவில் திரைப்படங்களையும் தொலைக்காட்சித் தொடர்களையும் உருவாக்க இந்திய திரைப்பட தயாரிப்பாளர்களுக்கு மலேஷியா அதிக வாய்ப்புகளை ஏற்படுத்தப் போவதாக அறிவித்துள்ளமை குறிப்பிடத்தக்கது.

இந்த அறிவிப்பை பார்க்கும் போது ரஜினி மற்றும் ரஞ்சித்தின் அடுத்த படத்தின் படப்பிடிப்பு மீண்டும் மலேஷியாவில் இடம்பெறக்கூடும் என்று தெரிகிறது. இவ்வளவு ஏன் ரஜினியின் அடுத்த படமொன்றின் படப்பிடிப்பு இலங்கையின் வவுனியாவில் நடந்தால் கூட ஆச்சர்யப்படுவதற்கில்லை.ரஜினி மற்றும் கமலின் நடிப்பு பசிக்கு குறிப்பிட்ட ஒரு நிறுவனம் தான் தீனி போடுகிறது. அந்த நிறுவனம் நினைத்தால் அது சாத்தியம்.
ரஜினியிடம் என்ன இருக்கிறது? ஏதோ இருக்கிறது என்பது மலேஷிய அரசியல் வாதிகளுக்கு தெரிகிறது. ஆனால் இலங்கை இந்திய அரசியல்வாதிகளுக்கு அது தெரியவில்லையா? அல்லது செல்வாக்கோ பெருமையோ ரஜனிக்கு போகக்கூடாது அது தங்களுக்கே வரவேண்டும் என்று அவர்கள் நினைக்கிறார்களா? 

பாகுபலி முதலாம் பாகம் சாதனை படைத்ததைப் போல் இரண்டாம் பாகமும் சாதனை படைக்குமா?
கவிதா,பாதுக்க

நிச்சயம் படைக்கும் அந்த எதிர்ப்பார்ப்போடு தான் 3 நாட்களுக்கு முன்திரைக்கு வந்திருக்கிறது பாகுபலி 2.
பாகுபலி 2 தொடர்பான சில ருசிக்கதைகள்.
பாகுபலி 2 இல் பிரமாண்டமான சண்டைக்காட்சி பிரதானம். அந்த ஒரு காட்சியின் கிரபிக்ஸ்களுக்கு மட்டும் சுமார் 6 மாதம் பணியாற்றியுள்ளனர்.
பாகுபலி 2 இல் போர்க்களக்காட்சிகள் போக மீதமுள்ள காட்சிகள் அனைத்தும் செட்டில் எடுக்கப்பட்டவைகள்தான். பாகுபலி 1,பாகுபலி 2 என மொத்தமாக 613 நாட்கள் படப்பிடிப்பு நடத்தியுள்ளனர்.
பாகுபலியின் இரண்டு பாகங்களையும் மொத்தமாகப் படமாக்கிவிட்டு முதல்பாகம் முடிந்தவுடன் 2 ஆம் பாகத்துக்கான இறுதிக்கட்ட பணிகளைச் செய்யலாம் என்ற முடிவுக்குப்பின்னரே படப்பிடிப்பு ஆரம்பிக்கப்பட்டது. ஆனால் பணப்பற்றாக்குறையால் முதல்பாகத்தை வெளியிட்டு அதற்குப்பின் 2 ஆம் பாகத்துக்கான சண்டைக்காட்சிகளை படமாக்கியிருக்கின்றார்கள்.முதல் பாகத்துக்கான காட்சிகளை படம் பிடித்து விட்டார்களாம்.
இந்தியாவில் ‘தூம் 4’ ‘பேஸ் பேஸ்’ ஆகிய படங்களை தொடர்ந்து பாகுபலி 2 படத்தை ஐ மேக்ஸ் திரையரங்குளில் வெளியிட்டுள்ளனர்.

Thursday, April 27, 2017

இருள் உலகக் கதைகள்

முத்து பூசாரி சொன்ன பேய்க் கதை

கேட்டு எழுதுபவர்:  மணி ஸ்ரீகாந்தன்.

ஹவத்தை,நிவித்திகலையை அண்மித்திருக்கும் ஒரு தோட்டப்பகுதி. தேயிலையும்,இறப்பரும் செழித்து வளர்ந்திருந்த பகுதியில் தற்போது ஏற்பட்டிருக்கும் கடும் வரட்சியின் காரணமாக தேயிலைச் செடிகள் வாடிப்போய்  கிடந்தன.
செடிகளுக்கு நீர் ஊற்றினால்தான் மிச்சம் இருப்பதையாவது காப்பாற்றலாம் என்பதை உணர்ந்த தோட்ட நிர்வாகம், அன்று அரை நாள் விடுப்பு கொடுத்து செடிகளுக்கு நீர் ஊற்றும்படி பணித்திருந்தது.தோட்டத் தொழிலாளியான வனஜாவும் செடிகளுக்கு நீர் ஊற்றும் பணியில் மும்முரமாக ஈடுப்பட்டிருந்தாள்.
நீர் பாய்ச்சும் வேலை முடிவடைந்ததும், தமது ஊர் காக்கும் மாரியம்மனுக்கு நீர் ஊற்றி மழை வேண்டி பிராத்தனை செய்யவும் சில பெண்கள் மாரியம்மன் கோயிலை நோக்கி நடந்தார்கள்.
மாரியம்மன் பக்தையான வனஜாவும் முதல் ஆளாக குடத்தோடு நடந்தாள்.கோயிலை அண்மித்திருக்கும் சிறு ஓடையில் பெண்கள் அனைவரும் குளிப்பதற்காக இறங்கினார்கள்.

குளித்து முடித்த வனஜா துவாயை எடுத்து தலையை துடைத்துவிட்டு, இருகரங்களாலும் துவாயின் இருமுனைகளிலும் பிடித்து தனது நீண்ட தலைமயிரை பலம்கொண்ட மட்டும் அடித்து துடைத்தாள்.அப்போது யாரோ பின்னாலிருந்து படார் என்று தனது கன்னத்தில் அடித்தது போலிருக்க நிலை தடுமாறிய வனஜா ஆ….ன்னு கத்திவிட்டு என்ன நடந்தது என்று பார்த்தபோது தனது காதிலிருந்து இரத்தம் வடிவதை பார்த்தவள், பதறிப்போனாள்.
தலைமயிரை துவாயால் பலமாக அடித்தப்போது காதில் இருந்த கம்மல் சிக்குப்பட்டு காது அறுந்து போயிருந்தது. இரத்தம் வடிவதையும் பொருட்படுத்தாத வனஜா கீழே விழுந்த கம்மலை தேடுவதில் பரபரப்பானாள்.
காது அறுந்து வனஜாவின் தங்கக் கம்மல் தொலைந்துபோன செய்தி பரவ அந்த ஓடையின் அருகே கூட்டம் கூடி அந்தப் பற்றைக்காட்டுப் பகுதியை சல்லடைப் போட்டு தேடியும் கம்மல் கிடைக்கவில்லை.
வனஜா அரைப்பவுண் மதிப்புள்ள கம்மல் தொலைந்ததில் பித்து பிடித்தவள் மாதிரி புலம்பத் தொடங்கினாள்.

தனது குலதெய்வத்திடம் நேர்த்திவைத்தவள் புலம்பியப்படி வீடு நோக்கி நடந்தாள்.அன்றிரவு படுத்தவள்தான் மறுநாள் விடிந்தபோது வனஜா மாறிப்போயிருந்தாள்.சகித்துக்கொள்ள முடியாத கெட்ட வார்த்தைகளால் தமது பிள்ளைகளையும், கணவனையும் திட்டத் தொடங்கினாள்.தனக்கு தானே பேசி சிரித்தும் கொண்டாள்.
முத்து பூசாரி
தங்கக் கம்மல் தொலைந்து போனதில் வனஜாவுக்கு பைத்தியம் பிடித்துவிட்டது என்றும்,காத்து கருப்பு அண்டிவிட்டது என்றும் தோட்டம் முழுவதும் செய்தி காட்டுத் தீயாக பரவிப்போனது.
வனஜாவின் நிலைமை நாளுக்கு நாள் மோசமாகி வருவதால், அவளின் குடும்பத்தினர் வனஜாவை குணப்படுத்த ஒரு மாந்திரீகரை தேடினார்கள்.
கஹவத்தை பகுதியில் பிரபல பூசாரியாக இருக்கும் முத்து பூசாரியே வனஜாவுக்கு வைத்தியம் பார்க்க களத்தில் இறங்கினார். பேய்களை விரட்டுவதில் ஜெகஜால கில்லாடியான முத்துவுக்கு இது சவாலான விடயமாகத்தான் இருந்தது.

வனஜாவின் வீட்டுக்குள் நுழையும்போது இது ஏதோ மனநோய் இலகுவாக முடித்துவிடலாம் என்று அசால்ட்டாக நினைத்தார்.
ஆனால்,முத்து மந்திரங்களை உச்சாடனம் செய்தபோது அவர் மனக்கண்ணில் கண்ட காட்சி அவரை குலை நடுங்கச் செய்தது.
வனஜாவுக்கு அம்மன் கோயில் ஓடையில் நடந்த சம்பவங்களை,பேய் விரட்டை வேடிக்கை பார்க்க கூடியிருக்கும் மக்கள் முன்னிலையிலேயே பூசாரி விபரிக்கத் தொடங்கினார்.

அமாவாசை இரவை வரவேற்கத் துடித்துக் கொண்டிருக்கும் அந்த மாலை வேளையில்தான் வனஜா ஓடையில் குளித்துவிட்டு தலையை துவட்டிக்கொண்டிருந்தாள்.
அப்போது தூரத்தில் ஒரு காட்டு முருங்கை மரத்தில் தலைவிரி கோலமாக அமர்ந்திருந்த ஒரு கரிய உருவம் வனஜாவை வைத்தக்கண் வாங்காமல் பார்த்துக்கொண்டிருந்தது.
நேரம் பார்த்து காத்திருந்த அந்த உருவம் வனஜா தலைமயிரை  துவாயால் அடித்து துவட்டும் அந்த நேரத்தில் திடீரென்று பாய்ந்து
அவளின் தலையை பிய்த்துப்போட எத்தனித்த அந்த திகில் நிமிடங்களில்தான் வனஜாவின் கம்மல் அறுத்தெறியப்பட்டிருக்கிறது.பக்கத்தில் அம்மன் கோயில் இருந்ததால் அந்த தீய சக்த்தியின் கொலை முயற்சி பலிக்காமல் போய்விட்டது. ஆனாலும் வெறி அடங்காத அந்த தீய சக்தி வனஜாவின் உடம்பில் இறங்கி இருக்கிறது. இப்போது ரெஸ்ட் எடுக்கிறது.
ஆனாலும் அதன் கொலை வெறி அடங்கவில்லை. நேரம் பார்த்து காத்திருக்கிறது. என்று முத்து பூசாரி சொன்ன விடயங்களை கேட்டு அந்த ஊர் மக்கள் திகைத்துப் போனார்கள்.

