Tuesday, March 11, 2014

சினிமானந்தா பதில்கள்-11

அஜீத் மீண்டும் கறு முடியுடன் இளமைக்கு திரும்புகிறாராமே?


எம். சோலைமலை, அவிசாவளை

எத்தனை நாளைக்கு நரை முடி என்று "வண்ண வானவில்" கேட்டிருந்ததே ஞாபகமில்லையா?

'மங்காத்தா', 'ஆரம்பம்' படங்களுக்கு அந்த ஸ்டைல் ok. ஆனால் குடும்பப் படமான வீரத்துக்கு ஒத்துவரவில்லை என்று பல பத்திரிகைகள் குத்திக்காட்டியிருந்தன. அது அஜீத்தின் காதுகளுக்கு எட்டியிருக்கிறது. அதுதான் இந்த மாற்றம்.

கறு முடியுடன் 'வாலி'யில் அஜீத்
மறக்க முடியாத வில்லத்தனம்
அது இப்போது அவசிய தேவை


'கோலி சோடா' வெற்றிப்படமா?

மணிவண்ணன், யாழ்ப்பாணம்

வெற்றிப்படம்தான். அழியாத கோலங்களின் 2 ஆம் 3 ஆம் பதிப்புகள்தான்
பசங்க, கோலிசோடா

இந்த வெற்றி பார்முலாவில்
தொடர்ந்து பல படங்கள் வரலாம்

பவர் ஸ்டார் பற்றிய செய்திகளை பார்க்க முடியவில்லையே. என்னாச்சு பவர்ஸ்டாருக்கு?

எஸ். ராஜேஸ்வரி கண்டி

கோலி சோடாவில் வருகிறாரே. அந்தப் படத்தில் நடித்ததற்கு சம்பளம் சரியாக
கிடைக்கவில்லை என்று நாயாக கத்திக்கொண்டு பேயாக அலைந்தார். எவருமே கணக்கில் எடுக்கவில்லை.

ஆத்திரத்தில் பழி தீர்க்க
'ஆன (ஏனி)ந்த தொல்லையை
வெளியிடப் போகிறாராம்.


நமீதாவை காணோமே?

கே. எஸ். ராஜன் - வவுனியா

திரையில்தானே காணோம், நகைக்கடை, ஜவுளிக்கடை திறப்பு விழாக்களில்
நமீ ரொம்ப பிசி

திரையை நிரப்புவதை விட
கடையை திறப்பது நமீக்கு பிடிக்கிறது


சினிமாவில் தனக்கு உள்ள இடத்தை தக்கவைத்துக்கொள்ள அதீத் முயற்சி எடுக்கும் நடிகை என்று யாரைச் சொல்லலாம்?

சத்தியாராணி - பதுளை

திரையில் மட்டுமன்றி உண்மையிலேயே நடிக்கும் நடிகை யார் என்றுதானே கேட்கிறீர்கள்... ஏன் ஹன்சிகாவை சொல்லலாமே. முன்வரிசை நடிகர்களுடன் மட்டுமன்றி சிவகார்த்திகேயன், ஜெயப்பிரதாவின் மகன் புதுமுகம் சித்தார்த் ஆகியோருடனும் நடிக்கிறார் ஹன்சிகா. இவர்களுடன் நடித்தால் மார்க்கெட்
நிலைக்குமா என்று கேட்பவர்களிடம், எனக்கு எங்கே தொய்வு என்று திருப்பிக் கேட்கிறார். "பெரிய ஹீரோக்களுடன் நடிக்கும் படம் சொதப்பினால் நான் ராசியில்லாத நடிகையாகிவிடுவேன். ஆனால் கெட்டியான கதை இருந்தாலும் குட்டி ஹீரோவுடன் கூட படம் வெற்றி பெறும் அப்படி நடிக்கும்போது நான் வெற்றி நடிகை என்பதுடன் சம்பளமும் மெல்ல மெல்ல அதிகரிக்கும்" என்கிறார் ஹன்ஸி.

மறு பக்கத்தில் சிம்புவுடன் உள்ள தொடர்பினால் ஹன்ஸி அடிக்கடி பேசப்படுகிறார். இப்படி நாலாபுறமும் பேசவைக்கும் வகையில் செயல்படுகிறார் ஹன்ஸி.

வித்தை தெரிந்த நத்தை - ஹன்ஸிகா

மிருகங்களை வைத்து படமெடுத்து வந்தாரே இராமநாராயணன். இப்போது ஏன் அவ்வாறான படங்களை எடுப்பதில்லை

எஸ். ராஜேந்திரன் - கொழும்பு

தேவருக்கு பிறகு மிருகங்களை வைத்து பல படங்களை எடுத்தவர் இராமநாராயணன். அவை நன்றாகவும் ஓடின. ஆனால் இப்போது மிகவும்
நேர்த்தியாக எடுக்கப்பட்ட பல ஆங்கில அனிமேஷன் படங்கள் மொழி மாற்றம் செய்யப்பட்டு தமிழ்நாட்டில் குறிப்பாக சென்னையில் சக்கை போடு போடுகின்றன. இந்த படங்களுக்கென்றே சில தியேட்டர்களை பாடசாலை விடுமுறை நாட்களில் ஒதுக்கிவிடுகிறார்கள்.

இராமநாராயணன் காட்டில்
இப்போது சுட்டெரிக்கும் வெயில்


நன்றி- வண்ண வானவில்

Thursday, March 6, 2014

இரா. முருகவேளுடன் ஒரு மனந்திறந்த உரையாடல்

“எரியும் பனிக்காட்டுக்கு நியாயம் செய்யாத பரதேசி ஒரு குப்பைப்படம்!”

 

மணி  ஸ்ரீகாந்தன்


'திரைக்கதை, பேசிய அரசியல், கெமரா, இசை, இயக்கம் என எல்லாத் தளங்களிலும் தோல்வியடைந்த வறட்சியான படம் அது'

'ஆசிரியர் டேனியலை பாலாவும் நாஞ்சில்நாடனும் கங்காணி என்று கொச்சைப்படுத்திய விதம் மன்னிக்க முடியாதது'

'அந்த டாக்டர் பாத்திரத்துக்கு அம்பேத்கர் போல உடையணிவித்திருந்தது சகிக்க முடியாதது'
தமிழகத்தின் வரண்ட பகுதிகளில் இருந்து இலட்சக்கணக்கான இந்தியர்கள், குறிப்பாகத் தமிழர்கள், உலகின் பல பாகங்களுக்கு பயிர்ச்செய்கை மற்றும் சுரங்கத் தொழில் தொழிலாளர்களாக வெள்ளையர்களினால் அழைத்துச் செல்லப்பட்டது. ஒரு கண்ணீர் வரலாறு

இவர்களின் வாழ்க்கை வரலாறு இவர்கள் சென்ற நாடுகளில் பதிவு செய்யப்பட்டுள்ள போதிலும் இவர்களின் சொந்த நாடான தமிழகம் இவர்களை முற்றிலுமாக மறந்து விட்டது. எந்தவொரு புத்தகமும், பதிவும் கிடையாது. இதனால்தான் சாமானிய தமிழனுக்கு, இலங்கையில் இந்திய வம்சாவளித் தமிழர்கள் என்றொரு இனம் வாழ்வதே தெரியாத விஷயமாகி இருக்கிறது.

தமிழகத்திலும் கூட, வரண்ட பகுதிகளைச் சேர்ந்த ஏழைத் தமிழ்க் குடும்பங்களை மாய வார்த்தைகள் மூலம் மசிய வைத்து மலைப்பாங்கான தேயிலைத் தோட்டங்களுக்கு கங்காணிமார் அழைத்துச் சென்று அடிமைகளைப் போல அவர்களை நடத்தியிருக்கின்றனர்.

