Friday, January 30, 2015

இருள் உலகக் கதைகள்

பிரதீபை பிடித்தாட்டிய வெள்ளைக்காரன் ஆவி!

முத்து பூசாரி சொன்ன பேய்க் கதை

கேட்டு எழுதுபவர்:  மணி  ஸ்ரீகாந்தன்

வேலை முடிந்து ஆயாசத்துடன் வீடு வந்த சுமணா வாசல் படியைத் தாண்டியதுமே அவள் நுழைந்த இடம் சமையலறை. அன்றைக்கு அவளுக்கு அப்படி ஒரு பேய்ப்பசி! என்ன இருக்கு? என மூக்கை அலையவிட்ட சுமணா அம்மா சமைத்து வைத்திருந்த கோழிக் குழம்பை சுடு சோற்றில் வழிய வழிய ஊற்றிக் கொண்டாள். சாப்பாடு தட்டோடு ஹோலில் அமர்ந்து கொண்டு வசதியாக கால்மேல் கால் போட்டுக் கொண்டாள். டிவியை ஒன் செய்துவிட்டு கோழிக் கறியுடன் சோற்றைப் பிசைந்து நாக்கில் வைத்து சுழற்றினாள். ம்... கோழிக்கறிக்கு அம்மாவின் கைமணம் மாதிரி வராது!

அம்மா பக்கத்து வீட்டிற்குச் சென்றிருந்தாள். எனவே அந்த நேரத்தில் சுமணாவைத் தவிர வேறு யாரும் வீட்டில் இலலை. நேரம் இரவு ஏழு முப்பதை நெருங்கிக் கொண்டிருந்தது. டிவியைப் பார்த்தபடியே தட்டில் கிடக்கும் இறைச்சி துண்டை சோற்றோடு பிசைந்து ஒரு கவளத்தை வாயில் வைத்துவிட்டு மீண்டும் தட்டைப் பார்த்தபோது அவளுக்கு அதிர்ச்சியாக இருந்தது. உணவுத் தட்டில் கிடந்த இறைச்சித் துண்டுகளைக் காணவில்லை. அந்த வினாடியில் சோற்றில் கிடந்த இறைச்சித் துண்டுகள் மாயமாய் மறைந்திருந்தன! சுற்றும் முற்றும் பார்த்தாள், நாய் பூனை ஏதாவது.... வாய்ப்பே இல்லை! அப்படியானால்.... அப்படியானால்.... சுமணா வீல் என்று கத்தியபடி நிலத்தில் சாய்ந்தாள்.... பிறகு சுமணாவின் தாய் அந்த ஊர் மந்திரவாதியிடம் மை பார்த்ததில் அது ஒரு எச்சிப் பேயின் வேலைதான் என்பது தெரியவந்தது.

நீர்கொழும்பு பிரதேசத்தில் அந்தக் கடற்கரை வீதியை ஒட்டியுள்ள பகுதியில் இப்படியான அமானுஷ்ய சம்பவங்கள் அவ்வப்போது அரங்கேறுவது வழக்கமாம். இச்சம்பவங்கள் ஊர்வாசிகள் மத்தியில் ஒரு அச்ச உணர்வை உருவாக்கி விட்டிருந்தது. இதனால் இரவில் தனியாக நடமாடுவதை பலரும் தவிர்த்து வந்தார்கள்.

இந்த அமானுஷ்ய சம்பவங்களுக்குப் பின்னால் ரொபர்ட், எமி ஆகிய இந்தோனேஷிய ஆவிகளின் வேலையாகக் கூட இருக்கலாம் என்பது வயதில் மூத்த ஊர்வாசிகளின் பேச்சாக இருந்தது. பல வருடங்களுக்கு முன்னால் அந்தப் பகுதியில் தம்பதிகளாக குடியேறிய ரொபர்ட்டும், எமியும் அங்கே இரவு நேர களியாட்ட விடுதி ஒன்றை ஒரு சமயத்தில் நடத்தி வந்திருக்கிறார்கள். இந்த விடுதிக்கு பெண்கள் வருவதும் ஆண்களை இங்கே சந்தித்து குடி கூத்து என இரவிரவாக களியாட்டங்கள் நடப்பதும் வாடிக்கை. இது ஒரு சமயத்தில் எல்லை மீறிப் போகவே ஊரில் விலைப் பெண்கள் நடமாடத் தொடங்கினர். ஊரால் கேள்வி கேட்டால் 'நாங்கள் ரொபர்ட் மஹாத்தயாவின் ஆட்கள்' என்று கூறத் தொடங்கினர். ரொபர்ட்டும் இதைக் கண்டு கொள்ளவில்லை. ஒரு சமயத்தில் ஆத்திரம் எல்லை மீறவே ஊர் மக்கள் ஒரு இரவில் விடுதிக்குள் புகுந்து கலாட்டா செய்து ரொபர்ட்டையும் எமியையும் அடித்தே கொன்று விட்டனர்! இது ஊரில் வயதானவர்கள் சொல்லும் கதை.