“ஆனாலும் நான் அந்த தீய சக்திக்கு நேரத்தை கொடுக்கப்போவதில்லை. அதன் கதையை முடித்து இப்போதே சங்கறுக்கிறேன்.” என்று முத்து பூசாரி ஆவேசமாகக் கத்தினார். சாட்டையை சுழற்றி வனஜாவின் மீது சுளீர் என்று ஒரு போடு போட்டார்.
அடித்தாங்க முடியாமல் ஆடிப்போன அந்த தீய சக்தி ‘அய்யோ……என்னைக் கொல்லாதே!!’ என்று அவலக்குரல் எழுப்பியது.

“யார் நீ இங்கே எதுக்கு வந்தே”என்று பூசாரி மிரட்டும் தொனியில் கேட்டப்போது, நடுக்கத்துடன் பதில் சொன்ன அந்த தீய சக்தி
“நான் செத்துப்போய் இப்போ நூறு வருசமாகுது என் பொண்டாட்டி எனக்கு சோற்றில் விஷம் வச்சு என்னைக் கொன்னுட்டா. அதனால நான் இத்தனை வருசமா அவளை என் கையால கொல்லனும்னு வெறியோட திரிஞ்சிக்கிட்டிருந்தேன். ஆனா என் துரதிஷ்டம் அந்த சண்டாளி நெஞ்சடைப்புல செத்து தொலைஞ்சுட்டா. ஆனாலும் என் வெறி அடங்கல அதனால காட்டு முருங்கை மரத்துலயே இத்தனை வருசத்தையும் வன்மத்தோடயே கழிச்சிட்டேன்.அப்போதான் ஒரு நாள் என் பொண்டாட்டி மாதிரி இருக்கிற வனஜா  குளிக்க வந்ததை பார்த்தேன். அந்த நிமிசமே கொலை வெறியோட பாய்ந்து அவளோட தலையை பிய்ச்சு வீச முயற்சி செய்தேன். ஆனா ஊர்காக்கும் அம்மன் என்னோட திட்டத்தை தடுத்திருச்சி.அதுக்கு பிறகுதான் வனஜாவோட உடம்புக்குள்ள இறங்கிட்டேன்” என்று தீய சக்தி சொன்னதைக் கேட்ட முத்து எகத்தாளமாக “சரி உன்னோட இரத்த பசிக்கு தீனீயாக ஒரு கோழியைத் தருகிறேன்.அதை தின்று உன்னோட கொலை வெறியை அடக்கிக்கொண்டு ஓடிவிடு” என்று எச்சரித்த பூசாரி ஒரு கோழியை நீட்டியப்போது அதை லபக்கென்று வாங்கிய தீய சக்தி கண் இமைக்கும் நேரத்துக்குள் அந்த கோழியின் கழுத்தை கடித்து இரத்தத்தை குடித்துவிட்டு தரையில் விழுந்தது’ இச்சந்தரர்ப்பத்தைப் பயன்படுத்தி தீய சக்தியை லாவகமாக பிடித்து போத்தலுக்குள் போட்ட பூசாரி, “உடனே அந்த ஓடைக்கு பக்கத்தில இருக்கிற காட்டு முருங்கை மரத்தை வெட்டி சாயுங்கள்” என்று உத்தரவிட்டார். பின்னர் நான் இந்த போத்தலை முச்சந்தியில் போட்டு எரித்து விட்டு வருகிறேன்”என்று சொன்னவர், வெற்றிப்புன்னகையோடு முச்சந்தி நோக்கி நடந்தார்.

face பக்கம்

Monday, April 10, 2017

ஸ்ரீ விக்கிரம இராஜசிங்கன் காலத்தில்…

1816ஆம் ஆண்டு ஜனவரி 24ம் நாள் மாலை. அந்த அந்திவேளையில் கொழும்புவில் இன்றைய சிலிங்கோ கட்டிடம் இருக்கும் இடத்திலிருந்த  சிறையினுள் அடிபட்ட புலிபோல் அங்குமிங்குமாக உலாவிக்கொண்டிருந்தான் ஸ்ரீ விக்கிரம ராஜசிங்கன். இவன் மதுரை நாயக்க குலத்தைச் சேர்ந்த தமிழ் மன்னன். இவனது இயற்பெயர் கண்ணுசாமி.
ஒரு வருடத்துக்கு முன் அவன் வாழ்ந்த வாழ்க்கையையும் இன்றுதான் இருக்கும் நிலையினையும் நினைத்து நினைத்து அவன் எத்தனையோ நாட்கள் உறக்கமின்றிக் கழித்திருக்கிறான்.
கொழும்பு சிலிங்கோ கட்டிடத்திற்கு அருகில்
இருக்கும் கண்டி மன்னனின் நினைவுச் சின்னம்
இந்த இடத்தில்தான் மன்னன்
சிறைவைக்கப்பட்டிருந்தாராம்
புகழ்பெற்ற கண்டி ராஜதானியயை கட்டி ஆண்ட காலத்தையும், பிரித்தாளும் பிரித்தானியர் தனது அதிகாரிகளைக் கையில் போட்டுக்கொண்டு கண்டிமீது படையெடுத்து வந்ததையும் தனது பட்ட மகிஷிகளுடன் மெத மகா நுவரைக்கு தப்பியோடிய நிகழ்ச்சியையும் அங்கு மலைக்குகையொன்றினுள் மறைந்து வாழ்ந்ததையும் எஹலப்பொளையின் கையாட்கள் 1815 ஆம் ஆண்டு பெப்ரவரி 19ம் நாள் சிறைப்பிடித்த நிகழ்ச்சிகளும் அவன் சிந்தனையில் ஒன்றின் பின் ஒன்றாக ஓடி மறைந்தன. எஹலப்பொளையின் கையாளான எக்னெலிகொட தன் குரோதத்தைத் தீர்த்துக்கொள்ள தன்னைக் கயிற்றால் கட்டி வீதியில் இழுத்துச் சென்றதை நினைத்தபோது அவன் ரத்தம் கொதித்தது. இக்காட்சியைக் கண்ட ஆங்கிலேய தளபதி டொயிலி உடனடியாக என்னெலிகொடையைக் கண்டித்து தனக்குரிய ராஜ மரியாதையை அளித்ததை எண்ணி எதிரியின் சிறந்த குணத்தினையும் தன் சொந்த மக்களின் அற்ப புத்தியையும் ஒப்பிட்டுப் பெருமூச்செறிந்தான்.

எல்லாவற்றுக்கும் மேலாக இன்று இலங்கை மக்களை விட்டே அவனைக் கப்பலேற்ற வெள்ளையர் ஆட்சி துணிந்து விட்டதை எண்ணி அவன் வெதும்பினான். ஸ்ரீ விக்கிரமராஜசிங்கனை நாடு கடத்தும் திட்டம் மிக மிக இரகசியமாக லண்டனில் பைட் ஹோலிலுள்ள காலனி ஆட்சி அலுவலகத்தோடு தொடர்புகொண்டு ஒழுங்கு செய்யப்பட்டது. அதற்கான நாளாக 1816 ஆம் ஆண்டு ஜனவரி 24ம் நாள் என தேதியும் குறிப்பிடப்பட்டு இதனைச் செய்து முடிக்க இளம் சிவில் சேவை அதிகாரியான கிறான்விலியும் நியமிக்கப்பட்டான். இந்தச் சோக நாடகத்தின் கதா நாயகனான ஸ்ரீ விக்கிரமராஜசிங்கனுக்கோ இந்த ரகசியத் திட்டம் ஏற்கனவே தெரிந்திருந்தது. தெரிந்தும் என்ன பயன்? தான் இனி எக்காலத்திலும் இலங்கை திரும்ப முடியாதென்பதை உணர்ந்திருந்தான். எனவே தோல்வியையும் தனக்கே உரிய கௌரவத்துடன் ஏற்றுக்கொள்ள அவன் சித்தமானான்.
மன்னரை கட்டிவைத்திருக்கும்
எக்னெலியகொட மற்றும் மன்னருக்கு
மரியாதை செய்யும் ஆங்கில
அதிகாரிகளையும் இந்தப் படம் சித்தரிக்கிறது.
அரசன், அவனது நான்கு அரசிகள், தாயார் மற்றும் நெருங்கிய உறவினர்களான அறுபது பேரை கொழும்பிலிருந்து தென்னிந்தியாவிலுள்ள வேலூர் சிறைக்குக் கொண்டுசெல்லப்பட வேண்டுமென்று கிறான்விலிக்கு உத்தரவிடப்பட்டிருந்தது.

சிறையிலிருந்து ஸ்ரீ விக்கிரமராஜசிங்கனையும் அவனது குடும்பத்தினரையும் ஏற்றிக்கொண்டு கடற்கரைக்குச் செல்ல அன்றைய கவர்னராயிருந்த சேர். றொபேர்ட் ஆறு    குதிரைகள் பூட்டிய அலங்கார வண்டியைக் கொடுத்துதவ முன்வந்தான். கைதியாக தம் பாதுகாப்பில் இருந்தாலும் அரசனுக்குரிய கௌரவம் எல்லாம் ஸ்ரீ விக்கிரம ராஜசிங்கனுக்கு அளிக்கப்பட வேண்டுமென்று அவன் கட்டளையிட்டிருந்தான்.