இக்கண்ணீர் வரலாறு கூட பதிவு செய்யப்படவில்லை. அதை முதலில் எழுத்தில் கொண்டு வந்து இந்திய படித்த சமூகத்தை அதிர்ச்சிக்குள்ளாக்கியவர் ஒரு கிறிஸ்தவ பாதிரியார். அவர் பெயர் டேனியல். அவர் எழுதிய நாவலின் பெயர் 'ரெட் டீ' என்பதாகும். பிற்காலத்தில் 'எரியும் பனிக்காடு' என்ற பெயரில் இது தமிழில் வந்து, தமிழ் வாசகர்களை உலுக்கிப் போட்டது. இந்நாவலைத் தழுவியே 'பரதேசி' என்ற திரைப்படத்தைத் தயாரித்து பெயர் பெற்றார் இயக்குநர் பாலா. ரெட் டீ ஆங்கில நூலை தமிழில் மொழி பெயர்த்தவர் இரா. முருகவேள்.
அந்தக் கண்ணீர் கதையை முதல் முறையாக படம் பிடித்து வெள்ளித்திரையில் சினிமாவாக காட்டிய பெருமை இயக்குநர் பாலாவை சாரும். 'ரெட் டீ' என்ற ஆங்கில நாவலை அப்படியே பாலா பரதேசியாக பதிவு செய்திருந்தார்.

பரதேசி படத்தைப் பார்த்த முருகவேளுக்கு தூக்கிவாரிப் போட்டிருக்கிறது. தன் நூலுக்கு பாலா நியாயம் செய்யவில்லையே என்று பதைபதைத்து போனார். இது தொடர்பாக முருகவேளுடன் தொடர்பு கொண்டு பேசினோம்.

கோவையில் சட்டத்தரணியாக பணியாற்றும் முருகவேளுக்கு இலக்கியத்திலும் வரலாற்றிலும் ஆர்வம் அதிகம். மனைவி, இரண்டு பெண் குழந்தைகளோடு கோவையில் வசித்து வருகிறார்.

"நான் சொந்தமாக சிறுகதைகளும், கட்டுரைகளும் எழுதியிருக்கிறேன். எனது 'மிளிர்கல்!' என்ற நாவல் இம்மாதம் வெளிவரவிருக்கிறது. இது தமிழகத்தில் இரத்தினக்கல் விளையும் காங்கேயம் ஊரைப் பற்றிய கதை. இரத்தினக்கல்லோடு வாழ்க்கை நடத்துபவர்கள் பற்றிய ஒரு பதிவு. விரைவில் இதை நீங்கள் படிக்கலாம்; ஒரு ஆவணப்பட முயற்சி தோல்வியடைந்த பலவீனமான   தருணத்தில்      மொழிபெயார்ப்பாளனாக மாறினேன். மற்றபடி மொழிபெயர்ப்பின் மீது பெரிய காதலெல்லாம் கிடையாது." என்கிறார் முருகவேள்.


ரெட் டீ நூலை மொழி பெயர்த்ததற்கு ஏதேனும் காரணம் உண்டா?

"நான் கோயமுத்தூரைச் சேர்ந்தவன். தமிழகத்தில் மிக அதிக தேயிலைத் தோட்டங்கள் உள்ள நீலகிரியும், ஆனைமலைகளும் எங்கள் ஊருக்கு அருகே இருக்கின்றன. எனவே மலைக்கு வேலைக்குப் போகிறவர்கள் மலையிலிருந்து திரும்பியவர்கள் என்று பலர் எப்போதும் இருப்பார்கள். எங்கள் குடும்பத்திலேயே கூட ஒரு எழுத்தாளரைத் திருமணம் செய்து கொண்டு வால்பாறைக்குப் போன எனது பெரிய அத்தை மலேரியா வந்து இறந்த கதையைக் கேட்டிருக்கிறேன்.

மலைகளின் அற்புதமான அழகுக்குப் பின் வேறு ஏதோ இருக்கிறது என்ற எண்ணம் எனக்கு இருந்து கொண்டே இருந்தது. 'துன்பக் கேணி'தான் மலைகளின் மறுபக்கத்தை முதல் முதலில் அறிமுகப்படுத்தியது. ஆனாலும் அது ஒரு பெரிய சிறுகதை மட்டுமே. ஒரு மாபெரும் சோகத்தை பதிவு செய்தே ஆக வேண்டும் என்ற நோக்கிலேயே தனது வரலாற்றுக் கடமையை ஆற்றும் விதத்திலேயே புதுமைப்பித்தன் அந்தக் காலத்தில் கிடைத்த விவரங்களைக் கொண்டு அற்புதமாக எழுதியிருந்தார். இதை முழுமையான ஒரு நாவல் எழுத வேண்டும் என்று தேடியும் படித்தும் வந்தேன். ஆனைமலைத் தோட்டத் தொழிற்சங்கத் தலைவர்களிடம் கேள்வி கேட்டுக் குடையும் போது தொல்லை தாங்காமல் ஒருவர் 'ரெட் டீ' யைக் கொடுத்து, எல்லாமே இதில் இருக்கிறது என்றார். அவர் சொன்னது முழுவதும் சரி.

எவ்வளவு விவரங்கள் தேடிச் சேர்த்தாலும் நேரடியாக வால்பாறையில் வாழ்ந்து போராடிய டேனியல் போல எழுதிவிட முடியாது என்று தோன்றியது. எனவே அதை மொழிபெயர்ப்பது என்று முடிவு செய்தேன்" என்றவரிடம் பரதேசி பற்றிக் கேட்டோம்.

"பரதேசி ஒரு குப்பைப்படம். எரியும் பனிக்காட்டை அல்லது ரெட் டீயை அது முழுவதுமாகச் சிதைந்து விட்டது. சொல்லப்போனால் முதல் பாதி முழுவதும் அது வேறு ஏதோ கதை.

திரைக்கதை, பேசிய அரசியல், பாத்திரங்கள், கேமரா, இசை இயக்கம் என எல்லாத் தளங்களிலும் தோல்வியடைந்த வறட்சியான படம் அது. கட்டிப் பிடித்து ஒப்பாரி வைத்து துயரத்தை விற்பனைப் பொருளாக்கும் மலினமான தந்திரம்தான் படம் முழுவதும் தெரிந்தது.

எரியும் பனிக்காட்டில் ஏகாதிபத்தியம் தலித் மக்களை எப்படிக் குறிவைத்துப் பிடித்து சுரண்டுகிறது என்பதும் அதற்கு ஏதுவான சூழல் கிராமங்களில் நிலவுவதும் அற்புதமாக விவரிக்கப்பட்டிருக்கும். மலைகளின் புவியியல், தட்பவெப்பநிலை, மக்கள் வீடுகள், சுகாதாரம், கொள்ளை நோய்கள் என மலைகளில் உள்ள தேயிலைத் தோட்ட வாழ்க்கையின் அனைத்து அம்சங்களையும் டேனியல் தத்ரூபமாக வருணித்திருப்பார்.

கதை மனித நேயத்துடன் அழகியலுடனும் அற்புதமாகச் சொல்லப்பட்டிருக்கும். படத்தில் ஆன்மாவே இல்லை. அப்படியொரு வறட்சி.

படத்தில் மன்னிக்கவே முடியாத விஷயம். ஆசிரியர் டேனியலை பாலாவும், நாஞ்சில் நாடனும் கங்காணி என்று கொச்சைப்படுத்தியவிதம். இந்த இருவருக்கும் தங்கள் இந்துத்துவ அரசியலைப் பிரசாரம் செய்யும் நோக்கம் இருந்தால் அதை அவர்கள் தங்கள் சொந்தப் படைப்புகளைக் கொண்டு செய்ய வேண்டும். அதற்கான ஆளுமையோ துணிச்சலோ இல்லாமல் வேறு ஒருவரின் படைப்பில் புகுந்து அதைக் கேவலப்படுத்தித் திரிக்கும் இந்தத் தந்திரம் அயோக்கியத்தனமானது.