அவலச் சாவு அடைந்த அந்த ஆத்மாக்கள் துஷ்ட ஆவிகளாக உலா வருவதாகவும் பல வருடங்களாக ஒரு கதை அந்தப் பகுதியில் நம்பக்கூடிய வகையில் பரவியிருந்தது.

கஹவத்தை, பொறனுவை தோட்டத்திலிருந்து நீர்கொழும்புக்கு வேலைக்குச் சென்றவன்தான் பிரதீப். காலை எட்டு மணிக்கு கட்டடம் கட்டும் மேசன்மார்களுக்கு உதவியாளராக செல்லும் அவன் மாலை ஐந்து மணிக்கு வேலை முடிந்து தங்கும் விடுதிக்கு வந்து விடுவான். வழமை போல் அன்று வேலை முடிந்து விடுதிக்கு வந்த பிரதீப் குளித்து விட்டு தனக்கு கொண்டு வந்து வைக்கப்பட்டிருந்த சாப்பாட்டை திறந்து பார்த்து சலித்துக் கொண்டான். 'சே! டெய்லி பருப்பு, கத்திரிக்காய் சாப்பிட்டு, சாப்பிட்டு நாக்குச் செத்துப் போச்சு. இன்றைக்கு ஒரு நாளைக்காவது இறைச்சி சாப்பிடலாம்' என்று தீர்மானித்துக் கொண்டு ஒரு ஷேர்டை அணிந்து கொண்டான். வெளியே தெரு பக்கமாக உள்ள ஹோட்டலை நோக்கி நடந்தான். அவன் தங்கியிருந்த விடுதிக்கும் ஹோட்டலுக்கும் அரை மைல் தூரம் இருக்கும். இறைச்சிக் கறியோடு இடியப்பம் பார்சலை வாங்கிக் கொண்டு மங்கிய தெரு விளக்கின் வெளிச்சத்தில் அந்தப் பாதையில் அவதானத்துடன் நடந்தான்.
முத்து பூசாரி

தூரத்தில் ஒரு நாயின் ஊளைச்சத்தம் அவன் காதுகளை வந்தடைந்த போது பிரதீப் உடல் கொஞ்சம் ஆடித்தான் போனது. அப்போது அவன் கையில் பிடித்திருந்த சாப்பாட்டு பார்சலை யாரோ பிடித்து இழுப்பதை உணர்ந்த பிரதீப் சட்டென்று திரும்பினான். அப்போது கால் இடறி நிலை தடுமாறி விழுந்தபோது இரண்டு கொள்ளிக் கண்கள் தீப்பந்தங்கள் போல மினுமினுக்க ஒரு நாய் அவனை உற்றுப் பார்த்துவிட்டு இருளில் மறைந்தது. களைத்த நாய் வாயைத் திறந்து மூச்சுவிடும் ஓசை போல ஓசை கேட்டுக் கொண்டே இருந்தது. அதன் பிறகு மூர்ச்சையாகிப் போன பிரதீப்பை அந்த தெருவாசிகள் அறையில் கொண்டு வந்து போட்டார்கள். பிரதீப்பை ஏதோ காத்துக் கறுப்பு அடித்து விட்டதை உணர்ந்த அவன் நண்பர்கள் அவனை பொறனுவையில் உள்ள வீட்டிற்கு கொண்டு வந்து சேர்த்தார்கள். சித்தம் கலங்கியவனாக இருந்த பிரதீப்பை குணப்படுத்தி அவனுக்குள் இருக்கும் அந்த தீய சக்தியை விரட்ட அந்தப் பகுதியில் மிகவும் பிரபல்யமாக இருக்கும் முத்து பூசாரியை அணுகினார்கள் முத்து பூசாரி சகல ஆயத்தங்களுடன் அந்த வீட்டுக்குள் வந்தார். கட்டிலில் கட்டி வைக்கப்பட்டிருந்த பிரதீப்பின் கட்டுகளை முத்து பூசாரி அவிழ்த்த போது பிரதீப் கைகளை பூனை பிராண்டுவது போல பாவனை காட்டி பூசாரி மீது பாய முயற்சித்தான். அவரது உதவியாளர்கள் அவனை அமுக்கிப் பிடித்துக் கொண்டனர். பூசாரி உடனடியாக அவனை மந்திரக் கட்டுப்போட்டு பிரதீப்பின் ஆக்ரோஷத்தை அடக்கினார்.