வில்லியம் கிறான் விலி, மன்னன் ஸ்ரீ விக்கிரம ராஜசிங்கன் தங்கியிருந்த சிறைக்குச் சென்ற போது அவனுக்கு அங்கு ஓர் அதிர்ச்சி காத்திருந்தது. ஆட்சியைப் பறிகொடுத்த மன்னனைக் காண்பதற்குப் பதிலாக அங்கே தன் அரச உடுப்புகளுடன் வழக்கமான ராஜ கம்பீரத்தோடு நின்ற ஸ்ரீ விக்கிரம ராஜசிங்கனைக் கண்டதும் அவன் ஒருகணம் அதிர்ந்தே போய்விட்டான்.
கேணல் கென் என்ற பிரிட்டிஷ் அதிகாரியும், கண்டி மாவட்ட அதிகாரியான ஜோன் சதலண்ட் என்பவனும் இருபக்கமும் இருக்க, பிரசித்தி பெற்ற கண்டியரசனின் இலங்கையை விட்டு அகலும் இறுதிப் பயணம் ஆரம்பமாகியது. அவனது பட்ட மகிஷிகள் வேறு ஒரு வண்டியில் பின்னால் சென்றார்கள். பிரயாணத்தின் ஒரு கட்டத்தில் அரசனும் அவனது பரிவாரங்களும் சென்ற குதிரை வண்டிகள் சுங்க அலுவலகத்தின் ஒரு மேல்மாடிக் கட்டடத்தைக் கடந்து செல்ல வேண்டியிருந்தது.
அரசனின் நாடுகடத்தலை எப்படியோ அறிந்து கொண்ட வெளிநாட்டுப் பிரயாணிகள் பலர் அக்கட்டடத்தின் மேல்மாடியில் வந்து குவிந்துவிட்டனர். இதனைக் குதிரை வண்டியிருந்தே கவனித்த ஸ்ரீ விக்கிரம ராஜசிங்கன் குதிரை வண்டிகளை உடனடியாக நிறுத்தும்படி கட்டளையிட்டதோடு மேல்மாடியிலிருக்கும் பிரயாணிகள் அத்தனைபேரும் கீழே இறங்கி வாந்தாலன்றி தன் குதிரை வண்டியை அக்கட்டடத்தின் கீழாகச் செலுத்தக் கூடாதென்று கண்டிப்பாகக் கட்டளையிட்டான்.

வில்லியம் கிறான்விலியும் ஏனைய பிரிட்டிஷ் அதிகாரிகளும் இதனைக் கண்டு அதிர்ச்சியடைந்துவிட்டனர். கைதியாக இலங்கையை விட்டே நாடு கடத்தப்படும் நிலையிலும்    ஸ்ரீ விக்கிரமராஜசிங்கனுடைய துணிவையும் வீரத்தையும் கண்டு அவர்கள் ஆச்சரியம் அடைந்தனர். உடனடியாக அக்கட்டடத்தின் மேல்மாடியிலிருந்த பிரயாணிகளெல்லாரையும் கீழே இறங்கி விடும்படி உத்தரவிடப்பட்டது. இதன்பின்பே அரசனின் அனுமதியின்படி குதிரை வண்டி அக்கட்டடத்தைத் தாண்டி மேலே சென்றது.

அன்றைய நாட்களில் கொழும்பில் துறைமுகம் என்று ஒன்று இருக்கவில்லை. பெரிய கப்பல்களெல்லாம் அந்நாட்களில் நடுக்கடலில் நங்கூரமிடப்பட்டு படகுகள், தோணிகள் மூலமே பிரயாணிகள் கப்பலுக்குச் செல்ல வேண்டியிருந்தது. எனவே சில படகுகள் மன்னனையும் அவனது பட்டமகிஷிகளையும் ஏனைய நாயக்க வீரர்களையும் உறவினர்களையும் ஏற்றிக்கொண்டு கப்பலை நோக்கி விரைந்தன. கடற்பிரயாணத்தை மேற்கொள்ளாத அரசிகளும் அவர்களது உறவினர்களும் கப்பலைச் சென்றடைய முன்னமே மயக்கமுற்று சோர்ந்து வீழ்ந்தனர். கப்பலில் ஏறவே சோர்வுற்றிருந்த அவர்கள் ஆசனங்களில் வைத்து மேலே கப்பலுக்கு எடுக்க வேண்டியேற்பட்டது.
சிறைவைக்கப்பட்டிருந்த இடம்.
(கொழும்பு-சிலிங்கோ)
மன்னனுடன் பிரயாணஞ் செய்த பல வீரர்கள் ஏனைய கப்பல் சிப்பந்திகளின் உதவியுடனேயே கப்பலேற்றப்பட்டனர்.
ஆனால் ஸ்ரீ விக்கிரம ராஜசிங்கனோ எந்தவிதமான உதவியும் தனக்குத் தேவையில்லையென்றுகூறி, தனக்கே உரிய வீர நடையுடன் சென்று கப்பலேறினான். கப்பல் பயணத்துக்கு பரிச்சயமற்ற அவன் அன்று நடந்து கொண்டவிதம் பலரை ஆச்சரியத்திலாழ்த்தியது. கப்பல் மேல்தளத்தை அவன் அடைந்ததும் பாண்ட் வாத்தியங்கள் முழங்கின. கடற்படை கப்பல்களுக்கு மன்னர்கள் விஜயம் செய்யும்போது அளிக்கப்படும் ராஜ மரியாதைகள் அனைத்தும் அங்கே அளிக்கப்பட்டு கடற்படை வீரர்கள் அணிவகுப்பு மரியாதையும் தரப்பட்டது.

கப்பலின் மேற்தளத்தில் நின்றவாறே தூரத்தே தெரியும் தன் தாயகத்தை ஒருகணம் உற்றுநோக்கினான். அமைதியாக தன் பட்டமகிஷிகள் பின்வர கப்பலில் தனக்கொதுக்கப்பட்ட அறைக்குச் சென்ற ஸ்ரீ விக்கிரம ராஜசிங்கன் திரையை இழுத்து மூடிக்குகொண்டு அதன் பின்னே தன் உணர்ச்சிகளை அடக்கி கொண்டான். நிறைவேறாத ஆசையுடன், பின்னர் இந்திய மண்ணில் மடிந்துபோன அவனைச் சுமந்துகொண்டு, கப்பல் தனது பிரயாணத்தைத் தொடங்கியது. முடி மன்னன் ஆட்சியின் கடைசிச் சின்னமும் அக்கப்பலோடு இலங்கையை விட்டு அகன்றது.

இரா.கனகரத்தினம்
கண்டியில் இருந்து
வெளியான
'செய்தி' இதழில்
எழுதியது.
வெளியான திகதி
1-2-1969

Saturday, April 8, 2017

கீர்த்தி ஸ்ரீ இராஜசிங்கன் காலத்தில்…

ண்டி இராசதானியை 1747 முதல் 1782 வரை கீர்த்தி ஸ்ரீ இராஜசிங்கன் ஆட்சி செய்தான். இலங்கையின் வரலாற்றில் இம்மன்னன் பௌத்த சமயத்திற்காக ஆற்றிய அளப்பரிய பணிகள் பற்றிய சிறப்பான குறிப்புகள் இடம்பெற்றுள்ளன. பௌத்த விகாரைகளில் காவியுரை தரித்து – துறவறம் பூணாதவர்கள் பிக்குகளாக விளங்கினர். விகாரைகளின் சொத்துக்களைக் கொண்டு தமது மனைவி பிள்ளைகளையும் உறவினர்களையும் பேணியதோடு வசதியான வாழ்க்கையை இவர்கள் மேற்கொண்டனர்.

அக்கால கட்டத்தில் திபெத் நாட்டிலிருந்து அசல் பௌத்த பிக்குமார்களை அழைத்து இங்குள்ளவர்களை முறைப்படி சடங்கு சம்பிரதாயங்களுடன் பிக்குகளாக மாற்றுவதற்கான (உப்ப சம்பதாவ) நடவடிக்கைகளை மேற்கொண்டவன் கீர்த்தி ஸ்ரீ இராஜசிங்கனே. அழிவடைந்த விகாரைகளை புனரமைப்பு செய்தும் புதிய விகாரைகளை நிர்மாணித்தும் கீர்த்தி ஸ்ரீ இராஜசிங்கன் ஆற்றிய பணிகள் ஏராளம். பல விகாரைகளின் சுவரோவியங்களில் இம்மன்னனின் உருவம் பொறிக்கப்பட்டுள்ளமையை இன்றும் காணலாம்.

மேற்படி சுவரோவியங்களின் மூலம் இம்மன்னனின் உருவ அமைப்பினை நாம் புரிந்து கொள்ளக்கூடியதாக இருக்கின்றது. முகத்தில் அடர்ந்த தாடியுடன் கூடிய கருமையான அதிக உயரமற்ற பருத்த தோற்றமுள்ளவனாக இம்மன்னன் இருந்துள்ளதை அறிந்து கொள்ளலாம்.

இம்மன்னன் பற்றிய பல்வேறு வரலாற்றுச் சம்பவங்களைக் குறிப்பிடும் கதைகள் சிங்கள மக்கள் மத்தியில் பரவலாக இன்றும் உலாவி வருகின்றன.

கீர்த்தி ஸ்ரீ இராஜசிங்கன் தென்னிந்திய நாயக்கர் பரம்பரையைச் சேர்ந்த பெண்ணை முறைப்படி மணம் புரிந்தான். அத்தோடு இந்நாட்டுச் சிங்கள பெண்கள் பலரை தனது அந்தப்புரத்தில் குடியமர்த்தியிருந்தான். இவர்களில் பெரும்பாலானவர்கள் அக்காலகட்டத்தில் அரண்மனைக்குப் பெண்களை ஏற்பாடு செய்து கொடுக்கும் கண்டியை அண்மித்த 'அத்தரகம' என்னும் கிராமத்து பிரபுக்களின் குடும்பங்களைச் சேர்ந்தவர்களாகும்.

மன்னன் குதிரைச் சவாரி மேற்கொள்வதில் பெரும் விருப்பம் கொண்டவனாக இருந்தான். ஒருநாள் இராஜசிங்கன் குதிரை மீதேறி கண்டி 'மெனிக்ஹின்ன' பிரதேசத்தினூடாக 'வளல்ல' என்னும் கிராமத்திற்குள் சென்று கொண்டிருந்தான். அவ்வேளை அந்தக் கிராமத்தின் பிரபுத்துவ குடும்பத்தைச் சேர்ந்த அழகிய தோற்றம் கொண்ட ஒரு பெண் மன்னனின் பார்வையில் பட்டாள். இந்த வளல்ல கிராமமும் அரசனின் அந்தப்புரத்திற்கு அழகிய பெண்களை அனுப்பி வைக்கும் ஓர் ஊராகும். வாலிபப் பருவத்தினைக் கொண்ட கீர்த்தி ஸ்ரீ இராஜசிங்கன் எவ்விதத்திலாவது இப்பெண்ணையும் அடைந்துவிட வேண்டுமென ஆவலுடன் அடிக்கடி மாறுவேடமணிந்து குதிரை மீதேறியும், கால்நடையாகவும் வளல்ல கிராமத்துக்குள் சென்று வருவதை வழக்கமாகக் கொண்டான்.