அதுவும் அந்த டாக்டர் பாத்திரத்துக்கு அம்பேத்கார் போல உடையணிவித்திருந்தது சகிக்க முடியாதது. அது இந்த நபர்களின் ஆதிக்க சாதி மனோபாவத்திற்குச் சான்று. இவர்கள் உழைக்கும் மக்களின் துயரத்தைக் காட்டி பணம் சேர்க்கும் எண்ணம் கொண்டவர்களே அல்லாமல் அவர்கள் மீது அன்பு கொண்டவர்கள் அல்ல என்பதைக் காட்டுகிறது இந்த பாத்திரப்படைப்பு" என்று பாலா நாஞ்சில் நாடன் மீது ஆத்திரப்பட்டு பேசும் முருகவேள், இன்னொரு வி;டயத்தையும் எம்முடன் பகிர்ந்து கொண்டார்.

"எரியும் பனிக் காட்டை படமாக்கப் போவதாக பாலா என்னோடு தொடர்பு கொண்டு கேட்டபோது எனக்கு மகிழ்ச்சியாகத்தான் இருந்தது. ஆனால் படம் வெளியான போது அந்த மகிழ்ச்சி தூள்தூளாக சிதறிப்போனது.
அதற்கு பிறகு பாலாவோடு பேசி என்ன பயன்? எனது கருத்தை இணையத்தில் மட்டும் பதிவு செய்தேன்" என்றவரிடம் பாலா ரெட் டீயை அடிப்படையாகக் கொண்டா பரதேசியை உருவாக்கினார்? என்று கேட்டேன்.

"இல்லை அவருக்கு 'ரெட் டீ' நூல் கிடைக்க வாய்ப்பில்லை. அந்த நூல் என்னிடம் மட்டுமே உள்ளது.

பாலாவுக்கு அந்த ஆங்கில நூலை மொழிபெயர்க்கும் அளவிற்கு புலமை இருக்கிறதா என்று எனக்குத் தெரியவில்லை. எனவே அவர்  எரியும் பனிக்காட்டைத்தான் தன் படத்துக்கான கதையாக எடுத்துக்கொண்டார். திரையில், கனரா வங்கிக்கு நன்றி என்று ஆங்கிலத்தில் போடுவார்களே. அந்தப் பட்டியலில் எனக்கும் டேனியலுக்கும் சின்னதாக அதுவும் ஆங்கிலத்தில் ஒரு நன்றி போட்டார். அவ்வளவுதான்" என்று சொல்லி சிரிக்கிறார் முருகவேள்.

இலங்கைக்கு வந்து இந்திய வம்சாவளித் தமிழர்களின் வாழ்க்கை வரலாற்றைப் பதிவு செய்யும் எண்ணம் இருக்கிறதா? என்று கேட்டேன்.

"எப்படி இல்லாமல் இருக்கும்? கட்டாயம் செய்தே ஆகவேண்டிய விஷயம் அல்லவா? மலையத் தமிழர்களின் அரசியல் போராட்டம் வரலாறு இலங்கையின் பொருளாதாரத்திற்கு அவர்கள் ஆற்றிய பங்கு குறித்தெல்லாம் இலங்கையில் நிறையப் படைப்புகள் வந்துள்ளன. ஆனால் தமிழகத்தில் அது குறித்த புரிதல் மிகவும் குறைவாகவே இருக்கிறது. அதைச் செய்ய ஒரு வாய்ப்புக் கிடைத்தால் அற்புதமானதாக இருக்கும்" என்று கூறி முடித்தார் முருகவேள்.

கொழும்பின் சைவ உணவக வரலாறு -3

கேசரி மட்டும்தான் இனிப்புப் பண்டம்

விசேட ஆர்டருக்குத்தான் பாயாசம்

 

கோல்டன் கபே ராமனுடன் ஒரு விரிவான உரையாடல்

மணி  ஸ்ரீகாந்தன்

பத்து ரூபா சம்பளத்தில் பற்றுப்பாத்திரம் தேய்த்து, மேசை துடைத்தவர் எப்படி கல்லாவில் உட்கார்ந்து காசு எண்ணினார் என்பதும் ஒரு சுவாரஸ்யமான கதை. கொம்பனி வீதி ஜாவா லேனில் அமைந்திருந்த லட்சுமி விலாஸ் ஹோட்டலுக்கு அருகில் ஒரு பெரிய வீடு இருந்ததாம். அந்த வீட்டுக்கு தினசரி காலை உணவை ராமன்தான் எடுத்துச் செல்வாராம். அந்த வீட்டில் இருந்த துரைக்கு குழந்தைகள் இல்லாததால் ராமன் மீது அவர்களுக்கு மிகுந்த அன்பு. ராமனுக்கும் அந்த தம்பதியினருக்கும் இடையிலான நட்பு நீண்டக்காலமாக தொடர்ந்திருக்கிறது.

Tuesday, March 4, 2014

கும்பகோணம் இஸ்லாமிய தமிழ் இலக்கிய மாநாடு 01

அனைத்துலக இஸ்லாமிய தமிழ் இலக்கிய எட்டாம் மாநாடு


அருள்

அனைத்துலக இஸ்லாமிய தமிழ் இலக்கிய எட்டாவது மாநாடு கும்பகோணத்தில் நடைபெறப் போவதாகவும் அதில் பங்கேற்க அழைப்பு விடுக்கப்பட்டிருப்பதாகவும் கிழக்கிலங்கை படைப்பாளர் முத்துமீரான் என்னிடம் சொன்னபோது, எனக்கு ஆச்சரியமாகத்தான் இருந்தது. ஏனெனில்
கும்பகோணம், இந்து கோவில்களுக்கும் சிற்பிகளுக்கும், ஆலயம் தொடர்பான பொருட்கள், சேவைகளுக்கும் பிராமணர்களுக்கும் பெயர் பெற்ற இடம் என்று தான் நான் அறிவேன். கும்பகோணம் என்றதும் தமிழக முதல்வரின் மகாமகக் குளியல்தான் ஞாபகத்துக்கு வரும். இவ்வாறான ஒரு மனப் பின்னணியில் இஸ்லாமியருக்கு என்ன வேலை? என்ற கேள்வி எழுந்தது நியாயமானதுதான்!
 எங்களை அழைத்துச் செல்ல திருச்சி விமான நிலையம் வந்த நண்பரிடம் விசாரித்தபோது, கும்பகோணம் இந்து மயமானதுதான் என்பதை ஒப்புக் கொண்டதோடு, சுமார் இருபது சதவீதமானோர் முஸ்லிம்கள் என்றார். இவர்களில் செல்வமும் செல்வாக்கும் கொண்ட முஸ்லிம் வர்த்தக சமூகம், 'கிஸ்வா' எனச் சுருக்கமாக அழைக்கப்படும் கும்பகோணம் இஸ்லாமிய சோஷியல் வெல்பெயார் அஸோசியேஷன் என்ற சமூக அமைப்பை நடத்தி வருகின்றனர். பெரும்பாலும், கல்வி சார்ந்த சமூக மேம்பாட்டு திட்டங்களை வகுத்து நிறைவேற்றிவரும் இந்த அமைப்பே, கவிக்கோ அப்துல் ரகுமானை தலைவராகக் கொண்டு செயற்பட்டுவரும் இஸ்லாமிய இலக்கிய கழகத்துடன் இணைந்து இம்மாநாட்டை கும்பகோணத்தில் நடத்தியது.