பிரதீப்பின் உடம்பிற்குள் ஒரு மூர்க்கமான எச்சில் ஆவி குடியிருப்பதை தனது ஞானசக்தியால் முத்து பூசாரி உணர்ந்து கொண்டார். பூசாரியின் சகாக்களால் படையல் போட்டு அமைக்கப்பட்ட சக்கர வியூகத்தில் முத்து பூசாரி அமர்ந்து தனது தாயார் வேலாயியை நினைத்து கும்பிட்டார். அடுத்த நிமிஷம் பிரதீப்பை பூசாரியின் எதிரே அமரவைத்த போது முத்து பூசாரியின் உடல் சிலிர்த்து அவர் சாமியாட்டம் போட்டபடி உடுக்கை கையில் எடுத்து அடித்து உரக்கப் பாடினார். அப்போது பிரதீப்பின் உடம்பில் மறைந்திருந்த தீய சக்தியும் வெளியே வர நேரம் சரியாக இருந்தது. அப்போது பூசாரி கேட்ட கேள்விகளுக்கு பிரதீப்பிடமிருந்து ஆங்கிலத்திலேயே பதில்கள் வரத் தொடங்கின. பிரதீப்புக்கு ஆங்கிலம் தெரிய வாய்ப்பில்லை. எனவே ஆங்கிலம் தெரிந்த ஒரு ஆவியே அவன் உடலில் குடியிருப்பதை பூசாரி உணர்ந்து கொண்டார். பூசாரிக்கும் அவ்வளவாக ஆங்கிலம் வராது என்பதால் இக்குழப்பத்தை எப்படிப் போக்குவது என்று ஒரு கணம் குழம்பிப் போனார் முத்துப் பூசாரி. பிரதீப் உடம்பிற்குள் இருப்பது ஒரு அந்நிய நாட்டைச் சேர்ந்த பேய் என்பது மட்டும் அவருக்கு புரிந்தது. உடனே தனது சித்து விளையாட்டை பயன்படுத்தி பிரதீப்பின் நாக்கை வெளியே இழுத்து அந்த நாக்கில் தமிழின் அட்சர கோட்டை சட்டென வரைந்தார் பூசாரி. மறு விநாடியே ஆங்கிலப் பேய் தமிழில் பேசத் தொடங்கியது.

"டேய் பூசாரி! நான் தாண்டா ரொபர்ட்! நான் இந்தோனேசியாக்காரண்டா, என்னையும் என் மனைவி எமியையும் கொலை செய்தவர்களை கொல்லத்தான்டா ஆவியா அலையிறோம்" என்று பேய் கர்ஜித்ததை கேட்ட ஊர்வாசிகள் குலை நடுங்கிப் போனார்கள். உடனே பூசாரி அதுக்கு நீ சம்பந்தப்பட்டவர்களைத்தானே பழிவாங்கனும்? இவன் என்ன செய்வான், பாவம் அப்பாவி! என்றார் பதிலுக்கு.
முகத்தை ஒரு வெட்டு வெட்டி கீழ்ப்பார்வையில் பூசாரியை முறைத்த அந்த ஆவி "டேய் அவன் என்னை தலையில் அடிச்ச பண்டார மாதிரி இருக்காண்டா" என்று சொல்ல, பூசாரி விடுவதாக இல்லை... பேயிடம் பேரம் பேசி அதை மிரட்டி ஒரு முடிவுக்கு கொண்டு வந்தார். தன்னை பூசாரி எரித்து விடுவார் என்று பயந்த ரொபர்ட், பிரதீப்பின் உடம்பை விட்டு வெளியேற சம்மதித்தது. ஆனாலும் முத்து பூசாரி அவனை நம்பத் தயாரில்லை.

"ஏய் நீ இந்தோனேஷியன்னா நான் சிலோன்காரன்டா என்னை ஏமாத்த நினைச்ச... அப்புறம் நீ எரிஞ்சு சாம்பலாகிடுவ, அதனால நீ இவன் உடம்பை விட்டுப் போகும்போது எனக்கு என்ன மாதிரி சமிக்ஞை தருவாய்?" என்று கேட்டார்.