இவ்வாறு மாதத்திற்கு இரு தடவைகளாவது கிராமத்திற்குள் வந்துபோகும் தெரியாத நபர் பற்றி கிராமத்தவர்கள் மத்தியில் சந்தேகம் ஏற்படத் தொடங்கியது. குறிப்பிட்ட இளம் பெண்களை அடிக்கடி சந்தித்துச் செல்லும் மனிதனுக்கு தக்க பாடம் புகட்ட நினைத்த சிலர், அப்பெண்ணின் வீட்டுக்குச் செல்லும் குறுக்குப் பாதையின் நடுவே குழியொன்றைத் தோண்டி அதற்குள் கூரிய கோல்களை நாட்டி இலை தழைகளால் இக்குழியை மூடி வைத்தனர்.

ஒருநாள் பொழுது சாய்ந்து இரவு கிராமத்தை ஆட்கொண்ட வேளையில் தனது கள்ளக் காதலியைச் சந்திப்பதற்காக அரசன் அப்பெண்ணின் வீட்டுக்குச் செல்லும் குறுக்குப்பாதை வழியே வந்து கொண்டிருந்தான். அவன் வரப்போகும் நேரத்தை அப்பெண் நன்கறிவாள். எனினும் இரகசிய காதலின் காரணமாக அவள் வீட்டுக்குள் அமைதியாக மன்னனை எதிர்பார்த்து வழிமேல் விழிவைத்துக் காத்திருந்தாள்.

இருள் சூழ்ந்திருந்த படியால் குறுப்பாதையின் குறுக்கே படுகுழியொன்று இருப்பதை மன்னன் அறியவில்லை. காலோசைபடாது தடம்மீது தடம்பதித்து நடந்து வந்த மன்னன் பொய்க்குழிமீது கால் வைத்து குழிக்குள் தொப்பென வீழ்ந்தான். குழிக்குள் வைப்பட்டிருந்த கூரிய மர ஈட்டிகள் மன்னனின் உடலைப் பதம்பார்த்தன. செய்வதறியாது அபயக்குரல் எழுப்பினான் அரசன்.

உதவி கேட்டு எழுப்பப்பட்ட ஓலமறிந்த ஊர்மக்கள் குரல் வந்த திசை நோக்கி ஓடிவந்தனர். படுகுழிக்குள் விழுந்து இரத்தம் சிந்தியவாறு அவதியுறும் இளைஞனை குழியிலிருந்து மீட்டு சிகிச்சையளித்தபோது மாறு வேடமணிந்து ஊர்வலம் வந்திருப்பது தமது மன்னனென அம்மக்கள் புரிந்து கொண்டனர். உடனடியாக அரண்மனைக்கு தகவலனுப்பி பல்லக்கொன்றை கொண்டுவந்து மன்னனை கவனமாக அதில் அமர வைத்து அனுப்பி வைத்தனர். காயப்படுத்துதல், துன்புறுத்துதல் என்ற சொற்களை 'ஹதி' எனவும் சிங்களத்தில் குறிப்பிடலாம். மன்னனை துன்புறுத்தியதால் இக்கிராமம் 'ஹதி வலல்ல' என பெயர் பெற்றது. தனக்கு தண்ணடனை வழங்கிய அவ்வூர் மக்களை பழிவாங்கும் முயற்சிகளில் மன்னன் ஈடுபடவில்லை. சில மாதங்களில் மன்னன் கள்ளத்தனமாக சந்தித்த அக்காதலியை ஊரறிய ஊர்வலமாக அந்தப்புரத்திற்கு அழைத்து வந்தான் அரசன் கீர்த்தி ஸ்ரீ இராஜசிங்கன்.
இவ்வாறு கண்டி அரண்மனையின் அந்தப்புரம் அழகிய பெண்களால் நிரம்பியிருந்ததாக வரலாறு கூறுகிறது.

 சி.கே.முருகேசு

நன்றி. வண.நாலந்தே விமலவன்ச தேரோ எழுதிய 'உடரட்ட ஜனஸ்ருதி' என்ற நூலை ஆதாரமாக வைத்து எழுதப்பட்டது.

Friday, April 7, 2017

ஸ்ரீ விக்கிரம ராஜசிங்கன் காலத்தில்..

1815 ஆம் ஆண்டு வரையிலும் அந்நியரின் ஆக்கிரமிப்புக்குட்படாது தனது இறைமையைப் பேணிப் பாதுகாத்து வந்த மத்திய மலைநாட்டு கண்டி இராச்சியத்தின் வரலாற்று சின்னமாகத் திகழும் கண்டி (போகம்பரை) வாவியை நிர்மாணித்தவர் தேவேந்திரன் என்ற சிற்பி. 'கிரி முவுத' (பாற்கடல்) எனப்படும் இவ்வாவிக்குள் தேவேந்திரன் பாய்ந்து தற்கொலை செய்து கொண்டதாக ஒரு கதை உள்ளது.

இலங்கைத் தீவின் தென்முனைப் பட்டினம் தேவேந்திரமுனை (தெவிநுவர) என அழைக்கப்படுகின்றது. இலங்கையின் வடக்கே திருக்கேதீஸ்வரம், நகுலேஸ்வரம் என்ற திருத்தலங்களும், மேற்கே முன்னேஸ்வரமும், கிழக்கே கோணேஸ்வரமும், சிவாலயங்களாக எழுந்து நிற்கின்றன. இதேபோல தேவேந்திர முனையில் புராதன சிவாலயம் ஒன்று அமைந்திருந்தது. ஐரோப்பியர்களின் வருகையின் பின்னர் அழிக்கப்பட்ட இவ்வாலயத்தின் இடிபாடுகளையும் சேதமுற்ற சிவலிங்கத்தையும் இன்றும் காணலாம். இப்பிரதேசத்தில் வாழ்ந்த இந்திய வம்சாவளி தமிழ் பெண்ணின் மகனே கண்டி இராச்சியத்தின் ஆஸ்தான சிற்பியாக விளங்கிய தேவேந்திரன்.
கொத்மலைப் பிரதேசத்தைச் சேர்ந்த பிரபலமான சிற்பியொருவனை மேற்படி தமிழ்ப்பெண் மணமுடித்து அவர்களின் மகனாகிய தேவேந்திரனுடன் கொத்மலை பிரதேசத்தில் குடியேறினாள். ஐவகையான சிற்பக் கலைகளைக் கற்று தேர்ந்தவர்களுக்கு மட்டுமே வழங்கப்படும் 'மூலாச்சாரி', பெருந்தச்சன், என்னும் பட்டம் பெற்று தேவேந்திர பெருந்தச்சன் என பிரபலமானான். கொத்மலை – மடக்கும்புறவில் காணப்படும் அம்பலம் இவனது முதலாவது நிர்மாணமாகும்.

கண்டி மன்னர்களாகிய இராஜாதி ராஜசிங்கன், ஸ்ரீ விக்கிரம சிங்கன் (1782 – 1815) ஆகியோரின் ஆட்சிக்காலத்தில் அரச சேவையில் ஈடுபட்ட தேவேந்திரனின் தலைசிறந்த நிர்மாணப் பணிகளாக கண்டியில் அமைந்துள்ள 'மகுல் மடுவ' எனப்படும் மண்டபமும், தலதா மாளிகையருகில் உருவாக்கப்பட்ட 'பத்திருப்பு' மண்டபமும் 'உல்பென் கெய' (நீர் சேகரிப்பு அறை), மாளிகையைச் சூழவுள்ள அகழி, அதனைச் சுற்றி அமைந்துள்ள அழகிய மதில் (வலாக்குலு பெம்ம) தற்போது கண்டி வாவியென அழைக்கப்படும் பாற்கடல் (கிரிமுவுத) அதன் நடுவே அமைந்துள்ள கோடை மாளிகை (கிரீஸ்ம மாளிகாவ) என்பன குறிப்பிடத்தக்கன.

தேவேந்திரனுக்கு இரண்டு புதல்விகள் இருந்தனர். சிற்பி தினசரி உடுநுவரையிலிருந்து கண்டி அரண்மனைக்கு வருவது வழக்கம். மன்னன் ஸ்ரீ விக்கிரம இராஜசிங்கன் தலதா மாளிகையில் தேவேந்திரனைக் கொண்டு புனரமைப்புகள் பலவற்றை மேற்கொண்டான். மன்னன் மக்களைச் சந்திப்பதற்காகவும், கண்டி நகரை கண்டு ரசிப்பதற்காகவும், யானைப்போர், காளைச் சண்டை, மல்யுத்தம் முதலியவற்றை பார்த்து ரசிப்பதற்காகவும், அரச சபையின் முக்கிய ஆலோசனைகளை நடாத்துவதற்காகவும் 'பார்த்து இருப்பு' மண்டபம் அமைக்கும் பணியும் தேவேந்திரனிடம் ஒப்படைக்கப்பட்டது. இதுவே 'பத்திருப்பு' என மருவலாயிற்று. அச்சந்தர்ப்பத்தில் தலதா மாளிகையின் தியவதன நிலமேயாக பதவி வகித்த தெகிகம நிலமே வாழைத் தண்டுகளைப் பயன்படுத்தி உருவாக்கிய பத்திருப்பு மண்டபத்தின் எண்கோண மாதிரி வடிவமைப்பினைக் கொண்டு பாத்திருப்பு மண்டபம் உருவாகிக் கொண்டிருந்தது.
போகம்பரை    வாவி
சிற்பியின் இக்கட்டட நிர்மாணப் பகுதிகளுக்கு உதவிகளையும் ஒத்தாசைகளையும் வழங்கும் பொறுப்பு தியவதன நிலமேயாக பதவி வகித்த தெகிகம நிலமே மற்றும் உனம்புவ நிலமே ஆகிய இருவருக்கும் வழங்கப்பட்டிருந்தது. அழகிய வேலைப்பாடுகளுடன் கண்களைக் கவரும் வண்ணம் கட்டியெழுப்பப்பட்டுக் கொண்டிருந்த அவ்வெண்கோண மண்டப நிர்மாணப் பணிகள் நிறைவுற்றால் சிற்பி தேவேந்திரனுக்கும் தியவதன நிலமேவுக்கும் பெரும் புகழும், அன்பளிப்புகள், சன்மானங்கள் என பல்வேறு சலுகைகள் கிட்டுமென அரச பணியாளர்கள் பலர் கருதினர். அதனால் இக்கட்டட வேலைகள் கிரமமாக நிறைவுறா வண்ணம் சூழ்ச்சிகள் பல மேற்கொள்ளப்பட்டன.