கவிக்கோ முன்னிலையில் 
முத்துமீரானுக்கு கௌரவம்

 பெப்ரவரி மாதம் 14, 15, 16 ஆம் திகதிகளில் கும்பகோணம் அசூர் புறவழிச்சாலையில் அமைந்திருக்கும் ஹாஜி, இ. எஸ். எம். பக்கீர் முஹம்மது வளாக டி. எஸ். மஹாலில் இம்மாநாடு நடைபெற்றது. இஸ்லாமிய இலக்கிய கழகம் அழைத்திருந்த இந்திய நாட்டவரும், இலங்கை, மலேசியா, சிங்கப்பூர் மற்றும் துபாய் நாடுகளில் இருந்து அழைக்கப்பட்டவர்களும் இம்மாநாட்டில் கலந்து கொண்டு சிறப்பித்திருந்தனர்.

கும்பகோணம் ஒரு பெரு நகரம் அல்ல. அதை மாநகரமாக அறிவிக்க வேண்டும் என்பது கும்பகோண மக்களின் கோரிக்கை. விரைவிலேயே அது நிறைவேறும் என்று எம்மிடம் சொல்லப்பட்டது.

இஸ்லாமிய இலக்கிய கழகம் ஆரம்பத்தில் இதை மாநில மாநாடாகத்தான் நடத்த எண்ணியிருந்தது. ஆனால் இலக்கிய கழக நிர்வாகிகளுக்கும் கிஸ்வா நிர்வாகிகளுக்கும் இடையே தொடர்ச்சியாக நடைபெற்ற கலந்துரையாடல்கள் மற்றும் கருத்துப் பரிமாறல்கள் காரணமாகவும் கிஸ்வாவின் உறுதியான வேண்டுகோளுக்கு இணங்கவும் இம்மாநாட்டை அகில உலக மாநாடாக கடைசி நேரத்தில் அறிவிக்கப்பட்டது என்று கிஸ்வா நிர்வாகிகள் எம்மிடம் கூறினார்கள்.
மருத்துவர் தாஸிம் அஹமட் 
கௌரவிக்கப்படுகிறார்.
இதனால்தான் பேராதனை மெய்யியல் உளவியல் துறைத் தலைவர் கலாநிதி எம். எஸ் எம். அனஸ் மாத்திரமே இங்கே ஆய்வு அரங்கில் உரையாற்றியதோடு ஆய்வரங்கு தொகுப்பு நிகழ்ச்சியிலும் பங்குபற்ற வேண்டிய நிலை ஏற்பட்டது. இலங்கையின் ஏனைய பல்கலைக்கழகங்களைச் சேர்ந்த அறிஞர்களும், ஏனைய முஸ்லிம் இலக்கியவாதிகளும் இங்கே ஆய்வுக் கட்டுரைகளை சமர்ப்பிக்க முடியாமற் போனதற்காக காரணமாகவும் இக்கடைசி நேர தீர்மானமாகவே இருக்க வேண்டும்.

ஏனெனில் கடந்த வருடம் மலேசியாவிலும், காயல் பட்டிணத்திலும் நடைபெற்ற இஸ்லாமிய மாநாடுகளில் பல ஆய்வுக் கட்டுரைகள் சமர்ப்பிக்கப்பட்டிருந்தன.

எனினும் கும்பகோண மாநாட்டு ஏற்பாடுகள் கனகச்சிதமாக செய்யப்பட்டிருந்தன. அரசியல் நுழையாமல் பார்த்துக் கொள்ளப்பட்டது. அழைக்கப்பட்டிருந்தவர்கள் நன்றாக கவனிக்கப்பட்டனர். அந்த நான்கு நாட்களும் மறக்க முடியாத நாட்கள்தான்!

இலங்கையில் இருந்து குறைவான எண்ணிக்கையில் கும்பகோண மாநாட்டுக்கு பேராளர்கள் சென்றிருந்தாலும் அனைவரும் நன்கு உபசரிக்கப்பட்டதோடு, அவர்களில் சிலருக்கு கௌரவமும் செய்யப்பட்டது.

நமது மணிப்புலவர் மருதூர் மஜீத்தின் இது ஒரு தங்க நூல் என்ற புத்தகம் இங்கு வெளியிட்டு வைக்கப்பட்டது. வாழ்நாள் இலக்கியப் பணிக்கான விருது, பத்தாயிரம் ரூபாவுடன் இவருக்கு வழங்கப்பட்டது. பொன்னாடை கௌரவம் அளிக்கப்பட்டது. கவியரங்கில் மணிப்புலவர் வாழ்த்துக்கவிதை வாசித்தார்.
மணிப்புலவருக்கு  கௌரவம்
கிழக்கிலங்கை எழுத்தாளரும் தனித்துவமான மண்வாசனை படைப்பாளரும் சட்டத்தரணியுமான கவிஞர் முத்துமீரான், நாட்டாரியல் தொடர்பான ஒரு ஆய்வரங்குக்கு தலைமை தாங்கினார். அவருக்கு கவிக்கோ அப்துல் ரஹ்மான் வாழ்நாள் சாதனையாளர் விருது, முஸ்லிம் நாட்டார் இலக்கியப் பணிக்காக வழங்கப்பட்டது. இவர் எழுதிய 'கிழக்கிலங்கை நாட்டுப்புற முஸ்லிம்களின் பூர்வீகமும் வாழ்வும் வாழ்வாதாரங்களும்' மற்றும் 'என்னடா குலம் கோத்திரம்' ஆகிய இரு நூல்களும் இங்கு வெளியிட்டு வைக்கப்பட்டன. ஆய்வரங்கில் இவர் ஆற்றிய உரை பலரையும் கவர்ந்தது.

இம்மாநாட்டுக்கான இலங்கை இணைப்பாளராகக் கடமையாற்றிய மருத்துவர் தாசிம் அஹமட் இரண்டாம் நாள் அமர்வில் ஆய்வுக் கோவையை வெளியிட்டு வாழ்த்துரை வழங்கினார். இலக்கியம் மற்றும் சமூகப் பணிக்காக இவருக்கு கவிக்கோ அப்துல் ரஹ்மான் வாழ்நாள் சாதனையாளர் விருது வழங்கப்பட்டது.

சிறந்த இஸ்லாமிய பாடகருக்கான விருதை கலைக்கமல் பெற்றுக்கொண்டார். இலக்கியம் மற்றும் சமூகப் பணிக்காக எஸ். எச். எம். ஜெமீலுக்கு வாழ்நாள் சாதனையாளர் விருது வழங்கி அவர் கௌரவிக்கப்பட்டார். அவர் இங்கு ஆற்றிய உரை பலரையும் கவர்ந்தது.

கலாநிதி எம். எஸ். எம். அனஸ் சமர்ப்பித்த ஆய்வுக் கட்டுரையும் ஆய்வரங்கு தொகுப்பு நிகழ்ச்சியில் அவர் ஆற்றிய தலைமையுரையும் சிறப்பாகவும் வித்தியாசப்பட்டு நிற்பதாகவும் அமைந்திருந்தன என்பது குறிப்பிடத்தக்கது.