"நான் சரியாக விடியற்காலை மூன்று மணிக்கு உடம்பை விட்டு வெளியேறும் போது வீட்டின் முன்னால் உள்ள பலா மரத்து கிளை உடைந்து விழும்" என்று கூறினான். பூசாரிக்கு வாக்குக் கொடுத்தப்படியே தீய சக்தி வெளியேறும் போது அதற்கு ஒரு முழுக் கோழி தீயில் வாட்டி கொடுக்கப்பட்டது. கண் மூடித் திறக்கும் வேளைக்குள் முழுக் கோழியையும் அந்தத் தீய ஆவி கபளீகரம் செய்ததைப் பார்த்து கூடியிருந்தவர்கள் அசந்தே போனார்கள்! கோழி எலும்புகள் மட்டும் சடசடவென கீழே விழுந்தன. அடுத்த நிமிடமே பலா மரக்கிளையும் முறிந்து விழுந்தது! பேய் தள்ளாடிய அந்தக் கணத்தை பயன்படுத்தி பிரதீப்பின் உச்சி தலைமயிரை கத்தரித்து போத்தலில் போட்டு அடைத்த பூசாரி அதை முச்சந்தியில் போட்டு எரிக்க சகாக்களோடு ஊர் எல்லையை நோக்கிப் புறப்பட்டார்.

"ஏய் முத்து பூசாரி என்னை எரிச்சுடாதே... என் காதல் மனைவி 'எமி' என்னை எதிர்பார்த்து நீர்கொழும்பில் காத்திருக்கா என்னை விட்டுடுயா" என்று ரொபர்ட் ஆவி கெஞ்சத் தொடங்கியது. அந்தத் துஷ்ட ஆவியின் மாய்மாலத்தை காதில் வாங்காத முத்துப் பூசாரி மனதை திடப்படுத்திக் கொண்டு எரியும் தீயில் போத்தலைப் போட்டார்!

பேய்களுடன் டீல்!


கஹவத்தை பகுதியில் முத்துப் பூசாரியும் ஒரு பிரபலமான நபர்தான். பூவான் மருதை என்பது இவரின் நிஜப் பெயர். தாம் அடக்கும் பேய் மற்றும் துஷ்ட ஆவிகளின் கொடூரத் தன்மைகளை அறிந்து அவற்றை எரிப்பதா, புதைப்பதா, கரைப்பதா என்பதை தீர்மானித்துக் கொள்வாராம். பேய்களை பிடித்து போத்தலில் அடைத்து அவற்றின் கதைகளை முடிக்கப் போகும்போது முத்து பூசாரியிடம் பேய்கள் மன்றாடி உயிர்பிச்சை கேட்குமாம். சில நேரங்களில் மனமிரங்கும் முத்து, அந்த ஆவி அல்லது பேய் ஆபத்து அற்றவையாக இருக்குமானால் பிழைத்துப் போகட்டும் என்று உறுதிமொழி வாங்கிக் கொண்டு விட்டு விடுவாராம். அப்படி பூசாரி பேய்களை வெளியே விட்ட விசயத்தை சம்பந்தப்பட்ட வீட்டுக்காரர்களுக்கு சொல்வதில்லை. சில பேய்களிடம் வியாபார டீல் பேசி, தமது பேய்விரட்டும் வேலைகளுக்கு உதவுவதாக அவைகள் சம்மதித்தால் ஒப்பந்தம் போட்டு அவைகளை வெளியே விடுவதும் உண்டாம். முத்து மட்டுமல்ல, ஏனைய வித்தை தெரிந்த பூசாரிமாரும் பேய், ஆவிகளுடன் பேசி தமது வேலையாளாக வைத்துக் கொள்வது வழக்கம்தான். சில நேரங்களில் பூசாரியின் சகாக்கள் "பூசாரி, நமக்குத்தான் வேலை குறைவாக இருக்கிறதே! எரிக்கப் போகும் அந்தப் பேயை திறந்து விட்டால், அவை மீண்டும் யாரையாவது பிடிக்கும். நமக்கு பேய் ஓட்டும் வேலையும் கிடைக்குமே"  என்று யோசனை சொல்வதுண்டு. ஆனால் முத்து பூசாரி செய்யும் தொழிலை தெய்வமாக மதிப்பதால் தம்மை நம்பியோருக்கு துரோகம் செய்வதில்லையாம்

face பக்கம்

Saturday, January 10, 2015

தைப் பொங்கல் சிறப்பு சந்திப்பு

தமிழுக்கு எண் வரிவடிவங்களை உருவாக்கி இருக்கும் தமிழ் புகழேந்தி


நேர் கண்டவர்: மணி ஸ்ரீகாந்தன்

'இந்திய மொழிகளில் தமிழைத் தவிர ஏனைய மொழிகளுக்கு சொந்தமாக எண்கள் உண்டு. செம்மொழியான தமிழுக்கு எண்கள் இல்லை என்பதால் எளிமையான வழிமுறை ஒன்றை உருவாக்கியுள்ளேன்'