இப்பத்திருப்பு மண்டபத்திற்கு தேவையான உறுதியான மரங்களான நாகை, மயிலை முதலிய மரங்கள் மாத்தளை மாவட்டத்தைச் சேர்ந்த நாலந்தா வனப்பிரதேசத்திலிருந்து தறிக்கப்பட்டன. காடுகளில் தறிக்கப்பட்ட மரங்கள் அளவு பிரமாணங்களுக்கமைய அறுக்கப்பட்டு யானைகளைக் கொண்டு கண்டிக்கு இழுத்துவரப்பட்டன. இவ்வாறு தறிக்கப்பட்ட மரங்கள் அறுக்கப்பட்ட போது தவறான அளவு பிரமாணங்கள் சூழ்ச்சிக்காரர்களால் மர அறுவையாளர்களிடம் வழங்கப்பட்டு நீள அகல வேறுபாடுகளுடனான சிலாகைகள் வேலைத்தளத்தை வந்தடைந்தன. இச்சதி வேலைகள் பற்றி தேவேந்திரன் ஏதுமறியாதவனானான். இருப்பினும் தனது உதவியாளர்களுடன் பத்திருப்பு மண்டப வேலைகளை மும்முரமாக மேற்கொள்ளலானான்.

தவறான அளவு பிரமாணங்கள் காரணமாக எண்கோண மண்டபத்தின் தோற்றத்தில் சில குறைபாடுகள் ஏற்பட்டன. சதிகாரர்கள் இதுபற்றி அரசனின் கவனத்திற்கு கொண்டு வந்தனர். மன்னரை அவமானப்படுத்தும் நோக்கத்தில் அளவுப் பிரமாணங்களை சிற்பி குறைத்து மரச்சிலாகைகளை அறுப்பதற்கு பணிப்புரை வழங்கியதாக மன்னரிடம் தெரிவிக்கப்பட்டது.

தமக்கு கிடைத்த தகவல்களைக் கொண்டு அரசன் எண்கோண மண்டப வேலைகளை கண்காணிப்பதற்கு வருகை தந்தான். மண்டபத்தின் மாதிரி வடிவமைப்பைவிட வேறுபாடு கொண்ட கட்டட நிர்மாணத்தைக் கண்டும் அரசன் எதுவுமே கூறாமல் மௌனம் காக்கலானான்.

பத்திருப்பு மண்டப வேலைகள் நிறைவுற்றன. திறப்பு விழாவுக்கான நேரமும் நாளும் குறிப்பிடப்பட்டன. பத்திருப்பு மண்டபத்தை நிர்மாணித்த சிற்பி தேவேந்திரனுக்கும், உதவியாளர்களுக்கும் அரச சன்மானங்களும், கிராமங்களும் நன்கொடையாக வழங்கப்படுவதற்கான ஏற்பாடுகளும் சிறப்பாக நிறைவேறின. அதேவேளை திட்டமிட்ட மர அளவு பிரமாணங்களைக் குறைவாக குறிப்பிட்டு மண்டபத்தை நிர்மாணித்தமை காரணமாக அரசர் ஆத்திரமடைந்திருப்பதாகவும் அதற்கான தண்டனையாக சிற்பியின் கட்டை விரலை துண்டிக்கும்படி உத்தரவிடப்போவதாகவும் சிற்பிக்கு தகவல் கிடைத்தது.

இத்துணை காலமாக அரச வெகுமதிகளையும் மரியாதைகளையும் மட்டுமே பெற்றிருந்த தமது பரம்பரை இத்தகைய அரச தண்டனை பெறும் நிலையை அடைந்தமை குறித்து சிற்பி பெருங்கவலை கொண்டான். இதன்மூலம் தமது சந்ததிக்கும் சிற்பக்கலைக்கும் நேரவிருக்கும் அவமானம் பற்றி சஞ்சலமடைந்தான்.

விடிந்தால் திறப்பு விழா, இரவு முழுவதும் நித்திரையின்றி படுக்கையில் புரண்டு கொண்டிருந்தான் தேவேந்திரன். படுக்கையை விட்டெழுந்த சிற்பி பாற்கடலை (வாவி)யும், பத்திருப்பு மண்டபத்தையும் வெறித்துப் பார்த்தவாறு கண்டி வாவியைச் சுற்றி நடந்தான்.

தண்டனைக்காக விரல் துண்டிக்கப்படுவதனால் நேரப்போகும் இழுக்கையெண்ணி வெதும்பிய தேவேந்திரன் இறுக்கமான ஒரு முடிவுக்கு வரலானான்.

சற்றும் எதிர்பாராவண்ணம் சுற்றுமுற்றும் பார்வையைச் செலுத்தாமல் தன்னால் நிர்மாணிக்கப்பட்டு விடிந்தால் திறப்பு விழா காணும் எண்கோண பத்திருப்பு மண்டபத்தை ஒரு கணம் உற்று நோக்கி கண்ணீர் வடித்த சிற்பி தேவேந்திரன் தன்னால் உருவாக்கப்பட்டு பாற்கடல் என பெயர் பெற்ற கண்டி வாவிக்குள் பாய்ந்து தன் இன்னுயிரை மாய்த்துக் கொண்டான்.

பொழுது புலர்ந்தது. வாவியில் உயிரற்ற தேவேந்திரனின் பூதவுடல் மிதந்து கொண்டிருந்தது. தகவலறிந்த அரசனும் அமைச்சர் பிரதானிகளும் சொல்லொணாத் துயரம் கொண்டனர். பூரண அரச மரியாதைகளுடன் சிற்பி தேவேந்திரனின் பூதவுடல் தகனம் செய்யப்பட்டது.
 
சி.கே.முருகேசு

நன்றி
'உடரட்ட ஜன ஸ்ரெத்தி'

Monday, April 3, 2017

வீரசிங்கம் பூசாரியுடன் ஒரு திகில் நேர்காணல்

கேட்டு எழுதுபவர்: மணி  ஸ்ரீகாந்தன்.

லகம் என்னதான் நாகரீக வளர்ச்சிப் பாதையில் பயணித்துக் கொண்டிருந்தாலும் இன்னும் பேய்கள் பற்றிய பயம் மேலை நாடுகளிலும் இங்கேயும் அப்படியேதான் இருக்கிறது. என்னதான் தைரியசாலியாக இருந்தாலும் ஒரு பாழடைந்த பங்களா, ஆள் அரவமில்லாத முச்சந்தி, பாழடைந்த கிணறு போன்றவைகளை பார்க்கும்போது நம் உடம்பிற்குள் ஏற்படும் அச்ச உணர்வைத் தடுக்க முடியவில்லை. அதோடு தினமும் வெளியாகும் பேய்ப்படங்களும் நாளுக்கு நாள் பேய், ஆவிகள் பற்றிய பயத்தை அதிகரிப்பதாகவே உள்ளது. இந்த நிலையில் பேய்கள் என்றால் என்ன? உண்மையிலேயே ஒரு தீய சக்தி இருக்கிறதா? என்ற கேள்விகளுக்கான விடைகளைத் தேடுவதற்காக இங்கிரிய,றைகம் பகுதியில் இரண்டு நாட்களாக முகாமிட்டு தேடுதலை தொடங்கினோம். அப்படியான எமது தேடுதலில் சிக்கியவர்தான் வீரசிங்கம் பூசாரி றைகம் தோட்டத்தில் வீரசிங்கம் ரொம்பவும் பிரபலமான பூசாரி. தமது குலதெய்வமான கருப்புசாமியை நினைத்து மருள் வந்து ஆடும் போது கருப்பு சாமியாகவே மாறிவிடுகிறார்.பேய்கள் பற்றிய எமது சந்தேகங்களை கேட்டு, சுவரஸ்யமான பதில்களை அவரிடமிருந்து கறந்தோம்…
வீரசிங்கம் பூசாரி

“பேயை நீங்கள் நேரில் பார்த்திருக்கிறீர்களா?” என்று வீரசிங்கத்திற்கு கொக்கி போட்டோம்.
“ம்ம்….நான் பார்த்திருக்கிறேன். பேய்கள் மிகவும் கோரமாக இருக்கும்.அதன் உருவம் தெளிவில்லாமல்தான் இருக்கும்.பேயின் கால்கள் தரையில் நிற்காது. காட்டேரி,சுடலை மாடன் உள்ளிட்ட துர்தேவதைகளை சுடுகாட்டில்வைத்துதான் அழைப்போம்,அந்த சந்தர்பங்களில் பேய்கள் என் கண்களுக்கு தெரியும்.”ன்னு சொன்னதும், “பேய்கள் அழகான தோற்றத்தில் காட்சியளிக்குமா?”ன்னு பூசாரியை இடைமறித்தோம்.
“பேய்கள் எப்போதும் அவலட்சனமான தோற்றத்தில்தான் வரும்.அழகான தோற்றத்தில் வராது.தலைவிரி கோலத்தில், முகம் சிதைந்து, அழுகிய உடம்போடுதான் அது காட்சி தரும்” என்று அடித்து சொல்லுகிறார் வீரசிங்கம்.

“ஆவியும்,பேயும் ஒன்றா,ஆவி கொஞ்சம் மென்மையான சுபாவம் என்று சொல்லுகிறார்களே..?”னு எமது சந்தேகத்தை கேட்டப்போது. “ரெண்டையும் இருவேறாக பிரிக்க முடியாது. ஆவியும்,பேயும் ஒன்றுதான். இந்த தீய சக்திகளில் மென்மையானது,கொடூரமானது என்று வகைகள் எதுவும் இல்லை.” என்று பதில் சொல்லும் போது வீரசிங்கம் அவரை அறியாமலேயே சிரித்து விடுகிறார்.