மேலும் வாசிக்க…

கும்பகோணம் இஸ்லாமிய தமிழ் இலக்கிய மாநாடு 02

Monday, March 3, 2014

கஞ்சா கருப்புவின் அதிரடிப் பேட்டி

"ரகசியாவின் உதட்டை தெரியாத்தனமாகத்தான் கடிச்சேன்"


வேல்முருகன் போர்வெல் என்ற கஞ்சா கருப்புவின் சொந்தப்படப்பிடிப்பில் அவரை நேரில் சந்தித்து எடுக்கப்பட்ட பேட்டி

மணி  ஸ்ரீகாந்தன்

வசதி வாய்ப்புகள் வந்து விட்டால் தனது நடை, உடை பாவனைகளை மாற்றிக் கொள்ளும் எத்தனையோ மனிதர்களை நாம் அன்றாடம் சந்தித்துக் கொண்டிருக்கிறோம். ஆனாலும் சிலர் அதற்கு விதிவிலக்காகவும் வாழ்ந்து வருகிறார்கள். அப்படியானவர்களில் ஒருவர்தான் நடிகர் கஞ்சா கருப்பு.
விக்ரம், சூர்யா உள்ளிட்ட பல முன்னணி கதாநாயகர்களோடு ஜோடி சேர்ந்து நடித்து பெயரும், புகழும் பெற்றிருந்தாலும் இன்றும் அவர் மனதளவில் மிகவும் எளிமையாகத்தான் வாழ்ந்து வருகிறார். ஜீன்ஸ், டீ ஷர்ட், பெஷன் உடைகள் சகிதம் உயர்ரக காரில் வந்து இறங்கினாலும் அவர் தோளில் ஒரு துண்டோ அல்லது கைக்குட்டையோ கிடக்கத்தான் செய்கிறது. அவர் தன் பழைய வாழ்க்கையை மறக்கத் தயாரில்லை என்பதை நமக்கு புரிய வைக்கிறது.

எம்மை கண்டதும் மிகவும் அடக்கமாக "அண்ணே.... அண்ணே... சாப்பிட்டீங்களா...?" என்று கேட்கும்போது அந்த மனிதனின் வெள்ளந்தி மனசு பளிச்சிடுகிறது. பேச்சில் வெகுளித்தனம், குணத்தில் அடக்கம். யாரைப் பார்த்தாலும் மூச்சுக்கு மூணு தடவை 'அண்ணே... அண்ணே...' இவைதான் கஞ்சாவின் தனித்துவ அடையாளங்கள்.

சென்னை கே. கே. நகர் சிவன் பார்க்கில் நான் அவரை சந்தித்து பேசிய அந்த இனிமையான நிமிடங்களின் சில பகுதிகளை வானவில் வாசகர்களுடன் பகிர்ந்து கொள்கிறேன்.

"நமக்கு சொந்த ஊரு சிவகங்கை. அங்கே ஒரு சின்ன ஓலைக்குடிசை போட்டு ஒரு சாப்பாட்டுக் கடை நடத்தினேன். அந்த சாப்பாட்டுக் கடைக்கு சாப்பிட வருபவர்தான் இயக்குநர் பாலா. அப்போதுதான் பாலா எனக்கு அறிமுகமானார். நமக்கு நடிப்பு, சினிமா என்று எதுவுமே தெரியாதுங்க.. ஆனால் திடீரென்று ஒருநாள் சினிமாவில உனக்கு ஒரு வேசம் இருக்கு நடிக்கிறீயா...? என்றார். நானும் பதிலுக்கு என்ன பண்ணனும்னு சொல்லுங்கண்ணே முயற்சி செய்கிறேன்னு சொன்னேன்... அப்போ அவரு தந்ததுதான் 'கஞ்சா கருப்பு' என்கிற வேடம். அன்றிலிருந்து கருப்பு ராஜா என்ற என் நிஜப்பெயர் கஞ்சா கருப்பாக மாறிவிட்டது..." என்று தமது கடந்த கால வாழ்க்கையை விபரித்த கஞ்சா, தற்போது 4 கோடி ரூபா முதலீட்டில் 'வேல்முருகன் போர்வெல்ஸ்' என்ற படத்தை தயாரித்து வருகிறார்.
 நடிகர் கரணை வைத்து 'மலையன்' படத்தை தயாரித்தவர் இயக்குனர் கோபி. அந்தப் படத்தில் கஞ்சா ஒரு நகைச்சுவை வேடம் செய்திருக்கிறார். அந்தப் படத்துக்குப் பிறகு இயக்குநர் கோபிக்கு சான்ஸ் கிடைக்கவில்லை. ரொம்பக் காலம் சும்மா இருந்தவர். ஒரு நாள் கஞ்சாவிடம் வந்து ஒரு கதையை சொல்லியிருக்கிறார். கேட்டதும் அவருக்கு கதை 'பச்சக்' என பிடித்துப்போய் விட்டது. உடனே கஞ்சா கருப்பு, தனக்குத் தெரிந்த ஒரு தயாரிப்பாளரிடம் கோபியை அறிமுகம் செய்திருக்கிறார்.

கதையைக் கேட்ட தயாரிப்பாளர் படத்தில் நாயகனை மாற்றணும் என்பது உட்பட பல கண்டிஷன்களைப் போட்டிருக்கார். அந்த விசயத்தை கோபி கஞ்சா கருப்பிடம் சொன்ன போது அவருக்கு எரிச்சலும் கோபமும் வந்திருக்கிறது. தண்ணீர் குழாய் (போர்) போடுற பையன் மாதிரி இருக்கிறவன்தான் நடிகர் மகேஷ். அவனை மாற்ற சொல்கிறார்களா? அது சாத்தியம் இல்லை. எனவே அவரே 'போர்வெல்' படத்துக்கு தயாரிப்பாளராகிவிட்டார். இதுதான் கஞ்சா கருப்பு படத்தயாரிப்பாளரான கதையின் பின்னணிக் கதை!

"நானே படத்தை செய்யலாம்னு இருக்கேன் என்று சொன்னதும் கோபி மிரண்டு போய்விட்டார். அவ்வளவு பணத்துக்கு எங்கேண்ணே போவீங்க? என்றார். நான், பைனான்ஸ் வாங்குவோம்ணே... என்றேன். சட்டுப்புட்டுன்னு கடன்வாங்கி படத்தை எடுத்து முடித்து விட்டோம். இன்று ஆடியோ வெளியீடு வரைக்கும் வந்து விட்டோம். நான் சினிமாவில் நடிப்பேன் என்றோ சொந்தப் படம் எடுப்பேன் என்றோ கனவிலும் நினைச்சுக்கூட பார்த்ததில்லீங்க... எல்லாமே ஏதோ கனவு மாதிரிதான் இருக்கு...." என்று கஞ்சா பெருமூச்சு விடுகிறார்.
மனைவி சங்கீதாவுடன்….
'வேல் முருகன் போர் வெல்' படத்தில் கஞ்சா கருப்பு நடிகை ரகசியாவுக்கு உதட்டோடு உதடு வைத்து முத்தம் கொடுப்பது போல ஒரு காட்சி. அதை எடுத்தபோது ரகசியாவின் உதட்டை கடித்து விட்டதாகவும் ரகசியா சீறிச் சினந்து ரகளையாகி விட்டதாகவும் ஒரு செய்தி வெளியாகி பற்றி எரிந்ததை நீங்களும் கேள்விப்பட்டிருப்பீர்கள். அது பற்றி அவரிடம் கேட்டேன்.

"அட, அந்த நியூசு சிலோன் வரைக்கும் பரவிடுச்சா...?" என்று வியப்பு காட்டினார் கஞ்சா.

"அப்படி ஒரு சீன் படத்தில் வைக்கிறதா கோபி சொன்ன போது எனக்கு கொஞ்சம் படபடப்பாகத்தான் இருந்தது. படப்பிடிப்பில் கேமரா ஆக்ஷன் சொன்னப் போது ரகசியாவை கட்டிப்புடிச்சி முத்தமிடுறப்போ என்ன நடந்ததோ தெரியவில்லை. அவசரத்தில ரகசியாவோட உதட்டை கடிச்சுட்டேன்.

அப்புறம் அந்த பொண்ணு காச்சு மூச்சுண்ணு ஏதோ இந்தியில் கத்திச்சி. நமக்கு ஒண்ணும் புரியலீங்க.... அதுக்குப் பிறகு இரண்டு மணி நேரம் படப்பிடிப்பு தடைப்பட்டுப் போச்சி" என்று வெள்ளந்தியாக சிரிக்கிறார் கஞ்சா.