'பெரியாரின் எழுத்து சீர்திருத்தங்களை அரசு அங்கீகாரத்தோடு நடைமுறைப்படுத்தும் தைரியம் எம். ஜி. ஆருக்கு இருந்தது. ஆனால் எனது தமிழ் எண் சீர்திருத்த அறிக்கையைப் பார்த்துவிட்டு இப்போது இது அவசியம் இல்லை என்று கிடப்பில் போட்டுவிட்டது தமிழக அரசு'

'யாமறிந்த மொழிகளில் தமிழ் மொழிபோல் இனிதாவதெங்கும் காணோம்' என்று மகாகவி பாரதியார் பாடிச் சென்றார். உலகில் 6800 மொழிகள் உள்ளன. world watch institution  என்ற அமெரிக்க நிறுவன அறிக்கையின்படி இவற்றில் இரண்டாயிரம் மொழிகள் முக்கியத்துவம் பெறுகின்றன. இந்த வரிசையில் தமிழ்மொழி முதலிடம் வகிக்கிறது. தமிழ், சமஸ்கிருதம், இலத்தீன், கிரேக்கம், ஈப்ரு ஆகிய மொழிகளில் தமிழ் மட்டுமே வாழும் மொழியாக இருக்கிறது. தமிழ் மொழி செம்மொழி அந்தஸ்து பெற்று இருந்தாலும் அதிலும் சில குறைபாடுகள் இருக்கத்தான் செய்கின்றன. குறிப்பாக தமிழில் எண்கள் இல்லை. இதை ஒரு குறைபாடாக வரலாற்று ஆய்வாளர்கள் குறிப்பிடுகிறார்கள். 'எண்ணும் எழுத்தும் கண்ணெனத் தகும்' என்று சொல்கிறார்கள். அப்படியென்றால் ஒரு மொழிக்கு எண்ணும் எழுத்தும் கட்டாயம் இருக்க வேண்டாமா? அப்போதுதான் அது முழுமையான மொழியாகத் திகழ முடியும்? தமிழ் எண்கள் ஆயிரத்தில் ஒருவருக்குக் கூட முழுமையாகத் தெரிவதில்லை, பெரிய அறிஞர்கள், பேராசிரியர்களுக்குக் கூடத் தமிழ் எண்களில் பரிட்சியம் கிடையாது. அதை யாரும் பொருட்படுத்துவதும் இல்லை. 'கற்றுக்கொள்ளவும் மனதில் இருத்தவும் சிரமமாக உள்ளது, புரியவில்லை' என்பதே இதற்கு சொல்லப்படும் காரணம். இதில் உண்மை இருக்கத்தான் செய்கிறது. இந்தக் குறைபாட்டை நீக்குவதற்கான ஒரு இலகுவான வழியைக் கட்டு பிடிப்பதற்காக பல ஆண்டுகளைச் செலவிட்டு இறுதியாக ஒரு வழியைக் கண்டு பிடித்து இருக்கிறார் ஒருவர்.
இவர் தமிழகத்தைச் சேர்ந்தவர். தமிழக தொல்லியல், கல்வெட்டு அறிஞரான இவர் பெயர் தமிழ் புகழேந்தி. இவர், 'மொழிகள் பலவும் கற்போம் கலப்பின்றித் தமிழைப் பேசுவோம், எழுதுவோம்' என்பதை தாரக மந்திரமாகக் கொண்டு 'தமிழர் உலகம்' என்ற பெயரில் மாதாந்த சஞ்சிகை ஒன்றையும் வெளியிட்டு வருகிறார்.

ஒரு இனிய மாலை வேளையில் வேலூர் சாய்நாதபுரத்திலுள்ள அவரின் இல்லத்தில் சந்தித்துப் பேசினோம்.