“பூசாரிகளின் வேலைகளுக்கு  உதவி செய்யக்ககூடிய தீய சக்திகள் இருக்கிறதா?”ன்னு அடுத்த கேள்விக்கு தாவியதும் பூசாரி ஒரு நமட்டு சிரிப்போடு தொடர்ந்தார். “ அப்படி உதவி செய்கிற சக்திகளை தீய சக்திகள் என்றழைப்பது தவறு. நமக்கு உதவி செய்பவை நல்ல சக்திதானே..இப்போ பூசாரி தொழிலுக்கு வாரவங்க சும்மா மந்திரம் மட்டும் படித்துவிட்டு வந்துவிடமுடியாது. அப்படி வந்தாலும் இந்த தொழில்ல நிலைத்து நிற்க முடியாது. ஆனா நாங்க நிலைத்து நிற்பதற்கு என்னோட முன்னோர்களின் ஆத்ம சக்தி துணை நிக்குது. அதாவது மந்திர,தந்திர வித்தை தெரிந்த ஒருவர் மரணித்து விட்டால், அவரின் ஆத்மா அவரின் பரம்பரையில் வரும் ஒருவருக்கு உதவியாக இருக்கும்.இது உண்மை இதை யாராலும் மறுக்க முடியாது. இப்போ எனக்கு முப்பத்தெட்டு வயதாகிறது. எனது பரம்பரையில் நான் ஏழாவது பூசாரி. எனது பாட்டன்,முப்பாட்டன் ஆகியோர்கள் இந்தியாவில் பூசாரிகளாக இருந்திருக்கிறார்கள். அவர்களுக்கு பிறகு நான் பூசாரியாக இருப்பது எனது முப்பாட்டன்களின் ஆசீர்வாதம்தான்.அவர்களின் துணையோடுதான் நான் எனது மந்திர சித்து விளையாட்டுகளை ஆடுகிறேன். எனது இந்த ஆட்டத்திற்கு ஊரு பேரு தெரியாத தீய சக்திகளின் உதவிகளை நான் எப்போதும் பெற்றுக்கொள்வதில்லை.அது ஆபத்தில் முடிந்து விடும். சனியனை சாப்பாடு வச்சு கூப்பிடுகிறமாதிரி.” என்று உடல் சிலிர்தார்.
“உங்களை மாதிரி சக்தி வாய்ந்த பூசாரிகள் தினமும்தான் பேய் ஓட்டுகிறீர்கள்.ஆனால் பேய்கள் குறைந்த மாதிரி தெரியவில்லையே..,நாளுக்கு நாள் பேய்களின் எண்ணிக்கை அதிகரிப்பதாக தெரிகிறதே?”என்று பூசாரிக்கு வலை விரித்தோம்.

“ மரணங்கள் சம்பவிக்கும்போது அவைகள் துர் மரணங்களாக இருக்கிற பட்சத்தில். அவர்கள் ஆசையோடு பேய்களாக திரிவதை யாராலும் தடுக்க முடியாது. காதலர்கள் தமது வாழ்க்கையை வாழ்ந்து முடிக்காமல் தற்கொலை செய்து கொண்டாலும் அவர்களின் ஆத்மா ஆவியாக திரியும்.அதனை நிவர்த்தி செய்ய கைதேர்ந்த பூசாரிகள் அல்லது கோயில் குருக்களின் துணையோடு, இறந்தவர்களின் ஆத்மா சாந்திக்கான பரிகாரங்களை பிழையின்றி செய்து முடித்தால். ஆவிகளின் நடமாட்டத்தை கனிசமான அளவு குறைக்கலாம். இப்படியான பரிகார கிரியைகள் செய்யப்படாத ஆத்மாக்கள் நீண்ட காலத்துக்கு இந்த பூமியில் சுற்றிக் கொண்டிருக்கும். பேய்களை பிடித்து போத்தலில் அடைத்து,சுடலையில் புதைத்து அவைகளின் கதையை முடிப்பதுதான் காலா காலமாக செய்துவரும் முறை. அவைகளை சில பூசாரிகள். கரைப்பதும்,எரிப்பதுமாக மாற்றியதாலும் பெரும்பாலான துஷ்ட சக்திகள் தப்பிவிடுவதோடு, அவைகள் மீண்டும் ஆக்கரோசமாக நம்மை துன்புறுத்துகிறது.”என்று களத்துக்கு வரும் புதிய பூசாரிகளுக்கு செக் வைக்கிறார் வீரசிங்கம்.

“பேய்களை எல்லோராலும் பார்க்க முடியுமா?” என்று கேட்டதும், “அப்படி எல்லோராலும் பார்க்க முடியாது. பேய்களுக்கு பிடித்த கிரக பலனை உடையவர்களின் கண்களுக்கு அவைகள் தெரியும்.அதோடு கடவுளை நம்புகிறவர்கள்,மதத்தை பின்பற்றுகிறவர்களின் கண்களுக்கும் பேய்கள் சிக்கும்.” என்று பக்தி பரவசமாகவே பதிலளிக்கும் அவரிடம்
“பேய் பிசாசு என்று எதுவுமே கிடையாது, எல்லாம் பணம் பறிப்பதற்கான வேலையையே இந்த பூசாரிகள் செய்கிறார்கள்.எல்லா நோய்க்கும் மருந்துதான் தீர்வு என்று டாக்டர்கள் சொல்கிறார்களே?” என்று வீரசிங்கத்தை கட்டத்தில் சிக்க வைக்க முயற்சித்தோம்.
கேள்விக்கு, எகத்தாளமாக சிரித்த பூசாரி “எல்லா நோய்க்கும் டாக்டர்கிட்டே மருந்து கிடையாது. சில நோயாளர்களை பரிசோதிக்கும் டாக்டர்கள் ‘எந்த நோயும் கிடையாது,எல்லாம் அவன் செயல்’னு சொல்லுவதை நீங்கள் பார்த்ததில்லையா, அப்படி டாக்டர்களால் கைவிடப்படும் நோயாளர்களை நாம்தான் குணமாக்க வேண்டும். இது உலக நியதி” என்று பூசாரி சொல்லும் போதே அவரின் பேச்சில் இறுமாப்பு பளீச்சிடுகிறது.
“மந்திரங்கள் நாட்டுக்கு நாடு வித்தியாசப்படுமா,ஒரு ஆப்பிரிக்க ஆவி நம்ம நாட்டு பிரஜையின் உடலுக்குள் இருந்தால்,அந்தப் பேயுடன் எந்த மொழியில் உரையாடுவீர்கள்.?”என்றதும்,
“மந்திரங்கள் பொதுவானதுதான்.மந்திரங்கள் எல்லாமே இந்தியாவை மையமாக கொண்டதுதான்.அதனால் அது மாறுபடாது.நான் இது வரைக்கும் சிங்கள, தமிழ் பேய்களை மட்டுமே விரட்டி இருக்கிறேன். ஆப்பிரிக்க,ஆங்கில பேய்களை விரட்டும் வாய்ப்பு எனக்கு கிடைக்கவில்லை.அப்படி கிடைத்தால் நல்லதுதானே நமக்கான வருமானம் டொலரில் கிடைத்தால் யார்தான் வேணாம்னு சொல்லுவாங்க.! வரட்டும் பார்க்கலாம்.” என்று எதிர்பார்ப்போடு நிறுத்தினார்.

“பேய்கள் சுடுகாட்டில்தான் வாழ்கிறதா,ஏன் ஒரு அழகான வீட்டில் அதற்கு வாழ முடியாதா?”
“பேய்கள் அதிகமாக ‘பாடை மாற்றி’ என்கிற ஊர் தெருக்கோடியில் இருக்கும் முச்சந்தியில்தான் அதிகமாக இருக்கும்.அதற்கு காரணம் நாம் இறந்த பிறகு நமது பிரேதத்தை சுடலைக்கு எடுத்து செல்லும்போது நமது தலை வீட்டை பார்க்கும் வண்ணமாக எடுத்துச் சென்று, முச்சந்தியான பாடை மாற்றியில் தலையை சுடலை பக்கமாக திறுப்புவார்கள்.அதனால் நமது எல்லா விடயமும் அந்த பாடை மாற்றியோடு முடிந்து விடுகிறது.அதனால் பேய்களும் அந்த முச்சந்தியிலேயே பெரும்பாலும் தங்கிவிடுகிறது. துர் தேவதைகள் ஏசி அறைகளில் தங்க விரும்புவதில்லை.அவைகள் அழுக்கு படிந்து சிலந்தி வலை பின்னிய கட்டிடங்களிலேயே தங்குகிறது.காரணம் ஆவிகள் அமைதியை விரும்புபவை.”என்றவரிடம்,

“ஏவல்,சூனியம் என்பது உண்மையா அவைகளால் ஒருவரை கொல்ல முடியுமா?”என்று கேட்டோம்.
“நிச்சயமாக முடியும், ஆனால் நான் இதுவரை அப்படியான காரியங்களில் ஈடுபட்டதில்லை. சூனியம் செய்து அந்த மருந்தை சம்பந்தபட்ட  நபரிடம் கொண்டு சேர்க்க தேவையில்லை.மந்திர சித்து வேலைகளை செய்து அந்தப் பொருளை நீங்கள் நிற்கும் இடத்தில் புதைத்தாலே போதும்.அது நிலத்துக்கு கீழே சம்பந்தப்பட்வரின் வீட்டுக்கு அடியில் சென்று வேலையை காட்ட ஆரம்பித்து விடும்.ஏவலும் அப்படித்தான் இதெற்கெல்லாம் நிறைய மலையாள மந்திர புத்தகங்கள் இருக்கிறது. அவைகளை முறையாக கற்க வேண்டும். வாரிகை மலையின் மந்திரங்கள் என்கிற நூலில் குட்டிச்சாத்தானின் யந்திரமும்,மந்திரமும் என்கிற இரகஷிய மந்திர வித்தை இருக்கிறது அதை முறைப்படி செய்தாலே ஏவல் உங்கள் கை வசம் ஆகிவிடும்,பிறகென்ன நீங்கள் நினைக்கிற இலக்கு நோக்கி அதை அனுப்பிவிடலாம்.” என்று சொல்லும் வீரசிங்கம் நிறைய மந்திர புத்தகங்களை நம்மிடம் காட்டுகிறார்.அந்த நூல்களில் இடுப்பு வலி,பல்லு வலி,தலை வலி, ஆகியவற்றுக்கான நிவாரண மந்திரங்கள் மூலிகையோடு செய்வதற்கான வழிமுறைகள் விளக்கப்பட்டு இருக்கின்றன. “மந்திரங்களை சித்து விளையாட்டு என்று நினைத்து விடாதீர்கள்.அவைகள் மந்திரமும், மூலிகையும் கலந்த அருமருந்துகள் என்பதுதான் உண்மை.” என்ற பூசாரி மந்திர மகிமையை சொல்லி சிலாகிக்கிறார்.