அப்போ நீங்க கமலுக்கு போட்டியா? என்று அவரைச் சீண்டினேன். "பெரிய இடத்தோட கோத்துவிட பார்க்கிறீங்களா சாமீ...?" என்று சொல்லி கலகலவென சிரிக்கிறார்.

கஞ்சா கருப்புவின் மனைவியின் பெயர் சங்கீதா. அவர் டொக்டராக பணியாற்றுகிறார். கஞ்சாவின் மகனுக்கு நான்கு வயதாகிறதாம். அவரின் பெயரைத்தான் தமது சினிமா படக்கம்பனிக்கு வைத்திருக்கிறார்.

"எங்கப்பா பேரு காந்திநாதன். அதே பெயரைத்தான் என் பையனுக்கும் வைத்தேன். ஆனா இப்போ சினிமா கம்பனி தொடங்கி விட்டதால் என் பையனுக்கு தருண்காந்த் என்று பெயர் வைத்து விட்டேன். இப்போ என் படக் கம்பனியின் பெயர் தருண்காந்த் பிலிம் பேக்டரி. நான்கு வயசுலேயே அவன் படத் தயாரிப்பாளரா ஆகிட்டான். அவன் யோகக்கார புள்ளங்க. அதோடே  அவன் பெயரிலே ரஜினிகாந்த், விஜயகாந்த் மாதிரி காந்த் இருக்கு பார்த்தீங்களா...." என்கிறார் கஞ்சா.
கஞ்சாவின் அம்மாவின் பெயர் லெச்சுமி, இன்னும் அவர் கிராமத்தில்தான் வாழ்ந்து வருகிறார். கஞ்சாவிற்கு நான்கு உடன் பிறப்புக்கள். அதில் கஞ்சா மூன்றாவதாம்.

அவரின் திருமணம் பற்றிக் கேட்டோம். "மழைக்காக கூட நான் பள்ளிக்கூடம் ஒதுங்கினது கிடையாதுங்க. ஆனா ஒரு டாக்டரை திருமணம் முடித்து ரொம்ப மகிழ்ச்சியாக இருக்கிறேன். நான் ஒரு நடிகையை கட்டியிருந்தாகூட இவ்வளவு சந்தோசமா இருந்திருக்க மாட்டேன். என்னோட சினிமா சம்பந்தப்பட்ட பணவிவகாரம், கணக்குகள் எல்லாத்தையும் என் மனைவி பார்த்துக் கொள்கிறார். எனது எல்லா முயற்சிகளுக்கும் அவரின் முழு ஆதரவு எனக்கும் கிடைக்கிறது. என்னை திருமணம் முடித்ததற்காக அவரும் ரொம்பவே மகிழ்ச்சியடைகிறாருங்க.." என்று சொல்லும் கஞ்சா, 'வேல் முருகன் போர்வெல்' படத் தயாரிப்புக்கு உதவி செய்த மதுரை டொக்டர் சரவணன், இயக்குநர் வாசு மதுரவன் உள்ளிட்டோருக்கு தமது நன்றிகளை தெரிவித்துக் கொண்டார்.

Saturday, March 1, 2014

வேடந்தாங்களில் அதிரும் பறை 02

"பறை இசை என்பது தமிழன் இரத்தத்தில் ஊறிப்போன ஒன்று"


மணி  ஸ்ரீகாந்தன்

(கடந்த இதழ் தொடர்ச்சி)

மணிமாறனின் புத்தர் கலைகுழு, 'சாகும் வரை பறை இசைப்போம். ஆனால் சாவுக்கு பறை இசைக்க மாட்டோம்! சாதியை சாகடிக்காமல் விடமாட்டோம்' என்பதை தமது குழுவின் கொள்கையாகக் கொண்டிருக்கிறது. ஆதியில் பறை சாவுக்கு முழங்கியதால்தான் அது கௌரவம் இழந்தது என்பதும் ஆதிக் கருவி சாதிக் கருவியாக மாறிவிட்டது என்பதும் மணிமாறனின் வேதனை.
ஆனால் ஏன் ஆதித் தமிழன் பறையை சாவுக்கு இசைத்தான் என்பதைப் பற்றி நாம் தேடிப் பார்க்க வேண்டாமா? ஒரு இறந்த பிணத்தின் முன் மென்மையான வீணையையோ, வயலினையோ வாசிப்பது, அச்சூழலுக்கு பொருத்தமாக இருக்காது என்பதோடு பிரிவின் சோகம் மேலும் வெளிப்பட்டு நிற்கும். இதற்கு அப்பால் ஏன் பறையை அடிக்க வேண்டும் என்ற கேள்விக்கு சமூக ஆர்வளர்கள் மற்றும் கலை ஆர்வலர்கள் ஒரு காரணம் சொல்கிறார்கள்.

பறையின் ஒலியைக் கேட்டும் ஒரு மனிதன் இயங்கவில்லை அல்லது அசையவில்லை என்றால் அந்த மனிதனின் இறப்பு உறுதி செய்யப்படுகிறது. அதனால் இதை ஆதி மனிதன் கண்டுபிடித்த 'ஸ்டெத்தஸ் கோப்' கருவி என்றும் ஆய்வாளர்கள் பறை ஏன் மரணத்துடன் சம்பந்தப்பட்டது என்பதற்கான காரணத்தைச் சொல்கிறார்கள். இதில் சில குழப்பங்களும் சந்தேகங்களும் இருந்தாலும் இன்றைய வாழ்வில் நடக்கும் சில சம்பவங்களை பார்க்கும் போது அந்தக் காரணம் உண்மை என்று கொள்ளலாம்.
மருத்துவ தொழில்நுட்பங்கள் வளராத அந்தக் காலத்தில், பூலோகம், கீழோகம் என்று கதை விட்டுக் கொண்டிருந்த பெரிசுகள் தமக்கு முடியாத காலத்தில் தாம் இறந்து விடுவோம் என்ற சிந்தனையிலேயே மயக்க நிலைக்கு சென்று விடுவார்களாம். அந்த சமயத்தில் பறையை அடித்தால் அவர்கள் மயக்கம் கலைந்து எழும்பி விடுவார்களாம். இன்றும்கூட பத்திரிகை செய்திகளில் இறந்தவர் உயிர்த்தெழுந்தார் என்றும் பாடையில் வைக்கப்பட்டவர் எழும்பி தண்ணீர் கேட்டார் என்றும் செய்திகள் வந்து கொண்டுதான் இருக்கின்றன. கால தேவன் தன்மை தவறுதலாக அழைத்தான் என்றும் பிறகு பச்சை உருண்டை சோறு கொடுத்து வானத்திலிருந்து உருட்டி விட்டான் என்றும் அப்படி 'உயிர்த்து' வந்தவர் கரடி விடும் கதைகளையும் நாம் கேட்டிருக்கிறோம்.

பாம்பு தீண்டிவர்களில் அனேகமானவர் இப்படி மயக்க நிலையில் இருந்து மீண்டு வருவது சாதாரணம். ஆனால் இந்த உயிர்த்தெழுதல் கதைகள் தமிழகத்துக்கு மட்டுமே பொருந்தும். ஏனென்றால் இலங்கையில் ஒருவர் இறந்து விட்டால் அந்த உடம்பை 'எம்பாம்' செய்து விடுகிறார்கள். மூன்று நான்கு நாட்கள் வைத்திருந்த பின்னரே அடக்கம் அல்லது எரியூட்டல் நடக்கிறது. ஆனால் தமிழகத்தில் (எம்பாம்) முறை இன்னும் நடைமுறையில் இல்லை. அதனால் மரித்தவர் எழலாம் என்ற நம்பிக்கையில் இன்றும் சவ ஊர்வலங்களில் பறை இசைத்து வருகிறார்கள். பறை வெறுமனே இசைக்கருவியாய் நின்று விடாமல், உளவியல் ரீதியானது. மருத்துவ தொடர்புடையது என்பதை வரலாற்றிலிருந்தும் நடைமுறை வாழ்வியலில் இருந்தும் நாம் புரிந்து கொள்கிறோம்.