"என்னுடைய தமிழ் ஆராய்ச்சியில் நம்மொழிக்கு எண்கள் கிடையாது என்பதை அறிந்து கொண்டேன். நாம் இப்போது பயன்படுத்துவது கிரந்த எண்கள். கி.பி. 5 ஆம் நூற்றாண்டில் கிரந்த மொழி உருவாக்கப்பட்டபோது இந்த எண்கள் உருவாக்கப்பட்டன. இவை தமிழ் எண்கள் கிடையாது, அவற்றை எழுத்து மூலம் எழுதியுள்ளனர். ஒன்று, பத்து, நூறு என்று எண் குறியீடுகள் இல்லை. இந்தியாவில் எழுதப்படக்கூடிய எல்லா மொழிகளுக்கும் எண்கள் உள்ளன. செம்மொழியான தமிழுக்கு மட்டும் சொந்தமாக எண்கள் இல்லை. மற்ற நாட்டினர் நம்மைப் பார்த்து, 'பழமையான செம்மொழி என்கிறீர்களே, ஏன், உங்களுக்கு மட்டும் எண்கள் இல்லை?' என்று கேட்டால் என்ன பதில் சொல்வது? இது பெரும் குறையாக இருக்கிறது. இந்தக் குறையை நிவர்த்தி செய்ய அதை நானே வடிவமைக்க முயற்சி செய்தேன். பல வருடங்களாக முயற்சி செய்து தேடியதில் ஒரு நல்ல வடிவம் கிடைத்தது. அதாவது வார்த்தையின் முதல் எழுத்தை எண்களாகக் கொண்டு எழுதும் முறையே இது.

ஒன்று என்பதை ஒ, இரண்டு என்பதை இ, மூன்று என்பதை மு இப்படியாக வடிவமைத்தேன். இது மிகவும் எளிமையாக இருந்தது. இதை வைத்து இப்போது நாம் பயன்படுத்தும் ரோமன் எழுத்துக்கு நிகராக எழுத முடியும். கணக்குப்போட முடியும். இந்தக் கணக்கு முறையைப் பார்ப்பவர்கள் பத்து நிமிடத்தில் தமிழில் கணக்கு எழுதும் ஆற்றலை பெற்றுவிடுவார்கள்" என்று அந்த கணக்கு அட்டவணையை எம்மிடம் கையளித்த தமிழ்ப் புகழேந்தி தொடர்ந்து பேசினார்.

இந்தக் கணக்குமுறை உலகளாவிய ரீதியில் தமிழர்கள் மத்தியில் பயன்பாட்டுக்கு வருவதாக இருந்தால் தமிழக அரசு பரிந்துரை செய்து அங்கீகாரம் அளிக்க வேண்டும். அதற்கான முயற்சியிலும் இறங்கினேன். தமிழ் வளர்ச்சிக்காக எம்மோடு கரம் சேர்த்து பாடுபடும் வேலூர் வி.ஐ.டி பல்கலைக்கழக வேந்தர் கோ. விஸ்வநாதன் நான் தயாரித்த எண் அட்டவணையைப் பார்த்து என்னைப் பாராட்டினார். அதை ஒரு கையேடாகவும் வெளியிட்டு கௌரவம் அளித்தார். இந்த எண்முறை சிறப்பாக இருப்பதாக பலரும் ஏற்றுக் கொள்கின்றனர். ஆனால் தமிழக அரசோ நாம் விடுத்த வேண்டுகோளுக்கு 'இப்போதைக்கு இது அவசியமில்லை' என்பதாக பதில் தந்தார்கள்" என்று தமிழ் புகழேந்தி கூறி விரக்தியோடு பெருமூச்சு விடுகிறார்.
வி.ஐ.டி. வேந்தர்      
கோ.விஸ்வநாதனுடன்
அப்படியென்றால் தமிழ்மொழி அமுலாக்களில் தமிழ்நாடு அரசு போதிய அக்கறை எடுத்துக்கொள்வதில்லை என்று சொல்கிறீர்களா? என்று கேள்வி எழுப்பினோம்.

"அக்கறை இருந்தால் இப்படிச் சொல்வார்களா... தமிழ்மொழி மீது பற்றுள்ளவர்கள் ஆட்சியில் இருந்தால் மட்டுமே தமிழ் வளர்ச்சியடையும். தந்தை பெரியாரின் எழுத்து சீர்திருத்தங்களை உத்தியோகபூர்வமாக நடைமுறைப்படுத்தியவர் எம். ஜி. ஆர்தான். அதன் பின்னரேயே உலகளாகவிய அளவில் அது பயன்பாட்டுக்கு வந்தது. ஆனால் அவருக்குப் பிறகு பதவிக்கு வந்த யாரும் தமிழ் எழுத்துக்கள் பற்றி சிந்திக்கவே இல்லை" என்று கொஞ்சம் சூடாகவே பதில் அளித்தார் தமிழ்புகழேந்தி.

சிங்கள மொழியில் D.F. போன்ற வல்லின உச்சரிப்பு இருக்கிறது. தமிழில் இன்னும் இந்தக் குறைபாடு நீடிக்கிறதே...? என்று எமது சந்தேகத்தை எழுப்பினோம்.