“பேயை கட்டிவைத்து வேலை வாங்க முடியுமா,குறிப்பாக வீட்டு வேலைகளை கூட அவைகள் செய்து கொடுக்கும் என்று சில பூசாரிகள் சொல்லக் கேட்டிருக்கிறேன்.உண்மையா?” என்றதும்,

“இது நம்புகிற மாதிரி இல்லை. எனக்கு அப்படி பேய்கள் உதவி செய்வதாக சொன்னாலும் நான் அதை ஏற்றுக்கொள்ள மாட்டேன். ஏனென்னறால் எனக்கு உதவி செய்யவும் வீட்டு வேலை செய்யவும் ஆட்கள் இருக்கிறார்கள். மனைவி,பிள்ளைகள் என்று நான் வாழ்கிற வீட்டில் எப்படி பேயை வைத்துக்கொள்ள முடியும்.” என்ற பூசாரி ஒரு மந்திரக் கோலை என்னிடம் காட்டினார். இது கருங்காலி மரத்தில் செய்த கோல் இதற்கு எல்லா துஷ்ட ஆவிகளும் அடிப்பணியும். யானை எப்படி அங்குசத்திற்கு பயப்படுகிறதோ அதுமாதிரி.” என்றவர், ஒரு மந்திர புத்தகத்தை கையிலெடுத்து உரக்க வாசிக்க தொடங்கினார். இனி நமக்கு அங்கு வேலையில்லை என்பதை புரிந்து கொண்டு புறப்பட்டோம்.

கண்டி மன்னரின் மதுரை நாயக்கர் வாரிசான அசோக்ராஜாவுடன் ஒரு நேர்காணல்

மணி ஸ்ரீகாந்தன்.

ண்டி இராச்சியத்தை ஆண்ட கடைசி மன்னன் ஸ்ரீ விக்கிரம ராஜசிங்கன் ஒரு தமிழ் பேசும் தெலுங்கு நாயக்கர் என்பது பலரும் அறிந்த ஒன்று.  இக் கண்டி இராச்சியம் 1739 ம் ஆண்டு தெலுங்கு நாயக்க வம்சத்தினரின் கைகளுக்கு வந்து சேர்ந்தது. அதன் பின்னர் நான்கு  நாயக்க மன்னர்கள் கண்டி இராச்சியத்தை அடுத்த 76 ஆண்டுகளாக 1815 ஆண்டு வரை ஆண்டனர். கண்ணுசாமி என்ற   ஸ்ரீ விக்கிரம ராஜசிங்கனே கடைசி மன்னன்.

சுமார் இருநூறு வருடங்களுக்கு முன்னர் கண்டியை அரசாண்ட இந்த கண்ணுசாமி நாயக்கர் வெள்ளையர்களின் ஆக்கிரமிப்பால் மணிமுடி இழந்து குடும்பத்தோடு கைது செய்யப்பட்டு இந்தியாவிற்கு நாடு கடத்தப்பட்டார் என்பது வரலாறு. நாடு கடத்தப்பட்ட மன்னர் தமிழ் நாட்டின் வேலூர் நகரின் கோட்டையில் குடும்பத்தோடு பல ஆண்டுகள் சிறை வைக்கப்பட்டு பின்னர் அங்கேயே இறந்துபோனார். அதன் பின்னர் மன்னரின் மனைவி பிள்ளைகள் விடுதலை செய்யப்பட்டர்கள். அப்படி விடுதலை செய்யப்பட்ட மன்னரின் பரம்பரையில் வந்தவர்கள் இன்றும் தமிழகத்தில் பல இடங்களில்  வாழ்ந்து வருகிறார்கள். கால மாற்றத்தால் நம் நாட்டவர்கள் கண்டி மன்னரை மறந்து விட்டாலும் மன்னரின் வாரிசுகள் அவரை இன்று வரை நினைவில் வைத்து மன்னரின் இறந்த தினத்தை இன்றுவரை ஒவ்வொரு ஆண்டும் குருபூஜை நிகழ்வாக வேலூரில் அமைக்கப்பட்டுள்ள மன்னரின் நினைவு இல்லமான முத்து மண்டபத்தில் நடாத்தி வருகிறார்கள்.
இந்நிகழ்வு வருடந்தோறும் ஜனவரி 30ம் திகதி  நடைபெறுகிறது. இவ்வருடம் நடைப்பெற்ற மன்னரின் 186வது வருட நினைவு தின குரு பூஜை விழா மதுரையைச் சேர்ந்த மன்னரின் வாரிசு அசோகனின் தலைமையில் பிரமாண்டமாக நடைபெற்றது. ஊர்வலங்களுக்கு தமிழகத்தில் தடை உத்தரவு இருக்கிற நிலையில் கண்டி மன்னருக்கான விழாவுக்கு வேலூர் காவலத்துறை சிறப்பு சலுகை வழங்கி ஊர்வலத்துக்கு அனுமதி வழங்கியிருந்தனர்.முதல் தடவையாக மன்னரின் வாரிசு அசோக்ராஜா குதிரையில் ஊர்வலமாக அழைத்துவரப்பட்டிருந்தார்.

வீரம் செறிந்த மதுரை மண்ணை வரலாற்று சிறப்புமிக்க வீரம் பொருந்திய பல மன்னர்கள் ஆட்சி செய்து வந்திருக்கிறார்கள்.என்பது வரலாற்றில் பாடமாக உள்ளது.அதே மண்ணில் பிறந்து நமது நாட்டின் கண்டியை ஆட்சி செய்த கடைசி மன்னனின் நேரடி வாரிசுகள் தமிழகத்தில் பல இடங்களில் வாழ்ந்து வந்தாலும் அவர்களை ஒரு இடத்தில் ஒன்று சேர்ப்பதென்பது கடினமான காரியமாக இருக்கிறதாம்.அவர்களை ஒன்றிணைக்கும் பெரும் பணியில் மன்னரின்  ஏழாவது வாரிசான வி. அசோக்ராஜா ஈடுபட்டிருக்கிறார்.

“நாங்க இப்போ ஏழு வருடங்களாக மன்னரின் குருபூஜை விழாவை நடாத்தி வருகிறோம்.இந்த நிகழ்வுகளுக்கு மன்னரின் இரத்த உறவுகளை முடிந்தவரை தேடிக் கண்டுப்பிடித்து கொண்டு வந்திருக்கிறேன்.ஆனாலும் இன்னும் பல இடங்களில் மன்னரின் உறவினர்கள் இருக்கிறார்கள் அவர்களையும் ஒண்றினைக்கும் பணியை தொடங்கியிருக்கிறேன்.மன்னரின் குருபூஜையில் கலந்து கொள்ளும் வாரிசுகள் எல்லோருமே இலங்கை அரசின் கண்டி மானியத்தை முறையாக பெற்றுவந்த குடும்பங்களை சேர்ந்தவர்கள்.”என்று சொல்லும் அசோக்ராஜா,
“மன்னரின் வாரிசுகள் என்று சொல்லும் சிலர் பிழையான தகவல்களை கொடுத்து விடுகிறார்கள்.ஆனால் நான் சரியான குறிப்புகளையும்,ஆவணங்களையும் வைத்திருக்கிறேன்.ஒரு தலைமுறை என்பது 30பதிலிருந்து நாற்பது வரை,எனது தாத்தா சுப்புசாமி ராஜா 1965வரை கண்டி பென்ஷன் வாங்கிட்டு இருந்திருக்கிறாரு. அதுக்கான ஆவணங்கள் என்கிட்டே இருக்கு” இலங்கை அரசு வழங்கிய மானிய ஆவணத்தில் அசோக்ராஜாவின் தாத்தாவின் பெயர் சுப்புசாமி ராஜாவின் பெயர் இருப்பதை எம்மிடம் சுட்டிக்காட்டியவர் தொடர்ந்தார். “எனது பாட்டன் சுந்தரராஜாவின் மகன்தான் சுப்புசாமிராஜா அவரின் மனைவியின் பெயர் மீனாட்சிஅம்மாள் தனது 97வயதில் அவர் இன்னும் வாழ்கிறார். அவருக்கு நான்கு மகன்கள் அவர்களில் மூத்தவர் குட்டிச்சாமிராஜா இவர் மதுரை டி.எஸ்.பியாக பணியில் இருந்திருக்கிறார்.அவருக்கு பிறகு எனது அப்பா வெங்கடசலபதிராஜா,இவர்கள் இருவரும் இப்போது உயிரோடு இல்லை.அவர்களுக்கு இளையவர்களான கிருஸ்ணராஜாவும்,பால்ராஜாவும் இப்போதும் இருக்கிறார்கள். இவர்களில் நானும் எனது சித்தப்பா பால்ராஜாவும்தான் மன்னரின் குருபூஜை நிகழ்வுகளை தொடர்ச்சியாக செய்து வருகிறோம்.என்றவர்,
 ஸ்ரீவிக்கிரமராஜசிங்கன் பற்றி தமக்கு தெரிந்த சில தகவல்களை எம்மோடு பகிர்ந்து கொண்டார்.

சுப்புசாமிராஜா கண்டி பென்ஷன்
வாங்கியதற்கான ஆவணம்.