சவ ஊர்வலங்களில் வேடந்தாங்கல் புத்தர் கலைக்குழு பறை இசைப்பதில்லையே ஏன் எப்படி? என்ற கேள்வியை மணிமாறனிடம் வினவினோம்.

"பிணத்தை சுற்றியுள்ள சுகாதாரமற்ற சூழலையும், சாதியவாதிகளின் வக்கிரத்தையும் பறை இசைக் கலைஞர்கள் எதிர்கொள்ள வேண்டியிருப்பதோடு 'சாவுதப்பு' என இக்கலை மலினப்படுத்தப்படுவதற்கு இது காரணமாகி விடுகிறது. இதனால்தான், பறை இசையை அதன் இன்றைய தவறான முகவரியில் இருந்து மீட்டு, புதிய கௌரவமான முகவரியை கொடுப்பதற்காகவே நாம் சாவுக்கு பறை இசைக்க மறுக்கிறோம். அதற்கு மாறாக பறையை ஓர் எழுச்சியின் குறியீடாக, விடுதலையின் அடையாளமாக கையாளுகிறோம். ஆகவேதான் செல்லும் இடமெல்லாம் உரத்து முழங்குகிறோம்! பறை சாற்றுகிறோம்! பறை சாவுக்கானது அல்ல, வாழ்வுக்கானது..."என்று ஆவேசமாக பேசுகிறார் மணிமாறன்.
புத்தர் கலைக்குழுவின் பறை பயிற்சியரங்கில் பங்குபற்றுபவர்களில் சிறுவர் முதல் பெரியவர் வரை வயது வித்தியாசமின்றி காணப்பட்டனர். அவர்களின் தோள்களில் ஒரு பறை தொங்கிக் கொண்டிருந்தது. இளவயது பெண்களும், ஆண்களும் காய்ந்த வைகோலை குவித்து தீமூட்டி பறையை காய்ச்சி அதற்கான நாதம் வரும்வரை தட்டி முறுக்கேற்றியதையும் அவதானித்தோம். பறை இசைக்கு மேலும் வலு சேர்க்கும் 'பெருந்தமுரு', 'தூம்பு' போன்ற கருவிகளையும் இளைஞர்கள் இசைத்துக் கொண்டிருந்தார்கள். 'பெருந்தமுரை' தோளில் மாட்டியபடி தாளத்திற்கு ஏற்ப உடம்பையும் அசைத்து ஆடிக் கொண்டிருந்த ஒருவரை சந்தித்துப் பேச்சுக் கொடுக்க அவர் தன் பெயர் எழிலன் என்றார். மக்கள் தொலைக்காட்சி செய்திப் பிரிவில் பணியாற்றுவதாகவும் கூறினார். என்ன மக்கள் டீவியிலயா....? என்றதும், ஏன் தொலைக்காட்சியில் வேலை பார்த்தால் பறை இசைக்கக் கூடாதா? என்று எம்மை எதிர் கேள்வி கேட்டு திக்குமுக்காட வைத்தார் எழிலன்.

"நான் மூன்று நாள் விடுப்பில் வந்து இந்த பறை இசையை கற்றுக்கொள்கிறேன் நான் தற்போது சென்னையில் வசித்தாலும் என் சொந்த ஊர் திருநெல்வேலி சங்கரன் கோவில், வீரணாபுரம் என்ற கிராமம். எங்கள் கிராமம் தமுரு செட்டு, ஆழியா ஆட்டம் உள்ளிட்ட கலைகளுக்கு ரொம்பவும் பெயர் பெற்றது. சின்ன வயசில் இருந்து எனக்கும் அந்த மாதிரியான கலைகளை கற்பதற்கு ரொம்ப ஆசை. ஆனால் வாய்ப்பு கிடைக்கவில்லை.
இப்போ கிடைக்கவும் வந்துட்டேன். எனக்கு இந்த பறையின் நுணுக்கங்களை படிக்க மூன்று நாள் பயிற்சி போதாது. என்னோடு படிக்கும் ஒரு குட்டிப் பையன் மணிமாறனின் பயிற்சி பட்டறைக்கு தொடர்ந்து ஆறு வருடங்களாக வர்றானாம். இன்னும் முழுமையாக கற்கவில்லை என்று சொல்லுறான். மேலும் மணிமாறன் என்கிற பெரிய பறை விற்பனரிடம் நாங்களும் பறை படிச்சோம்னு சொல்லுறது நமக்கு பெருமை.." என்று தூய தமிழில் பேசும் எழிலன் ஒரு தமிழ் பற்றாளர்.
"பறை ஒரு தீண்டதகாத கருவி என்ற கருத்து மக்கள் மத்தியில் ஒரு காலத்தில் இருந்தது. அது இப்போது இல்லை. நாளுக்கு நாள் வளர்ச்சியடைந்து வரும் சென்னையில் அந்நிய கலாசார கலைகள் ஊடுருவினாலும் பறை இசைத்தால் மக்கள் கூடுவதை தவிர்க்க முடியாது. பறை சத்தம் கேட்டால் ஏறெடுத்துப் பார்க்கவே செய்வார்கள். ஏனெனில் அது உயிரில் கலந்த ஒரு இசை. ஜனவரியில் நிகழும் சென்னை சங்கமத்தில் கூடும் மக்கள் கூட்டமே அதற்கு ஒரு நல்ல எடுத்துக்காட்டு. எனவே தமிழனின் ரத்தத்தில் அவனுடைய மரபு இசை கலந்திருக்கிறது. அவன் அதை இன்னும் ரசிக்கிறான்" என்ற எழிலனின் கருத்தை கேட்டுக் கொண்டே நடந்தோம்.



மேலும் வாசிக்க…

வேடந்தாங்களில் அதிரும் பறை 03

face பக்கம்


வீதியோர எல்லைச் சாமிகள்.-03

"பேய்களை பிடித்து ஆற்றில் கரைப்பதுதான் புதிய டெக்னிக்!"


மணி  ஸ்ரீகாந்தன்

காவல் தெய்வங்கள் என்பது ஊருக்கு வடக்கே ஐந்தாறு கிலோ மீட்டர் தள்ளித்தான் அமைக்கப்படுவது வழக்கம்.

அந்தக் காவல் தெய்வங்களில் சில பெண் தெய்வங்களும் அடங்கும். குறிப்பாக ஊர் காக்கும் காளியையும் குறிப்பிடலாம். இந்த தெய்வங்களுக்கு பலி கொடுக்கும் பழக்கம் அந்தக் காலத்தில் இருந்தே உள்ளதாம். இதற்கெல்லாம் காரணம் நாம் முன்னெடுக்கும் காரியத்தில் வழித்துணையாக காவல் தெய்வங்கள் இருக்கும் என்ற நம்பிக்கைத்தான். பலியிடுதல் என்பது உலகெங்கும் காணப்பட்ட, காணப்படுகின்ற ஒரு தொன்மையான வழக்கம்.
ஒருவகையில் இது கையூட்டுத்தான். பலியாக இரத்தத்தை சிந்துதல் என்பது மிக உயர்ந்த வெகுமதியாகக் கருதப்பட்டது. இஸ்லாத்திலும் கிறிஸ்தவ மதத்திலும் பலியிடுதல் உள்ளது. கிறிஸ்துவின் பின் அது அப்பமானது. புத்தரின் பின் அது மலர்களானது.