"தமிழ் ஒரு செழுமையான மொழி. ஆனால் சில குறைபாடுகள் இருக்கத்தான் செய்கின்றன. அவற்றை ஆராய்ச்சிகள் மூலமாக கண்டறிந்து நிவர்த்தி செய்வது காலத்தின் கட்டாயம். இப்படி தமிழில் விடுபட்ட எழுத்துக்கள் நிறைய இருக்கிறது. விடுபட்ட எழுத்துக்கள் என்பதைவிட தமிழ் அட்டவணையில் இல்லாத எழுத்தையே பயன்படுத்துகிறோம். தமிழ், சமஸ்கிருதம், கிரந்தம் உள்ளிட்ட மொழிகள் எப்போது தோன்றின என்பதை ஆய்வு செய்யும்போது ஸ.ஜ இரண்டும் தமிழ் எழுத்துக்கள்தான் என்று தெரியவந்தது. கிரந்தம் உருவாவதற்கு 700 ஆண்டுகளுக்கு முந்திய தமிழ்பிராமி கல்வெட்டுக்களில் ஸ.ஜ எழுத்துக்கள் உள்ளன. இதை சிலர் ஏற்றுக்கொள்ள மறுக்கிறார்கள்.
தமிழ் சீர்திருத்தம் பற்றி
பெரியாருடன்
கலந்துரையாடும் எம்.ஜி.ஆர்.


இதை கிரந்தம், சமஸ்கிருதம் என்கிறார்கள். ஆய்வு செய்து பலரும் தமிழ் மொழியின் வரலாற்றை தெரிந்து கொள்ள வேண்டும் அ.முதல் ன வரை 30 எழுத்துக்கள் என்று தொல்காப்பியத்தில் உள்ளது. அதில் ஸ.ஜ.வும் சேர்த்தால்தான் 30 எழுத்துக்கள் வரும். விடுபட்டால் வராது. இது ஒரு சான்று. அடுத்து, ஸ.ஜ வை தவிர்த்துவிட்டு தமிழை பயன்படுத்த முடியாது. இதுவும் ஒரு சான்று. இந்த வரலாற்று உண்மைகள் நமக்கு தெரியாமல் போனதற்கு காரணம் உண்டு. 600 ஆண்டுகளாக தமிழகத்தைத் தமிழர் அல்லாதவர்களே ஆட்சி செய்ததால்தான் தமிழ் மொழிக்கு இக்குறைபாடுகள் ஏற்பட்டிருக்க வேண்டும்" என்று ஆதாரங்களோடு அடித்துச் சொல்கிறார் புகழேந்தி.

"பதின்மூன்று எழுத்து சீர்திருத்தங்களின் பின்னரேயே தமிழை கணினியில் ஏற்றுவது இலகுவானதாயிற்று. தமிழாராச்சி மாநாடு, செம்மொழி மாநாடுகளில் நம்மவர்கள் ஆய்வுக் கட்டுரைகளைச் சமர்ப்பிக்கிறார்கள். அத்தோடு கதை சரி. பலகோடி ரூபா செலவில் நடாத்தப்படும் இம்மாநாடுகளில் தமிழ் வளர்ச்சிக்கு ஏதாவது நடந்ததாக இல்லை" என்று தமது ஆதங்கத்தை வெளிப்படுத்தும் தமிழ் புகழேந்தியிடம்,

'பிரியதர்ஷனி, பிரியா போன்ற பெயர்களை சிலர் ப்ரியதர்ஷனி, ப்ரியா என்று எழுதுகிறார்களே இது தவறுதானே....?' என்று எமது சந்தேகத்தை எழுப்பினோம்.

"அது மாபெரும் தவறு. குற்றெழுத்தில் ஒரு வாக்கியம் எப்படி தொடங்கலாம்? நீங்கள் ப்ரியாவைப் பற்றி பேசுகிறீர்கள் ஸ்டாலினை மறந்து விட்டீர்களே! தமிழ் அறிஞர் கலைஞர் எப்படி தனது மகனின் பெயரை ஸ்டாலின் என்ற குற்றெழுத்தில் தொடங்க அனுமதித்தார் என்பது எனக்கே விளங்கவில்லை" என்று கண்களில் ஆச்சர்யம் காட்டுகிறார் இவர்.
"தமிழ் நாட்டில் தமிழ் சிறப்பாக இல்லை. மற்ற நாடுகளில் சிறப்பாக இருக்கிறது. ஆனால் அது நமக்கு முக்கியம் இல்லை. சங்கம் வைத்து தமிழ் வளர்த்த தமிழ் தோன்றிய நம் நாட்டில்தான் அது சிறப்பாக இருக்க வேண்டும். நிறைய பிழைகளை நாம் செய்கிறோம். தந்தையின் முதல் எழுத்தை ஆங்கிலத்தில் எழுதி விட்டு தன் பெயரை எழுதுவது, ஆங்கில வார்த்தையை தமிழில் எழுதுவது போன்றவற்றைக் குறிப்பிடலாம்.