“கண்ணுசாமி நாயக்கருக்கு சகோதரர்கள் யாரும் கிடையாது.ஒரே அக்கா மட்டும்தான் அம்மா பெயர் சுப்பம்மாள் வெங்கடபெருமாள்.இவங்க புதுக்கோட்டை மாவட்டம் பூலாம் பட்டியைச் சேர்ந்தவர்கள்.அதாவது நாங்கள் மதுரை திருமலை நாயக்கர் வம்சத்தை சேர்ந்த ஆண் வழி வாரிசுகள்.அதில வரும்போது ராணி மங்கம்மாள்,ராணி மீனாட்சி ஆகியோர் ஆட்சிக்கு வந்தார்கள் என்ற காலக்கட்டம் இருக்கு.அந்த நேரத்தில் ஆண் வழி வாரிசுகள்தான் ஆட்சிக்கு வந்திருக்க வேண்டும்.ஆனால் அப்போது அப்படி நடக்கவில்லை.அந்தக் காலக்கட்டத்தில் ஆண் வாரிசுகள் ஓரங்கட்டப்பட்டு ஆண் வாரிசுகள் வெளியேற்றப்பட்டிருக்கலாம்.அப்படி மதுரையிலிருந்து வெளியேறி புதுக்கோட்டை மகாராஜாவின் பாதுகாப்பில் பூலான் பட்டியில் கண்ணுசாமி,குடும்பம் வாழ்ந்திருக்கிறது.இன்னைக்கும் அந்த ஊருல கண்டி ராஜாவுக்கு மரியாதை இருக்கு.அந்த ஊரோட பேரு விராச்சிலை.அங்குள்ள அம்மன் கோவில்ல கண்டி மன்னரின் வாரிசுகளுக்கு புதுக்கோட்டை சமஸ்த்தானத்தின் மூலமாக முதல் மரியாதை கொடுக்கப்பட்டு வந்திருக்கிறது.இன்று வரை அங்கே அது வழக்கத்தில் இருந்து வருகிறது.இன்று எனது மாமா அந்த மரியாதையை பெற்றுக்கொள்கிறார்.
சுப்புசாமி ராஜா
கண்ணுசாமி நாயக்கரின் பூர்வீக ஊருன்னா அது மதுரைக்கு பக்கத்தில் இருக்கும் வெள்ளிக்குறிச்சி.மதுரை திருமலைநாயக்கர் சம்பந்தபட்ட இரத்த உறவுகள் வாழ்ந்த இடம்.இங்கே வாரிசு போட்டிகளின் காரணத்தால் அந்த மண்ணைவிட்டு வெளியேறிய கண்ணுசாமி குடும்பம் பூலான் பட்டியில் கொஞ்சக் காலம் தங்கியிருந்துவிட்டு பிறகு ராமேஸ்வரத்திற்கு சென்றவர்கள் அங்கே ராமேஸ்வர பெரிய கோவிலில் தெய்வீக பணியில் ஈடுப்பட்டிருக்கிறார்கள்.அதன் பிறகு கண்ணுசாமியின் தந்தை இறந்துவிட கண்டியை ஆட்சி செய்த இராஜாதி ராஜசிங்கனின் மனைவியின் தம்பியான கண்ணுசாமியை கண்டிக்கு அழைத்து வந்திருக்கிறார்கள்.” என்று தமது முப்பாட்டன்களின் பழைய வரலாற்றை
மீட்டியவரிடம்,

“நீங்கள் கண்டி ராஜாவின் நான்கு மனைவிகளில் நீங்கள் எந்த தாரத்து வாரிசுகள்” என்று கேட்டதற்கு,
“வெங்கட ராஜம்மாளும்,வெங்கடம்மாளும் மதுரைக்காரர்கள் அவர்களின் வாரிசு வழியில் வந்தவர்கள்தான் நாங்கள்.அதோடு மதுரை திருமலை நாயக்கரின் நேரடி வாரிசு எனக்கு பெரியப்பா முறை வேணுங்க.அவங்க சிவகங்கையில் ஜமீன்தாரா இருந்தாங்க.எனது அம்மாவின் தாய் மாமா.”என்றவரிடம், “கண்டி ராஜாவுக்கு விழாக்கள் எல்லாம் எடுக்குறீங்க திருமலை நாயக்கர்கள் கண்டி ராஜாவை தமது வம்சாவழியாக ஏற்றுக்கொள்கிறார்களா?”
மீனாட்சி அம்மாள்
“ஸ்ரீ விக்ரமராஜசிங்கன் என்று அவர் அழைக்கப்படுவதால் அவர் ஒரு சிங்கள மன்னனாக இருப்பாரோ என்கிற சந்தேகம் இன்னும் இங்கே இருக்கிறது. அதனை இப்படியான விழாக்களை தொடர்ந்து நடத்துவதன் மூலமும் தமிழக ஊடகங்களில் மன்னரைப்பற்றிய செய்திகளை அடிக்கடி பகிர்வதன் மூலமும் அந்த சந்தேகப் பார்வையை இல்லாதொழிக்கலாம்.”என்றார்.
“கண்டி மன்னரின் வாரிசுகளுக்கு ஆங்கிலேயர் எல்லா சலுகைகளையும் வழங்கியிருக்கிறார்கள் ஆனால் அவர்களின் வாழ்க்கை வளமானதாக அமையவில்லையே?”ன்னு கேட்டதும் அசோக்ராஜா புன்னகையோடு பதில் சொல்லத் தொடங்குகிறார்…

“1947லேயே எங்க தாத்தா சுப்புசாமி ராஜாவுக்கு ஆயிரம் ரூபா பென்ஷன் வந்திருக்குங்க!வாரிசுகளின் குழந்தைகள் எல்லோரும் கான்வென்டுலதான் படிச்சிருக்காங்க அவங்க படிப்பு,சாப்பாடுன்னு எல்லா செலவுக்கும் அரசே பணம் கட்டியிருக்கு.நாம வாங்குற பேனா,பென்சில்னு எந்தப் பொருளா இருந்தாலும் சரி அதற்கான பில்லை மட்டும் கொடுத்திட்டாலே போதும் அரசு பணத்தை கொடுத்திடுமாம்.

அப்புறம் ராமநாதபுரம் பக்கத்தில ‘சிக்கல்’ என்கிற ஊரிலையும் வெள்ளக்காரன் கொடுத்த இடம் இருந்ததா சொல்லுறாங்க.வெள்ளைக்காரன் கொடுத்த பெரிய பங்களா இன்றைக்கும் தஞ்சாவூரில ‘கண்டி ராஜா அரண்மனை’ன்னு இருக்கு ஆனா அதில நாங்க இல்லை.அதையெல்லாம் எங்க தாத்தாவுங்க வித்துட்டாங்க.இவங்களுக்கு பணத்தை சேமித்து வைக்கிற பழக்கம் இருந்ததில்லை.கிட்டத்தட்ட ஒரு தலைமுறையா அப்படியே இருந்திட்டாங்க.தினமும் ஒரு இருபது பேரு வீட்டுக்கு வந்து சாப்பிடுவாங்களாம்.ஒரு மாதிரி  பந்தாவாகவே வாழ்க்கையை ஓட்டியிருக்கிறாங்க.பத்து ரூபாவைக் கூட சோத்து வைக்கல எல்லோரும் அப்படியேதான் இருந்திருக்கிறார்கள்.ஒரு சிலர்தான் படிச்சிட்டு வேலைக்கு போயிருக்காங்க.பெரும்பாலும் இவங்க வேலைக்குப் போனதில்லை. பென்ஷன் வரும் அதை வச்சி ராஜபோகமாக வாழ்ந்திருக்கிறார்கள்.அன்மையில் கூட என்னை சந்தித்த ஒரு நண்பர், ‘உங்க தாத்தா பென்ஷன் பணம் ஆயிரம் ரூபா வாங்கும்போது, மாவட்டக் கலெக்டரோட  மாத சம்பளம் 160ரூபா.அதுதான் தமிழகத்தில் பெரிய சம்பளம்.அந்தக் காலத்திலேயே அந்தத் தொகையை விட ஐந்தாறு மடங்கு அதிகமா நீங்க பென்ஷன் வாங்கியிருக்கீங்க’ன்னு சொன்னாரு. ஆனா இதுப்பற்றி எனக்கு  கரெக்ட்டா தெரியல” என்று சொல்லும் அசோக்ராஜா வாரிசுகளுக்கான பென்ஷன் பணம் நிறுத்தப்பட்டது பற்றி ஒரு புதிய செய்தியை சொல்கிறார்.
 “1964ல்தான் பென்ஷன் பணம் நிறுத்தப்பட்டது அப்போது ஆட்சியில் இருந்த ஸ்ரீமாவோ பண்டார நாயக்க ‘நீங்க எங்க நாட்டு மன்னர்னா நீங்க இங்கேதான் இருந்திருக்கனும்.வெளிநாட்டில் இருக்கும் ஒருவருக்கு மானியத்தொகை வழங்க முடியாது அதனால முழுத்தொகையாக ஒரு ஐந்து லட்சம் தருகிறோம்,அதோடு உங்களுடனான அனைத்து தொடர்புகளும் நிறுத்தப்படும்.’னு சொல்லியிருக்காங்க இது 1962ல் நடந்ததாகவும் அப்போது மெட்ராஸ் முதல்வராக இருந்த பீ.டீ.ராஜா எனது தாத்தாவின் நண்பர் அவர் இந்த பிரச்சினை தொடர்பாக இலங்கை அரசோடு பேசியிருக்கிறார்.முன்னால் அமைச்சர் பீ.டீ.ஆர்.பழனிவேல் ராஜாவின் தந்தைதான் இந்த பீ.டீ.ராஜா.ஆனாலும் ஒண்ணும் பண்ண முடியல அப்போ எமது உறவுக்காரர்களில் பெண் வழி வாரிசுகளில் பலர் அந்த செட்டில்மென்டுக்கு சம்மதித்து அவர்கள் கொடுத்த முழுத்தொகையையும் வாங்கிக் கொண்டு இனி பென்ஷன் தேவையில்லைன்னு எழுதி கொடுத்துவிட்டார்களாம்.
அவர்கள் வாங்கிய தொகை இன்னைக்கு பெருமதியில் பல கோடி ஆனா என்ன பண்ணுறது தப்பு பண்ணீட்டாங்க.”என்று சொல்லும் போதே அசோக் ராஜாவின் கண்களில் ஏக்கம் தெரிகிறது.

“நம்மளோட கோரிக்கைன்னு பார்த்தீங்கன்னா கண்டியில அறுபத்து மூன்றாம் ஆண்டுவரை நடைபெற்று வந்ததாக சொல்லப்படும், மன்னரின் நினைவு நாள் விழா தொடர்ந்து நடக்கணும்.அப்புறம் நாங்க இலங்கை வந்தோம்ன்னா எங்களுக்கு மன்னரின் வாரிசு என்பதின் அடிப்படையில் வி.ஐ.பி மரியாதை கொடுக்கணும்,எங்களுக்கு நிறுத்தப்பட்ட சலுகைகளை வழங்கணும்.” என்ற கோரிக்கையோடு முடிக்கிறார்.