திக்கற்றவர்களுக்கு தெய்வமே துணை என்று கூறுவார்கள் அல்லவா? அந்தத் தெய்வத்தை காவல் தெய்வமாகத் தமிழர் கொண்டனர். போர், அச்சம், குழுக்கள் இடையிலான மோதல் அச்சம், பேய், பிசாசு, ஏவல் பேரிலான அச்சம் என்பன இந்து சமூகத்தில் காவல் தெய்வங்களை உருவாக்கின.

மேலும் அந்தக் காலத்தில் இப்போது போன்று சாலை, வாகன வசதி கிடையாது. தனியாக காட்டு வழியாகத்தான் பயணம் மேற்கொள்ள வேண்டும். அப்படி செல்லும் போது மனதில் உருவாகக் கூடிய அச்சங்களும் வடிகால் தேடு முகமாக இப்படி ஆங்காங்கே உள்ள காவல் தெய்வங்களை உருவாக்கி வைத்தார்கள். அவற்றை வணங்கியபடியே பயணிகள் பயணங்களைத் தொடர்ந்தார்கள்.

அந்த அளவுக்கு காவல் தெய்வங்கள் மீது அவர்களுக்கு அதீத நம்பிக்கை இருந்தது. அப்படி இருப்பதற்கு வலுவான காரணங்களும் இருந்தன. நம் நாட்டில் மாரியம்மனுக்கு அடுத்த நிலையில் காளியம்மன் வழிபாடும் பரவலாக காணப்படுகிறது. இரண்டு தெய்வங்களும் வீரத்துக்கும் (காவல்) நோய் எதிர்ப்புக்கும் பெயர் பெற்றவை. சக்தியின் வடிவமே காளி. இயற்கையை கவிஞர்கள் அழகின் வடிவமாகப் பார்த்தாலும் இயற்கை கொடுமையானது ,ஈவு இரக்கமற்றது. எவராலும் தடுக்க முடியாத சக்தி படைத்தது. அதனால்தான் காளி, ஆவேசம் கொண்ட மூர்க்கக் கடவுளாக சித்தரிக்கப்படுகிறாள். எனவே அம்மகா சக்தியை தனக்கு சாதகமாக வைத்துக் கொள்ள முனைதல் மனிதனின் இயல்பு.

சங்க இலக்கியத்தில் பாலை நிலத்திற்குரிய தெய்வமாக காளியைக் குறிப்பிடுகிறார்கள். தமிழகத்திலும் நமது தோட்டப்பகுதிகளிலும் காளி கோயில்களில் தவறாது இடம்பெற்றிருக்கும். பலியிடலும் மற்றும் உடல் உறுப்புகளின் மாதிரிகளை பித்தளை, தங்கத் தகடுகளில் செய்து காணிக்கையாக உண்டியலில் போடும் பழக்கமும் காளிகோயில்களில் இடம்பெறுகின்ற சிறப்பு அம்சங்கள்.

சரி எமது எல்லைத் தெய்வ தேடலில் அடுத்ததாக நாம் பயணம் செய்த இடம் இங்கிரிய. அங்கே கடந்த ஐந்து தசாப்தங்களுக்கு மேலாக வீற்றிருந்து ஊர் காக்கும் வீரமாகாளி பற்றி அதன் பூசகர் திலக்கராஜா போஸா சாமியிடம் கேட்டோம்.

"வீரமாகாளி எங்கள் குல தெய்வம். எங்க தாத்தா பெருமாள் கேரளாவிலிருந்து இங்கே வந்த போது வீரமாகாளியையும் அழைத்து வந்திட்டாராம். அவரும் மலையாள நம்பூதிரி வம்சத்தில் வந்தவர். அவருக்கு பிறகு எங்க மாமா காயம்பு - அப்புறம் ராஜேந்திரன், செல்வகுமார் ஆகியோர் வீரமாகாளிக்கு சேவை செய்திருக்காங்க. எனக்கு காளி அருளைக் கொடுத்தவர் எங்க மாமா செல்வக்குமார்" என்று சொல்லும் திலக்கராஜா, மட்டக்களப்பு, வாழைச்சேனை, குருநாகல், அனுராதபுரம் உள்ளிட்ட நாட்டின் அனைத்துப் பகுதிகளுக்கும் சென்று பில்லி சூனியங்களை அகற்றி இருக்கிறாராம். நீங்கள் விரட்டும் பேய்களை என்ன செய்வீர்கள், போத்தலில் அடைத்து ஆற்றில் தூக்கி வீசுவீர்களா? என்று நாம் கேட்டதும் அவருக்கு அது சிரிப்பாக போய்விட்டது.

"போத்தலில் அடைத்து வீசுவது பழைய முறை. இப்போது பேயைக் கொன்று ஆற்றில் கரைத்து விடுவோம். நாம் பிடித்த பேயை கொல்வதற்கு ஒரு வேலை செய்வேன். கடுகு ரொம்ப சின்னதாக இருந்தாலும் அதன் பவர் பேயைக் கூட ஆட்டுமுங்க.... அதனால் 108 கடுகை எடுத்து மாவோடு போட்டு பிசைந்து அதில ஒரு மனித உருவம் செய்து குறிப்பிட்ட பேயை அந்த உருவத்திற்குள் இறக்குவேன். பிறகு அதைத் துண்டு துண்டாக வெட்டி, குத்திக் கொன்று கடைசியில் ஆற்றில் கரைத்து விடுவோம். அத்தோடு அந்தப் பேயின் கதை முடிந்து விடும். போத்தலில் அடைப்பதில் ஒரு பிரச்சினை இருக்கிறது. நாம் வீசி எறியும் போத்தல் சில சமயம் உடைந்தாலோ, மூடி திறந்தாலோ பேய் மீண்டும் வெளியே வந்துவிடும். அதைப் பிறகு தேடிப் பிடிப்பது ரொம்பவும் சிரமம். ஆனால் தண்ணீரில் கரையும் பேயின் வாழ்க்கை அதற்குப் பிறகு நிலத்துக்குத் திரும்பாது. மீனுக்கு எப்படி பூமியில் வாழ முடியாதோ அது மாதிரித்தான் தண்ணீரிலேயே காலத்தை கழிக்கும் பேய் நிலத்துக்கு திரும்பாது" என்று பேயின் கதையை எப்படி முடிப்பது என்ற வித்தையை சொல்லித்தந்தார் போஸா சாமி!

அட, சக்தி வாய்ந்த பேய்களின் கதையை முடிப்பது வடிவேலு ஜோக் மாதிரி இவ்வளவு சிம்பளா! என்று நாம் வியர்ந்து போனோம்!

அண்மையில் ஹொரணை கோவின்ன தோட்டத்தில் 27 வீடுகளில் அண்டியிருந்த ஒரு சக்திவாய்ந்த பேயை விரட்டியதுதான் தாம் விரட்டிதில் ரொம்பவும் பெரிய பேய் என்கிறார் இவர்.

"அந்த பேயை நினைத்தாலே என் உடம்பு சிலிர்க்கிறது. அந்த பேய் விரட்டு எனக்கு கரணம் தப்பினால் மரணம் என்பது போல ஆகிவிட்டது. பேயை விரட்டி விட்டு வீட்டுக்கு வந்த போது வீட்டில் நான் வளர்த்து வந்த மூன்று ஆடுகள் பரிதாபமாக செத்துக் கிடந்தன. என்னை ஒன்றும் செய்ய முடியாத அந்தப் பேய், என் ஆடுகளின் கதையை முடித்துவிட்டு போயிருந்தது" என்று சொல்லும் திலக்ராஜாவுக்கு எப்போதும் பாதுகாப்பு உத்ரகாளிதானாம். தனது தாத்தா சொல்லிக் கொடுத்த மற்றும் படித்த மூலிகை மருந்துகளை இவரும் பயின்று அதன்படி மந்திரத்தோடு மருத்துவமும் பார்த்து வருகிறேன் என்றார் இந்தப் பேய் விரட்டும் போஸா சாமி!

முற்றும்