ஆங்கிலம் உலக மொழி. நாம் அனைவரும் அதை கற்க வேண்டும். ஒவ்வொரு மொழியும் ஒரு கண் போன்றது. மொழிகளைப் பயில்வதில் தவறில்லை. ஒவ்வொருவரும் நான்கு மொழியாவது தெரிந்து வைத்திருக்க வேண்டும்" என்று கூறிய தமிழ்புகழேந்தி தமது நேர்காணலை நிறைவு செய்தார்.

சினிமானந்தா பதில்கள் -21

ஹாய் சினிமானந்தா 'லிங்கா' பாத்துட்டீங்களா?
ரஜினியின் இளமை ரகசியம் என்ன?
எஸ். சுஜி. சுன்னாகம்

பிறந்தநாள் கேக்குக்கு பதிலாக அனைவருக்கும் இம்முறை படம்
கொடுத்திருக்கிறார் ரஜினி. சங்கர் படத்தைப் போல செய்ய முயன்றிருக்கிறார் கே. எஸ். ரவிக்குமார். ஆனால் அவரது முன்னைய படங்களைப் போல்தான் இதுவும் இருக்கிறது.

மேக்அப் வுமன் பானுவின் கைங்கரியம் அது. வேறு ரகசியம் கிடையாது அவ்வளவும் தொழில்நுட்பம்.

360 நாட்கள், 200க்கும் மேற்பட்ட படங்கள். தாங்குமா தமிழ்நாடு?
லக் ஷான், யாழ்ப்பாணம்

சினிமாப்பித்து எவ்வளவு தூரம் இங்கு தலைவிரித்தாடுகிறது என்பதைத்தான் இது காட்டுகிறது.
 அடுத்த முதல்வர் சீட்டுக்கு சினிமாக்காரர்கள் குறி வைப்பதும் இதனால்தான்.

விஜய், சூர்யா, அஜித் இவர்களில் அதிகமான ரசிகர்களை பெற்றிருக்கும் நடிகர் யார்?
கவிதா, ஹேவாகம பாதுக்க

இன்னொருவர் இருக்கிறார். அவருக்குத்தான் அந்தப் பெருமை.
6 முதல் 66 வரை அவருக்கு ரசிகர்கள் இருக்கிறார்கள்.

நயன்தாரா அடுத்து யாரை காதலிக்கப் போகிறார்?
எஸ். பி. நாதன், கண்டி

எந்தவொரு தொழிலதிபரையும் நயன் இதுவரை காதலித்ததாக தெரியவில்லை. அவருக்கு நடிகர்களை மட்டுமே பிடிக்கிறது. ஆனால் அனைவருக்கும் (என்னையும் உங்களையும் சேர்த்துத்தான்) அவரைப் பிடிக்கிறது.

பாவம் விஜய் சேதுபதி ('நானும் ரவுடிதான்' படத்தில் அவரது ஜோடி)

திரிஷாவின் குடும்பத்தை பற்றி கொஞ்சம் சொல்வீர்களா?
டி. பிரியதர்ஷினி, தெமோதர

திரிஷாவின் குடும்பத்தில் புதிதாக சேர்ந்திருப்பவர் வருன் மணியம். இவர்தான் மாப்பிள்ளை சிங்கம்.
திருமணப் படங்கள் வானவில் அல்பத்தில் வரும். அப்போது குடும்பப்படங்களும் வரும். பார்த்துக்கொள்ளுங்கள்.

சிம்ரனுக்கு குழந்தை இருக்கா?
ஏ. சி. பர்வீன், பொத்துவில்

குழந்தைகள் (2) இருப்பதனால்தானே சிம்ரனை ஒதுக்கிவிட்டார்கள். இல்லையேல்
சிம்ரன் இன்னும் பஞ்சாப் லட்டு.

அசின் பொலிவுட் பக்கம் போய் விட்டாராமே?
சாமா, கண்டி

நடிகைகளுக்கு படம் இருந்தாலும் ஆயிரம் பொன். இல்லாவிட்டாலும் ஆயிரம் பொன். எல்லாம் பழகுபவர்களை பொறுத்தது.

நினைத்தால் இப்போது கூட அசினுக்கு மலையாள பக்கம் போகலாம். போகமாட்டார். ஏனெனில் அங்கு பொன் குறைவு.